ប្រទេសថៃ: នៅព្រឹកថ្ងៃទី០៣ ខែតុលា ឆ្នាំ២០២១ លោក អ៊ូក សោភ័ណ ឯកអគ្គរាជ​ទូត​កម្ពុជាប្រចាំប្រទេសថៃ បានចាត់ លោក ធុច ដាលីន អគ្គទីប្រឹក្សា និង លោក ចិន សំណាង អនុព័ន្ធការងារប្រចាំស្ថានទូត នាំយក អង្ករ ត្រីខ បន្លែ ត្រី សាច់ ទៅ ប្រគល់ជូនតំណាងរបស់បងប្អូនពលករខ្មែរនៅផ្លូវផេតប៊ុរី១៧, សង្កាត់ផៈយ៉ាថៃ, ខណ្ឌរ៉ាតឆៈថេវី, រាជធានីបាងកក ដើម្បីនាំយក​ទៅចែក​ជូន​បន្តដល់បងប្អូនពលករ សរុប ៩៣ គ្រួសារ ដែលរស់នៅ ខេត្តណៈខនប៉ៈធុម ១៤ គ្រួសារ, សមុទ្រប្រាកាន ៣៨ គ្រួសារ, ឈុនប៊ុរី ៤ គ្រួសារ និងទីក្រុងបាងកក ៣៧ គ្រួសារ។

សូមបញ្ជាក់ថា បងប្អូនពលករខ្មែរទាំងនេះ សុទ្ធសឹងជាអ្នកដែលជួបការលំបាកខ្លាំង ខ្លះបាត់បង់ការងារ, ខ្លះមានឆ្លងជំងឺកូវីដ-១៩ និងមួយចំនួនទៀត ជាប់ធ្វើចត្តាឡីស័កមិនអាច​ទៅធ្វើការបាន។

ដោយឡែកនៅកម្ពុជា , បើយោងតាមសេចក្ដីជូនដំណឹងរបស់ក្រសួងសុខាភិបាលកម្ពុជា នៅថ្ងៃអាទិត្យទី​០៣ ខែតុលា​​​​ ឆ្នាំ២០២១នេះ​ បានបញ្ជាក់ពីការរកឃើញ​ករណីវិជ្ជមានវីរុសកូវីដ-១៩ថ្មី​ចំនួន​ ១៩៩នាក់(PCR) ខណៈ​ឣ្នកជាសះស្បើយចំនួន​ ៤៩០នាក់ និងករណីស្លាប់​ ២៣នាក់​។​

សូមជម្រាបថា​ នៅក្នុង​សេចក្ដីជូនដំណឹងរបស់ក្រសួងសុខាភិបាល​ នៅថ្ងៃទី​០២ ខែតុលា​​​​​​ ឆ្នាំ​២០២១​ រកឃើញ​អ្នកឆ្លងថ្មី ១៩៩នាក់ទៀត ជាសះស្បើយ ៤៩០នាក់ និងស្លាប់​ ២៣នាក់៖

– ករណីឆ្លងសហគមន៍ ១៥៥នាក់

– អ្នកដំណើរពីបរទេស ៤៤នាក់

គិតត្រឹមព្រឹក ថ្ងៃទី០៣ ខែតុលា ឆ្នាំ២០២១

– អ្នកឆ្លងសរុប=113,256 នាក់

– អ្នកជាសះស្បើយ=104,408 នាក់

– អ្នកស្លាប់=2,383 នាក់៕

ដោយ, សិលា