ស្ថាប័នគ្រប់គ្រងកីឡាមួយនេះបាននិយាយថា ការសាកល្បងប្រកួតផ្នែកបុរសលើកដំបូងមិនធ្លាប់មានរវាងប្រទេសទាំង២ស្ថិតក្រោមការគំរាមកំហែងយ៉ាងធ្ងន់ធ្ងរ បន្ទាប់ពីអនុប្រធានគណៈកម្មការវប្បធម៌របស់តាលីបង់លោក Ahmadullah Wasiq បានរាយការណ៍ថា ស្ត្រីនឹងមិនលេងកីឡាគ្រីឃីត ឬកីឡាណាមួយឡើយក្រោមរបបថ្មីនេះ។
លោក Wasiq បានប្រាប់ទូរទស្សន៍អូស្ត្រាលី SBS កាលពីថ្ងៃពុធថា “ខ្ញុំមិនគិតថាស្ត្រីនឹងត្រូវបានអនុញ្ញាតឱ្យលេងកីឡាគ្រីឃីតទេ ព្រោះវាមិនចាំបាច់ថាស្ត្រីគួរតែលេងកីឡាគ្រីឃីតឡើយ។ នៅក្នុងកីឡាគ្រីឃីតពួកគេអាចប្រឈមមុខនឹងស្ថានភាពដែលមុខ និងដងខ្លួនរបស់ពួកគេនឹងមិនត្រូវបានគ្របដណ្តប់។ សាសនាអ៊ីស្លាមមិនអនុញ្ញាតឱ្យស្ត្រីត្រូវបានគេមើលឃើញដូចនេះទេ។ វាជាសម័យប្រព័ន្ធផ្សព្វផ្សាយ ហើយវានឹងមានរូបថត និងវីដេអូបន្ទាប់មកមនុស្សមើលការប្រកួតរបស់អ៊ីស្លាម និងអេមីរ៉ាតអ៊ីស្លាមមិនអនុញ្ញាតឱ្យស្ត្រីលេងកីឡាគ្រីឃីតឬលេងកីឡាប្រភេទណាដែលពួកគេទទួលការប៉ះពាល់នោះទេ” ។
ក្រុមតាលីបង់បាននិយាយភ្លាមៗបន្ទាប់ពីកាន់អំណាចថា កាលវិភាគសម្រាប់ក្រុមកីឡាករបុរសអាហ្វហ្គានីស្ថាននឹងមិនត្រូវបានរំខានឡើយដោយដឹកនាំកីឡាគ្រីឃីតអូស្រ្តាលីប្រកាសកាលពីដើមខែនេះថា ខ្លួននៅតែសង្ឃឹមធ្វើជាម្ចាស់ផ្ទះការប្រកួតនៅថ្ងៃទី២៧ ខែវិច្ឆិកា។ កាលពីថ្ងៃព្រហស្បតិ៍ស្ថាប័នកីឡាគ្រីឃីតអូស្រ្តាលីបាននិយាយថា ការជំរុញកំណើនកីឡាគ្រីឃីតរបស់ស្ត្រីនៅទូទាំងពិភពលោកគឺមានសារៈសំខាន់មិនគួរឱ្យជឿចំពោះកីឡាមួយនេះ។
សេចក្តីថ្លែងការណ៍នេះបាននិយាយថា “ចក្ខុវិស័យរបស់យើងចំពោះកីឡាគ្រីឃីតគឺថា វាជាកីឡាសម្រាប់ទាំងអស់គ្នា ហើយយើងគាំទ្រការប្រកួតនេះដោយឥតលាក់លៀមសម្រាប់ស្ត្រីគ្រប់កម្រិត។ ប្រសិនបើប្រព័ន្ធផ្សព្វផ្សាយថ្មីៗនេះបានរាយការណ៍ថា កីឡាគ្រីឃីតរបស់ស្ត្រីនឹងមិនត្រូវបានគាំទ្រនៅអាហ្វហ្គានីស្ថានទេនោះ កីឡាគ្រីឃីតអូស្រ្តាលីនឹងគ្មានជំរើសអ្វីផ្សេងក្រៅពីមិនធ្វើជាម្ចាស់ផ្ទះអាហ្វហ្គានីស្ថានសម្រាប់ការប្រកួតសាកល្បងដែលបានគ្រោងនឹងត្រូវលេងនៅHobart ទេ” ។
ក្នុងកំឡុងពេលកាន់អំណាចដំបូងរបស់ពួកគេ ក្រុមតាលីបង់បានហាមឃាត់ការកំសាន្តភាគច្រើនរួមទាំងកីឡាជាច្រើន និងបិទពហុកីឡដ្ឋានដែលជាកន្លែងសាធារណៈ។ ថ្វីបើក្រុមតាលីបង់បានសន្យាថា នឹងអនុវត្តច្បាប់អ៊ីស្លាមដែលតឹងរ៉ឹងជាងនេះក៏ដោយ អង្គការសហប្រជាជាតិបាននិយាយថាស្ត្រីនៅអាហ្វហ្គានីស្ថានត្រូវបានហាមឃាត់មិនឱ្យចាកចេញពីផ្ទះដោយគ្មានសមាជិកគ្រួសារបុរស ហើយនៅក្នុងតំបន់ខ្លះបានបញ្ឈប់ពីការងារ។
សមាគមកីឡាគ្រីឃីតអូស្ត្រាលី (ACA) បាននិយាយថា ខ្លួនបានគាំទ្រជំហររបស់កីឡាគ្រីឃីតអូស្ត្រាលីយ៉ាងច្បាស់។ ACA បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើបណ្តាញសង្គម Twitter ថា “អ្វីដែលកំពុងកើតឡើងនៅអាហ្វហ្គានីស្ថានឥឡូវនេះគឺជាបញ្ហាសិទ្ធិមនុស្សដែលហួសពីការប្រកួតកីឡាគ្រីឃីត។ ខណៈដែលយើងចង់ឃើញកីឡាករដូចជាកីឡាការិនី Rashid Khan ប្រកួតជាមួយអូស្ត្រាលីការធ្វើជាម្ចាស់ផ្ទះការប្រកួតនេះមិនអាចចាត់ទុកថាជាឱកាសនោះទេ ប្រសិនបើកីឡាការិនី Roya Samim និងមិត្តរួមក្រុមរបស់នាងបដិសេធ”៕
ដោយ៖ ភារៈ(រូបភាព ៖ AFP)
