ភ្នំពេញ៖ ឆ្លងចរន្តអគ្គិសនី កន្លែងយានដ្ឋានជួសជុលគ្រឿងចក្រមួយកន្លែង បង្កជាអគ្គិភ័យឆាបឆេះយ៉ាងសន្ធៅសន្ធៅ រហូតកម្លាំងសមត្ថកិច្ច នៃការិយាល័យ បង្ការ និង ពន្លត់អគ្គិភ័យចេញរថយន្តពន្លត់អគ្គិភ័យជាច្រើនគ្រឿង ដើម្បីអន្តរាគមន៍។
ហេតុការណ៍នេះបានកើតឡើងកាលពីវេលាម៉ោង ២ និង ៣០ នាទីរសៀល ថ្ងៃទី១២ ខែកញ្ញា ឆ្នាំ២០២១ ស្ថិតតាមបណ្តោយផ្លូវបេតុង ត្រង់ចំណុចយានដ្ឋានជួសជុលគ្រឿងចក្រមួយកន្លែង ក្នុងសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។
តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេបានឃើញផ្សែង រួមជាមួយអណ្តាតភ្លើងឆាបឆេះយ៉ាងសន្ធោសន្ធៅ ក្នុងយានដ្ឋានជួសជុលគ្រឿងចក្រមួយកន្លែងគ្មានមនុស្សនៅទីនោះទេ រហូតប្រជាពលរដ្ឋដែលរស់នៅក្បែរកន្លែងកើតហេតុបានរាយការណ៍ទៅកម្លាំងនគរបាល នៃការិយាល័យ បង្ការ និង ពន្លត់អគ្គិភ័យ ដើម្បីយករថយន្តមកអន្តរាគមន៍។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាន នគរបាលរាជធានីភ្នំពេញ បានប្រាប់ឲ្យដឹងថា ក្រោយពីទទួលបានព័ត៌មានពីប្រជាពលរដ្ឋភ្លាម លោក ក៏បានបញ្ចេញរថយន្តពន្លត់អគ្គិភ័យ របស់ការិយាល័យជាច្រើនគ្រឿង និង រថយន្តជួយផ្សេងៗទៀត បានចេញមកអន្តរាគមន៍ និងប្រើប្រាស់ជួយបាញ់ពន្លត់អស់ជាច្រើនគ្រឿង ជៀសវាងបង្កការរាលដាលដល់ផ្ទះប្រជាពលរដ្ឋ ឬបង្កគ្រោះថ្នាក់ដល់មនុស្ស។
ក្នុងទំហំនៃប្រតិបត្តិការណ៍ពន្លត់អគ្គិភ័យនេះ កម្លាំងសមត្ថកិច្ចបានប្រើប្រាស់រថយន្តពន្លត់អគ្គិភ័យ ចំនួន៨គ្រឿងមកដល់កន្លែងកើតហេតុ នឹងធ្វើការបាញ់ពន្លត់ភ្លាមៗ រហូតអគ្គិភ័យរលត់ទៅវិញជាស្ថាពរ។
ចំពោះការខូចខាតវិញ មានដូចជាគ្រឿងម៉ាសុីន ចំនួន១តួកុងទីន័រ ,គ្រឿងចក្រចំនួន២ និង រោងសម្រាប់ដាក់សម្ភារៈគ្រឿងម៉ាសុីនឆេះអស់ទាំងស្រុង។ សូមបញ្ជាក់ថា កម្លាំងសមត្ថកិច្ចប្រើពេលជិត១ម៉ោង ក្នុងប្រតិបត្តិការណ៍បាញ់ពន្លត់ ទើបអគ្គិភ័យរលត់ទៅវិញ។ដោយនិនសុភ័ស្ត +រ៉ារ៉ា
