ភ្នំពេញ ៖ ស្ត្រីម្នាក់បានបេីករថយន្តស៊េរីទំនេីបមួយគ្រឿងឆ្លងស្ពានព្រះមុនីវង្សស្រាប់តែត្រូវរថយន្តកុងតឺន័របេីកកៀរពីចំហៀងបណ្ដាលឲ្យបាក់កញ្ចក់ និងបែកកង់ម្ខាងរងការខូចខាតយ៉ាងដំណំ កាលពីវេលាម៉ោង៨ និង៤០នាទីយប់ ថ្ងៃទី១៣ ខែតុលា ឆ្នាំ២០២១ ត្រង់ចំណុចគល់ស្ពានព្រះមុនីវង្សចាស់ តាមបណ្ដោយផ្លូវជាតិលេខ១ ក្នុងសង្កាត់ច្បារអំពៅ២ ខណ្ឌច្បារអំពៅ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកេីតហេតុគេឃើញ រថយន្តស៊េរីទំនេីបម៉ាក ហុីយ៉ាន់ដាយ Tucson ពណ៌ស ពាក់ស្លាកលេខភ្នំពេញ 2AZ-1587 បេីកបរដោយស្ត្រីម្នាក់និងមានមនុស្សក្មេងចាស់ជាលក្ខណៈគ្រួសារ៤ទៅ៥នាក់ជិះនៅក្នុងរថយន្តនោះដែរ ធ្វេីដំណេីរតាមបណ្ដោយផ្លូវជាតិលេខ១ ទិសដៅពីកេីតមកលិច ហេីយពេលមកដល់គល់ស្ពានព្រះមុនីវង្សបម្រុងបើកឆ្លងស្ពានថ្មីក៏ស្រាប់តែមានរថយន្តសណ្ដោងទូកុងតឺន័រ ក្បាលរថយន្តពាក់ស្លាកលេខភ្នំពេញ 3F-1794 ដែលបានធ្វេីដំណេីរស្របទិសគ្នានោះបានបើកជែងខាងស្ដាំរថយន្តរងគ្រោះ ហេីយកន្ទុយក្រោយបានកៀររថយន្តរងគ្រោះធ្វើឱ្យខូចខាតបាក់កញ្ចក់ និងបែកកង់មុខផ្នែកខាងឆ្វេង។ ភ្លាមៗនោះរថយន្តកុងតឺន័រមិនបានឈប់ទទួលខុសត្រូវនៅកន្លែង
កេីតហេតុទេ ថែមទាំងបេីករថយន្តរត់មកដល់មុខភោជនីយដ្ឋានទន្លេបាសាក់២ ក៏ត្រូវរថយន្តរងគ្រោះបេីកមកកាក់ពីមុខទេីបឈប់ ។
ក្រោយកេីតហេតុ ភាគីរថយន្តទាំងពីរបានជជែកយកតែត្រូវរៀងៗខ្លួនធ្វេីឲ្យមានការកកស្ទះចរាចរណ៍ដល់អ្នកដំណេីរ ទេីបសមត្ថកិច្ចមូលដ្ឋានខណ្ឌចំការមន បានទាក់ទងទៅសមត្ថកិច្ចជំនាញចរាចរណ៍ខណ្ឌច្បារអំពៅ ដែលជាម្ចាស់គោលដៅកេីតហេតុឲ្យមកធ្វេីការវាស់វែងយករថយន្តទាំងពីរគ្រឿងនេះទៅរក្សាទុក ដេីម្បីដោះស្រាយគ្នាតាមនីតិវិធី ៕
ដោយ ៖ ភារ៉ា ដង្កោ
