ខេត្តពោធិ៍សាត់ ៖ ប្រជាពលរដ្ឋ២នាក់រស់នៅភូមិប្រហាល ឃុំតាលោ ស្រុកតាលោសែនជ័យ បានប្រទះឃើញគ្រាប់មិនទាន់ផ្ទុះចំនួន៥១គ្រាប់ ដែលបន្សល់តាំងពីសម័យសង្គ្រាម និងបានរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលតាលោដើម្បីចុះពិនិត្យមើល ភ្លាមៗកាលពីរសៀលថ្ងៃទី១០ ខែកញ្ញា ឆ្នាំ២០២១ ។
តាមមន្រ្តីនគរបាលស្រុកតាលោសែនជ័យ បានឲ្យដឹងថា ប្រជាពលរដ្ឋទាំង២នាក់ដែលប្រទះឃើញគ្រាប់រំសេវមិនទាន់ផ្ទុះនេះមានឈ្មោះ ៖ ១-ឈ្មោះ ម៉ាន សាយ័ន ភេទប្រុសអាយុ៤០ ឆ្នាំ រស់នៅភូមិឃុំខាងលើបានទៅភ្ជួរដីចំការនៅខាងក្រោយផ្ទះចំណុចម្ដុំច្រាំងចោទ បានប្រទះឃើញក្បាលបំបែកគ្រាប់ប្រភេទ M47 ចំនួន៥០គ្រាប់ ដែលផលិតនៅប្រទេសចិន កាលពីថ្ងៃទី១០ខែកញ្ញាឆ្នាំ២០២១វេលាម៉ោង ៨និង៤៨នាទី ។
២-ចាន់ គឹមសឿន ភេទស្រីអាយុ៣៤ឆ្នាំរស់នៅភូមិឃុំខាងលើ បានជិះម៉ូតូតាមផ្លូវចំណុចម្ដុំមុខផ្ទះបានប្រទះឃើញគ្រាប់បែកដៃ (ក្រឡាទៀប)ចំនួន១គ្រាប់ប្រភេទ F1 ផលិតនៅប្រទេសសូវៀត កាលពីវេលាម៉ោង៩និង០៨នាទីក្នុងថ្ងៃដដែល ។
សមត្ថកិច្ចបានឲ្យដឹងទៀតថា ក្រោយពីសមត្ថកិច្ចនគរបាលបានទទួលព័ត៌មាននេះ ក៏ចុះទៅពិនិត្យដល់ទីតាំងកន្លែងគ្រាប់បែកនិងក្បាលគីបបំបែក និងសហការជាមួយមជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់-CM-CMACយកគ្រាប់ទាំង៥១គ្រាប់ទាំងនេះ ទៅអង្គការស៊ីម៉ាក់ដើម្បីយកទៅកម្ទេចចោលនៅពេលក្រោយ ៕
ដោយ÷ ប្រាថ្នា
