ខេត្តពោធិ៍សាត់ : លោកហ៊ុន ម៉ាណែត អគ្គមេបញ្ជាការងនៃកងយោធពលខេមរភូមិន្ទ មេបញ្ជាការកងទ័ពជើងគោក បានឧបត្ថម្ភ ម៉ូតូ ចំនួន ៧គ្រឿង, ទឹកក្រូច ៤០កេស និងនំធុង ៤០កេស ដល់កងការពារព្រំដែនលេខ៥០១ ក្នុងឱកាបុណ្យភ្ជុំបិណ្ឌប្រពៃណីខ្មែរ និងដើម្បីបម្រើការងារអង្គភាព។
អំណោយដ៏ថ្លៃថ្លារបស់ លោកមេបញ្ជាការកងទ័ពជើងគោក ត្រូវបាន ឧត្តមសេនីយ៍ទោ ទាន សោភ័ណ្ឌវង្ស នាយសេនាធិការរង នាយការិយាល័យព្រំដែនកងទ័ពជើងគោក នាំយកផ្តល់ជូនកងការពារព្រំដែនលេខ៥០១ នៅថ្ងៃទី២៥ ខែកញ្ញា ឆ្នាំ២០២១នេះ។
លោកឧត្តមសេនីយ៍ទោ ទាន សោភ័ណ្ឌវង្ស បានពាំនាំនូវការផ្តាំផ្ញើសាកសួរសុខទុក្ខ និងការយកចិត្តទុកដាក់ពីសំណាក់ លោក មេបញ្ជាការកងទ័ពជើងគោក ចំពោះ សុខទុក្ខ ការស់នៅ បំពេញភារកិច្ចការពារបូរណៈភាពទឹកដីតាមបន្ទាត់ព្រំដែន កម្ពុជា-ថៃ របស់នាយ-ពលទាហាន កងការពារព្រំដែនលេខ៥០១។
លោកវរសេនីយ៍ឯក ចាន់ប៊ុនឌី មេបញ្ជាការ កងការពារព្រំដែនលេខ៥០១ បានគោរពថ្លែងអំណរគុណដ៏ជ្រាលជ្រៅជាទីបំផុតចំពោះ លោក មេបញ្ជាការកងទ័ពជើងគោក ចំពោះការយកចិត្តទុកដាក់គ្រប់បែបយ៉ាងពីសុខទុក្ខ និងជីវភាពរស់នៅរបស់យោធិនគ្រប់រូប ព្រមទាំងបានប្តេជ្ញាចិត្តថែរក្សា និងប្រើប្រាស់ដើម្បីបម្រើផលប្រយោជន៍អង្គភាព៕ ដោយ ស សម
