ខេត្តបនបន្ទាយមានជ័យៈក្រសួងសាធារណៈការនិងដឹកជញ្ជូនបានដាក់ជញ្ជីងចល័តដើម្បីធ្វើការ ត្រួតពិនិត្យលើរថយន្តដឹកទំនិញនៅលើផ្លូវជាតិលេខ៥ បានពិនិត្យរកឃេីញរថយន្តដឹកលេីសទម្ងន់កំណត់ចំនួន៣គ្រឿង យកមកធ្វេីការផាកពិន័យ នៅព្រឹក ថ្ងៃទី៤ ខែ កញ្ញា ឆ្នាំ ២០២១នេះ។
ការដាក់ជញ្ជីងចល័ត ពិនិត្យលើរថយន្ត នោះ ដឹកនាំដោយ លោក សេង ឈួត រដ្ឋលេខាធិការក្រសួងសាធារណៈការ និងដឹកជញ្ជូន នឹងជាប្រធានគណៈកម្មការសម្របសម្រួល ជញ្ជីងថ្លឹងរថយន្តចល័តទូទាំងប្រទេស ក្នុងនោះមានការចូលរួម លោក សុក ចាន់ថា ប្រធានមន្ទីរសាធារណៈការ និងដឹកជញ្ជូនខេត្ត និងមន្ត្រីជំនាញជាច្រើនអ្នកបានចូលរួមផងដែរ។
លោក សេង ឈួត បានប្រាប់ឲ្យដឹងថា ការដាក់ជញ្ជីងចល័តនេះ គឺដេីម្បីធានាដល់គុណភាពផ្លូវមានលក្ខណៈយូរអង្វែង ក្រុមការងារបានធ្វើការ ត្រួតពិនិត្យរថយន្តណាដែលដឹកលេីសទម្ងន់កំណត់ ធ្វើចរាចរណ៍លើផ្លូវជាតិលេខ៥ នៅត្រង់ចំណុចផ្លូវ ហាយវេ គឺផ្លូវវាងក្រុង។
លោកបញ្ជាក់ថា ការដាក់ជញ្ជីងចល័ត ត្រួតពិនិត្យរថយន្តដឹកទំនិញលើផ្លូវជាតិលេខ៥ នាពេលនេះ គឺអនុវត្តតាមបទបញ្ជារបស់លោក ទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណៈការដឹកជញ្ជូន។
ចំណែក លោក សុក ចាន់ថា ប្រធានមន្ទីរសាធារណៈការ និងដឹកជញ្ជូនខេត្តបន្ទាយមានជ័យមានប្រសាសន៍ថា ការដាក់ជញ្ជីងចល័តនៅចំណុចផ្លូវ ហាយវេ (ផ្លូវវាងក្រុង)នាពេលនេះគឺ ដេីម្បីធ្វេីការត្រួតពិនិត្យរថយន្តធំៗដែលដឹកទំនិញលេីសទម្ងន់កំណត់ ដែលមូលហេតុធ្វេីឲ្យខូចគុណភាពផ្លូវ មិនអាចទ្រាំទ្រទម្ងន់បាន។
បើរថយន្តធំៗ នៅតែបន្តដឹកលើសទម្ងន់បន្តទៀត ក្រសួងនឹងចាត់វិធានការតាមផ្លូវច្បាប់ដែលក្រសួងបានកំណត់ និងធ្វើការផាកពិន័យ។
លោកក៏ បានការអំពាវនាវ ដល់ម្ចាស់យានយន្តធំៗដែលប្រេីប្រាស់ផ្លូវថ្នល់ សូមចូលរួមជាមួយក្រសួង ក៏ដូចជាមន្ទីរសាធារណៈការនិងដឹកជញ្ជូនខេត្ត មេត្តាកុំដឹកលេីសទម្ងន់កំណត់ ដែលជាហេតុធ្វេីឲ្យខូចផ្លូវប្រេីប្រាស់មិនបានយូរអង្វែង។ លោកបានបន្តឲ្យដឹងទៀតថា ក្រោយពីធ្វើការពិនិត្យលើរថយន្តធំៗក្រុមការងារបានរកឃេីញរថយន្តដែលដឹកលេីសទម្ងន់កំ
ណត់មានចំនួន៣គ្រឿង ហើយរថយន្តទាំង៣គ្រឿងនោះ ក៏ត្រូវបានធ្វើការពិន័យ ទៅតាមច្បាប់ក្រសួងសាធារណៈការដែលបានកំណត់ រថយន្តធំៗភាគច្រេីនជារថយន្ត ដឹកខ្សាច់ និងដឹកថ្ម ជាដើម។ ដោយ វណ្ណា
