ភ្នំពេញ៖ ស្ត្រីម្នាក់ដឹកកូនប្រុស២នាក់មកពីលេងស្រុកកំណេីតបំណងត្រឡប់ទៅផ្ទះវិញស្រាប់តែជួបគ្រោះថ្នាក់ចរាចរណ៍ត្រូវរថយន្តបែនដឹកដីបើកកៀរបណ្តាលឱ្យដួលខ្ទាតកូនម្នាក់ចូលក្រោមរថយន្តកិនស្លាប់យ៉ាងអាណោចអាធ័ម កាលពីវេលាម៉ោង១១និង២០នាទីព្រឹក ថ្ងៃទី១៨ ខែតុលា ឆ្នាំ២០២១ នៅចំណុចមុខផ្សារជម្ពូវ័ន តាមបណ្តោយផ្លូវជាតិលេខ៤ ក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហេីយរថយន្តបង្កព្យាយាមបេីករត់បានចម្ងាយប្រហែល១គីឡូម៉ែត្រត្រូវសមត្ថកិច្ចឃាត់បាន។
កុមារារងគ្រោះដែលស្លាប់ឈ្មោះស៊ុន ចានី អាយុ៩ឆ្នាំ មានម្តាយឈ្មោះយ៉ាដា អាយុ៣៥ឆ្នាំ ស្នាក់នៅក្នុងសង្កាត់កំបូល ខណ្ឌកំបូល រាជធានីភ្នំពេញ។
ចំណែកតៃកុងរថយន្តបង្កហេតុឈ្មោះ ម៉ោ ថេរ៉ា ភេទប្រុស អាយុ៣៣ឆ្នាំ មានស្រុកកំណេីតនៅភូមិត្រពាំងធ្លក ស្រុករមាសហែក ខេត្តស្វាយរៀង។
តាមប្រភពព័ត៌មានពីស្ត្រីជាម្តាយបានឱ្យដឹងថា មុនពេលកេីតហេតុរូបគាត់បានជិះម៉ូតូម៉ាកស្គូពី ពណ៌ស ពាក់ស្លាកលេខភ្នំពេញ1HG-1765 ដឹកកូនប្រុស២នាក់ មកពីលេងស្រុកកំណេីតនៅក្រុងតាខ្មៅ ក្នុងបំណងត្រឡប់ទៅផ្ទះវិញនៅសង្កាត់កំបូល ខណ្ឌកំបូល រាជធានីភ្នំពេញ ដោយធ្វេីដំណេីរតាមបណ្តោយផ្លូវជាតិលេខ៤ ក្នុងទិសដៅពីកេីតទៅលិច ខណៈមកដល់ចំណុចកេីតហេតុស្រាប់តែមានរថយន្តបែនដឹកដីម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខភ្នំពេញ3F -3727 ធ្វេីដំណេីរមកពីក្រោយហេីយកៀរម៉ូតូរបស់គាត់បណ្តាលឱ្យដួលខ្ទាតកូនប្រុសម្នាក់ដែលអង្គុយខាងក្រោយចូលក្រោមរថយន្តកិនស្លាប់ភ្លាមៗយ៉ាងអាណោចអាធ័មតែម្តង ។
ប្រភពដដែលបានបន្តថា ភ្លាមនោះរថយន្តបង្កហេតុបានព្យាយាមបេីករត់រហូតទៅដល់ភ្លើងស្តុបកប់ស្រូវត្រូវបានសមត្ថកិច្ចឃាត់បានតែម្តងនិងឃាត់ខ្លួនតៃកុងរថយន្តយកទៅឃុំខ្លួនបណ្តោះអាសន្ន។
ក្រោយកេីតហេតុសមត្ថកិច្ចមូលដ្ឋានបានទំនាក់ទំនងទៅជំនាញការិយាល័យចរាចរណ៍ជេីងគោកនៃស្នងការដ្ឋាននគរបាលរាជធានីភ្នំពេញមកធ្វេីការវាស់វែងយករថយន្តនិងម៉ូតូរងគ្រោះរួមទាំងម្ចាស់រថយន្តបង្កទៅរក្សាទុករង់ចាំដោះស្រាយតាមច្បាប់៕
ដោយ៖សុខាសែនជ័យ
