បន្ទាប់ពីមនុស្សជាច្រើនបានចង្អុលបង្ហាញពីការប្រើប្រាស់ខុសនៃកម្មវិធីការប្រកួតប្រជែងផ្នែកហិរញ្ញវត្ថុដោយយុត្តិធម៌ Financial Fair Play (FFP) ក្នុងរយៈពេលប៉ុន្មានឆ្នាំចុងក្រោយនេះ លោក AleksanderCeferin បានសង្កត់ធ្ងន់ថា UEFA នឹងធ្វើការលើប្រព័ន្ធមួយដើម្បីពង្រឹងហិរញ្ញវត្ថុរបស់បាល់ទាត់អឺរ៉ុប។

ប្រធាន UEFA រូបនេះបានកត់សម្គាល់ថា​ អ្នកដែលខកខានមិនបានធ្វើតាមច្បាប់របស់ FFP មិនត្រឹមតែធ្វើឱ្យខូចខាតដល់ហិរញ្ញវត្ថុរបស់ក្លិបពួកគេប៉ុណ្ណោះទេ ប៉ុន្តែវាក៏ប៉ះពាល់ដល់ក្លិបផ្សេងទៀតផងដែរ។

លោក Ceferin បានថ្លែងនៅក្នុងពិធីបើកមហាសន្និបាតសមាគមក្លឹបអឺរ៉ុប (ECA) ថា “អ្វីដែលខ្ញុំកំពុងនិយាយនៅពេលនេះគឺការទទួលខុសត្រូវផ្នែកហិរញ្ញវត្ថុ។ នេះមិនត្រឹមតែមានន័យថា ក្លិបត្រូវចំណាយដោយឈ្លាសវៃនោះទេ វាក៏មានន័យថាក្លិបគួរតែយល់ថាយុទ្ធសាស្ត្រហិរញ្ញវត្ថុផ្ទាល់ខ្លួនរបស់ក្លិបអាចនិងធ្វើឱ្យប៉ះពាល់ដល់អ្នកដទៃ”។

លោកបន្តថា “នេះជាមូលហេតុដែលខ្ញុំយល់ឃើញថា ប្រព័ន្ធត្រួតពិនិត្យថ្លៃដើមនៃការត្រួតពិនិត្យ និងសមតុល្យដែនកំណត់, ប្រាក់ឧបត្ថម្ភអាចមានការទទួលខុសត្រូវ, មានគណនេយ្យភាព និងតម្លាភាពដែលយើងអាចធ្វើបានល្អប្រសើរ ហើយជាមួយនឹងវិបត្តិបច្ចុប្បន្នយើងអាចបង្កើតឱ្យមានភាពប្រសើរឡើងបាន។ ខ្ញុំដឹងច្បាស់អំពីវា ប៉ុន្តែខ្ញុំសូមបញ្ជាក់ពីអ្វីដែលសំខាន់បំផុត ការប្រកួតប្រជែងដោយយុត្តិធម៌ផ្នែកហិរញ្ញវត្ថុមិនមែននិយាយអំពីការប្រកួតប្រជែងតែមួយមុខនោះទេ”។

លោកអះអាងថា “ប្រព័ន្ធគ្រប់គ្រងថ្លៃដើម និងវិធានការតុល្យភាពនៃការប្រកួតប្រជែងគឺជាផ្នែកពីរផ្សេងគ្នានៃរាងកាយតែមួយ។ ជាការពិតពួកគេមានទំនាក់ទំនងគ្នា យើងដឹងហើយប៉ុន្តែពួកគេមានគោលបំណងផ្សេងគ្នា។ ទោះយ៉ាងណាក៏ដោយឥឡូវនេះយើងត្រូវធានាឱ្យបាននូវមូលដ្ឋានហិរញ្ញវត្ថុ និងប្រព័ន្ធសមស្របមួយដើម្បីធ្វើឱ្យមានស្ថិរភាពផ្នែកហិរញ្ញវត្ថុបាល់ទាត់អឺរ៉ុប ហើយយើងនឹងធ្វើវាសម្រាប់ថ្ងៃនេះ និងថ្ងៃស្អែក” ។

ជាមួយគ្នានោះលោក Ceferin ក៏បានបញ្ចេញទស្សនៈពាក់ព័ន្ធនឹងការបង្កើតក្របខ័ណ្ឌថ្មីឈ្មោះ Super League ថា ជារឿងគួរឱ្យអៀនខ្មាស់ និងគួរឱ្យអាម៉ាស់ ហើយលោកបានសង្កត់ធ្ងន់ថា UEFA និង ECA គួរតែរួបរួមគ្នានាពេលអនាគត ៕ (រូបភាព ៖ MARCA)ដោយ៖ភារៈ