ខេត្តកណ្តាល៖ យុវជនម្នាក់បានរងរបួសធ្ងន់បាក់ជើងម្ខាង និងម្នាក់ទៀតបានរងរបួសស្រាល ក្នុងករណីគ្រោះថ្នាក់ចរាចរណ៍រវាងម៉ូតូ២គ្រឿងបុកគ្នា កាលពីវេលាម៉ោង៨ព្រឹក ថ្ងៃទី២០ ខែកក្កដា ឆ្នាំ២០១៥ នៅលើកំណាត់ផ្លូវជាតិលេខ១ ស្ថិតក្នុងភូមិស្លាបតាអោន ឃុំគគីរ ស្រុកកៀនស្វាយ ខេត្តកណ្ដាល។ ប្រភពពីសមត្ថកិច្ចបានថា ហេតុការណ៍គ្រោះថ្នាក់ខាងលើគឺបានកើតឡើងរវាងម៉ូតូ១គ្រឿងមិនស្គាល់ម៉ាក ដែលបានជិះក្នុងទិសដៅពីលិចទៅកើត។ លុះមកដល់ចំណុចកើតហេតុ ក៏បានបត់ឆ្វេង គ្រានោះក៏មានម៉ូតូ១គ្រឿងទៀត ម៉ាក MSX គ្មានស្លាកលេខ បានធ្វើដំណើរទិសដៅច្រាស់គ្នា បានមកបុកពេញទំហឹង បណ្តាលឲ្យម៉ូតូទាំង២គ្រឿងដួល ហើយអ្នកបើកបររងរបួសធ្ងន់ស្រាលទាំង២នាក់តែម្តង។ ក្រោយកើតហេតុជនរងគ្រោះទាំង២នាក់ ត្រូវបានបញ្ជូនទៅសង្គ្រោះនៅមន្ទីរពេទ្យ។ ចំណែកម៉ូតូទាំង២គ្រឿង ត្រូវបានសមត្ថកិច្ចយកទៅរក្សាទុកនៅអធិការដ្ឋានស្រុកកៀនស្វាយ ដើម្បីរង់ចាំដោះស្រាយគ្នានៅពេលក្រោយ៕ វិបុល
