ភ្នំពេញ ៖ ចៅប្រុសដែលញៀនថ្នាំហួសកម្រិតបានក្លាយទៅជាជនវិកលចរិតនិងបានដុតផ្ទះយាយខ្លួនឯងបណ្ដាលឲ្យគាត់ស្លាប់ក្នុងភ្នក់ភ្លេីង បង្កឲ្យមានការភ្ញាក់ផ្អើលដល់អ្នកជិតខាងនិងសមត្ថកិច្ចចុះទៅធ្វើអន្តរាគមន៍កាលពីវេលាម៉ោង១១និង៤០នាទីយប់ថ្ងៃទី១៩ ខែកញ្ញា ត្រង់ចំណុចផ្លូវលំ ក្នុងភូមិដំណាក់ធំ២ ក្រុម៤ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ជនបង្កហេតុមានឈ្មោះ សេន សាម៉ាន់ថៃ ភេទប្រុស អាយុ២៩ឆ្នាំ ជនជាតិខ្មែរ ជាមនុស្សវិកលចរិតដោយសារញៀនថ្នាំខ្លាំងពេកត្រូវបានសមត្ថកិច្ចឃាត់ខ្លួន។
លោក ព្រហ្ម យ៉ន នាយការិយាល័យបង្ការ ពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញបានប្រាប់ឱ្យដឹងថា ម្ចាស់ផ្ទះមានឈ្មោះ គីម យ៉ាន ភេទស្រី អាយុ៧៥ឆ្នាំ មុខរបរនៅផ្ទះ បានស្លាប់នៅក្នុងភ្លើង។ ផ្ទះមានទំហំទទឹង៦ម៉ែត្រនិងបណ្ដោយ៨ម៉ែត្រជើងខាងក្រោមធ្វើអំពីថ្ម បាំងជញ្ជាំងដែកដំបូលប្រក់ស័ង្កសីត្រូវបានភ្លើងឆេះទាំងស្រុងរួមទាំងសម្ភារនៅក្នុងផ្ទះនិងលោកយាយម្នាក់បានស្លាប់បាត់បង់ជីវិត នៅនឹងកន្លែងកើតហេតុ។
បេីតាមប្រភពព័ត៌មានពីប្រជាពលរដ្ឋដែលនៅជិតខាងបានឱ្យដឹងថា ជនបង្កជាចៅប្រុសលោកយាយរងគ្រោះធ្លាប់បានដុតផ្ទះខាងលេីនេះជាច្រេីនដងមកហើយតែមិនបានសម្រេច រហូតមកដល់ថ្ងៃកេីតហេតុ ជននេះក៏ដុតឆេះខ្ទេចតែម្ដង ។
ក្នុងប្រតិបត្តិការពន្លត់អគ្គិភ័យខាងលេីនេះ គឺមានរថយន្តពន្លត់អគ្គិភ័យមកដល់កន្លែងកើតហេតុចំនួន៥គ្រឿង ហើយបានប្រើប្រាស់ទឹកអស់ចំនួន៣ឡានក៏បាញ់ឲ្យរលត់ទៅវិញនៅវេលាម៉ោង១២និង៤០នាទីយប់រំលងអធ្រាត្រឈានចូលថ្ងៃទី២០ ខែកញ្ញា ឆ្នាំ២០២១៕
ដោយ ៖ ភារ៉ា ដង្កោ
