ភ្នំពេញ៖ រថយន្តស៊េរីទំនើបម៉ាក អូឌី មួយគ្រឿង បើកបរដោយបុរសម្នាក់ស្ថិតក្នុងស្ថានភាពស្រវឹង បានរេចង្កតជ្រុលទៅបុករះម៉ូតូ៣គ្រឿងចំពីក្រោយពេញទំហឹងបណ្ដាលឲ្យរងការខូចខាតយ៉ាងដំណំ ហើយក៏ធ្វើឲ្យមនុស្សរងរបួសស្រាលផងដែរ ។
ហេតុការណ៍នេះបានបង្កឲ្យមានការភា្ញក់ផ្អើលកាលពីនៅវេលាម៉ោង៦ និង៤០នាទីព្រលប់ ថ្ងៃទី២៨ ខែមីនា ឆ្នាំ២០១៦ នៅតាមបណ្ដោយផ្លូវលេខ២១៧ ក្បែររបងសាលាបឋមសិក្សាភូមិឬស្សី ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកើតហេតុបានឱ្យដឹងថា ម៉ូតូដែលរងគ្រោះទាំង៣គ្រឿងនោះ ទី១ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១២ ពាក់ស្លាកលេខភ្នំពេញ1BG-1682 ទី២ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១២ ពាក់ស្លាកលេខកណ្ដាល1I- 5973 និងទី៣ម៉ាក ហុងដាឌ្រីម ពណ៌ខ្មៅ ស៊េរីឆ្នាំ២០១៣ ពាក់ស្លាកលេខភ្នំពេញ1CZ-7243 ។
បើតាមសាក្សីនៅកន្លែងកើតហេតុឱ្យដឹងដែរថា ករណីហេតុការណ៍គ្រោះថា្នក់ចរាចរណ៏នេះ គឺកើតឡើងស្របខណៈពេលគេឃើញ ម៉ូតូទាំង៣គ្រឿងខាងលើដែលមានបុរស៣នាក់ កំពុងឈប់សំចតអង្គុយនៅលើម៉ូតូអែប និងសួនច្បារពុះចែកផ្លូវក្នុងទិសដៅពីត្បូងទៅជើង រង់ចាំប្រពន្ធទិញម្ហូបនៅផ្សារដើមពោធិ៍ ។ ស្រាប់តែបុរសម្នាក់អាយុ៣០ឆ្នាំ បានបើករថយន្តម៉ាក អូឌី ពណ៌ខ្មៅ ធ្វើដំណើរតាមផ្លូវ២១៧ ទិសដៅស្របគ្នាក្នុងល្បឿនលឿនហើយស្រវឹង បានរេចង្កូតទៅបុករះម៉ូតូទាំង៣គ្រឿងនោះតែម្តង ។ បណ្តាលឲ្យមនុស្សរងរបួសរលាត់ដៃជើង ស្រាលទាំង៣នាក់ ចំណែកម៉ូតូរងការខូចខាតខ្លាំងចំនួន២គ្រឿង ស៊េរីឆ្នាំ ២០០៨ និង២០១២ បាក់គូទក្រោយនិងក្បាំងស្ទើរតែទាំងស្រុង រីឯមួយគ្រឿងទៀតស៊េរី២០១៣ខូចខាតតិចតួច និងរថយន្តខ្ទេចផ្នែកខាងមុខចំហៀងខាងឆ្វេង ។
ក្រោយពេលកើតហេតុ ភាគីម៉ូតូទាំង៣គ្រឿងបានធ្វើការចរចាគ្នាជាមួយខាងរថយន្ត ដោយខាងរថយន្តសង់ទៅខាងម៉ូតូហុងដាឌ្រីមស៊េរីឆ្នាំ២០១៣ ចំនួន៥០ដុល្លារ ខាងម៉ូតូហុងដាឌ្រីមស៊េរីឆ្នាំ២០១២ ចំនួន៣៥០ដុល្លារ និងខាងម៉ូតូហុងដាឌ្រីមស៊េរីឆ្នាំ២០០៨ ចំនួន២៥០ដុល្លារ ដើម្បីបញ្ចប់រឿងនៅនឹងកន្លែង ៕
ដោយ៖ ជីម ភារ៉ា ដង្កោ
...
