ខេត្តព្រះសីហនុ៖ យុវជនម្នាក់ក្នុងចំណោម៣នាក់ត្រូវបានគេបញ្ជូនកាន់គ្លីនិចឯកជនភ្លាមៗ បន្ទាប់ពីជួបគ្រោះថ្នាក់ចរាចណ៍ដោយខ្លួនឯង កាលពីវេលាម៉ោង១៧ និង៤៥នាទីល្ងាចថ្ងៃទី​៤ ខែ​មេសា ឆ្នាំ២០១៦ នៅចំណុចចំណោទក្បែរសាលាសង្កាត់លេខ២ ស្ថិតក្នុងភូមិ០២ សង្កាត់​លេខ២ ក្រុង-ខេត្តព្រះសីហនុ។

​យោងតាមប្រភពពីសមត្ថកិច្ចមូលដ្ឋានបានឲ្យដឹងថា មានករណីគ្រោះថ្នាក់ចរាចរណ៍មួយ​កើតឡើងបង្កដោយ​ខ្លួនឯង គ្រាដែលចុះចំណោត ហើយជាន់ហ្វ្រាំងមិនស៊ី ក៏ជ្រុលទៅធ្លាក់​ផ្លូវក្បែរការដ្ឋានកំពុងសាងសង់ក្រឡាប់​រង​របួសធ្ងន់ម្នាក់ និងស្រាល២នាក់។ ជនរងមានឈ្មោះ ហួត វណ្ណី ភេទប្រុស អាយុ២៧ឆ្នាំ​មានមុខរបរបើកបរ មានទីលំនៅភូមិភូមិអូតាប៉ាង ឃុំអូឧក​ញ្ញ៉ា​ហេង ស្រុកព្រៃនប់ ខេត្តព្រះសីហនុ រងរបួសធ្ងន់ រីឯមនុស្ស២នាក់ទៀតរងរបួសស្រាលមិនស្គាល់អត្តសញ្ញាណនោះទេ។

យោងតាមសាក្សីដែលនៅក្បែរកន្លែងកើតហេតុបានអះអាង នៅមុន​កើត​ហេតុគេបានឃើញ រថយន្តតាក់ស៊ីនេះបានដឹកផ្លែស្វាយចេញពីផ្សារវាលរេញ ស្រុកព្រៃនប់ មកកាន់ក្រុងព្រះសីហនូ ហើយនៅពេលចុះចំណោត ​ប្រហែលតៃកុងរថយន្តពុំមានការប្រុង​ប្រយ័ត្ន ទើបធ្វើឲ្យមានហេតុការណ៍នេះកើតឡើង តែ​សំណាងហើយពុំមានប៉ះពាល់ដល់អ្នកដ៏ទៃ។

​សូមបញ្ជាក់ផងដែរថា ​ចំណុចទីតាំងកើតហេតុខាងលើនេះ​ជាញឹកញ៉ាប់ គេតែងសង្កេត​ឃើញ មានរថយន្តមួយចំនួនបានរងគ្រោះធ្លាក់ជង្ហុក(អតីតៈមហោស្របចាស់) បណ្តាលឲ្យ​រងរបួសជាច្រើននាក់ផងដែរ៕

ដោយ៖ ឆ្លាម សមុទ្រ