ភ្នំពេញ៖ លោកបណ្ឌិត អ៉ិត សំហេង រដ្ឋមន្ត្រីក្រសួងការងារ​ និងបណ្តុះបណ្តាលវិជ្ជាជីវៈ​ បានសម្តែងនូវការអបអរសាទរចំពោះគម្រោងរោងចក្រកាន់តែប្រសើរនៅកម្ពុជា ដែលសម្រេចបាននូវសមិទ្ធផលទាំងឡាយក្នុងរយៈពេល២០ឆ្នាំ កន្លងមកនេះ។ នេះជាឱកាសដ៏វិសេសវិសាលជាប្រវត្តិសាស្រ្តនៃការអភិវឌ្ឍវិស័យការងាររបស់ព្រះរាជាណាចក្រកម្ពុជាដែលសបញ្ជាក់យ៉ាងច្បាស់អំពីការប្តេជ្ញាចិត្តដ៏មុតមាំនិងជោគជ័យរបស់រាជរដ្ឋាភិបាលកម្ពុជា ក្នុងការលើកកម្ពស់លក្ខខណ្ឌការងារតាមរយៈការផ្សាភ្ជាប់ជាមួយពាណិជ្ជកម្មអន្តរជាតិ។ ផ្អែកលើសមិទ្ធផលដែលសម្រេចបានក្នុងវិស័យកាត់ដេរ រាជរដ្ឋាភិបាលកម្ពុជាបានសម្រេចពង្រីកវិសាលភាព នៃគម្រោងរោងចក្រកាន់តែប្រសើរនៅកម្ពុជាដោយបញ្ចូលរោងចក្រផលិតផលិតផលធ្វើដំណើរនិងកាបូប តាមរយៈអនុស្សរណៈនៃការយោគយល់គ្នារវាងក្រសួងការងារ និងបណ្តុះបណ្តាលវិជ្ជាជីវៈ ក្រសួងពាណិជ្ជកម្ម សមាគមរោងចក្រកាត់ដេរនៅកម្ពុជា និងអង្គការ ILO សម្រាប់ឆ្នាំ២០២០-២០២២។

លោករដ្ឋមន្រ្តីក្រសួងការងារ បានថ្លែងបែបនេះ ក្នុងឱកាសអបអរសាទរពិធីគម្រប់ខួប២០ឆ្នាំ នៃការបង្កើតគម្រោងរោងចក្រកាន់តែប្រសើរនៅកម្ពុជា ដែលប្រព្រឹត្តធ្វើឡើងតាមរយៈប្រព័ន្ធវីដេអូអនឡាញ នារសៀលថ្ងៃទី៤ ខែវិច្ឆិកា ឆ្នាំ២០២១ ដែលមានការអញ្ជើញចូលរួមពី លោក W Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា, លោក Graeme Buckley នាយកការិយាល័យអង្គការអន្តរជាតិខាងការងារ ប្រចាំប្រទេសកម្ពុជា ថៃនិងឡាវ, លោក Dan Rees នាយកគម្រោងការងារល្អប្រសើរ (Better Work), លោកស្រី Sara Park នាយកគម្រោងរោងចក្រកាន់តែប្រសើរនៅកម្ពុជា (ILO-BFC) រួមនិង តំណាងសមាគមនិយោជក តំណាងសហជីព និងអ្នកបញ្ជាទិញអន្តរជាតិផងដែរ។

លោករដ្ឋមន្រ្តី បានរំលឹកផងដែរថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើការប្តេជ្ញាចិត្តខ្ពស់ណាស់ ក្នុងការលើកកម្ពស់លក្ខខណ្ឌការងារ ការពារសិទ្ធិនិងអត្ថប្រយោជន៍បងប្អូនកម្មករនិយោជិត និងសិទ្ធិសេរីភាពអង្គការវិជ្ជាជីវៈ ដែលបានសម្រេចចុះកិច្ចព្រមព្រៀងពាណិជ្ជកម្មទ្វេភាគីជាមួយ សហរដ្ឋអាមេរិក ក្នុងឆ្នាំ១៩៩៩ ដែលផ្សាភ្ជាប់លក្ខខណ្ឌពាណិជ្ជកម្មជាមួយនឹងបទដ្ឋានការងារអន្តរជាតិ ហើយបានឯកភាពបង្កើតគម្រោងសហប្រតិបត្តិការបច្ចេកទេសដែលមានឈ្មោះថា “ការធានាថាលក្ខខណ្ឌការងារក្នុងវិស័យវាយនភណ្ឌ និងសម្លៀកបំពាក់នៅកម្ពុជា សមស្របតាមបទដ្ឋានការងារស្នូលដែលទទួលស្គាល់ជាអន្តរជាតិ និងស្របតាមច្បាប់ស្តីពីការងារកម្ពុជា កាលពីឆ្នាំ២០០១ ដោយមានកិច្ចសហការរវាងក្រសួងការងារ និងបណ្តុះបណ្តាលវិជ្ជាជីវៈ ក្រសួងពាណិជ្ជកម្ម ជាមួយនិងអង្គការអន្តរជាតិខាងការងារ (ILO) និងសមាគមរោងចក្រកាត់ដេរនៅកម្ពុជា(GMAC) គម្រោងនេះ ត្រូវបានផ្លាស់ប្តូរឈ្មោះទៅជា “គម្រោងរោងចក្រកាន់តែប្រសើរនៅកម្ពុជា” រហូតមកដល់បច្ចុប្បន្ន។

កម្ពុជាគឺជាប្រទេសទី១ ដែលមានភាពក្លាហានក្នុងការអនុវត្តពាណិជ្ជកម្មអន្តរជាតិដោយផ្សាភ្ជាប់ជាមួយនឹងការធានាលក្ខខណ្ឌការងារស្របតាមច្បាប់ស្តីពីការងារ និងបទដ្ឋានការងារស្នូលជាអន្តរជាតិ។ដោយសារតែគម្រោងនេះមានបេសកកម្ម និងកម្មវិធីការងារគាំទ្រនូវគោលនយោបាយ និងការប្តេជ្ញាចិត្តរបស់រាជរដ្ឋាភិបាលក្នុងការសំដៅធានាការលើកកម្ពស់លក្ខខណ្ឌការងារ សិទ្ធិការងារ និងសេរីភាពអង្គការវិជ្ជាជីវៈ ទើបបានជាគម្រោងនេះទទួលបានការគាំទ្រយ៉ាងពេញទំហឹង ពីរាជរដ្ឋាភិបាលកម្ពុជា តាមរយៈក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាណិជ្ជកម្ម ហើយអាចដំណើរការបានយ៉ាងរលូនក្នុងរយៈពេល ២០ឆ្នាំនេះ។

ភាពជោគជ័យ និងការអនុវត្តល្អរបស់គម្រោងនេះនៅកម្ពុជា ត្រូវបានក្លាយជាគំរូសម្រាប់បណ្តាប្រទេសក្នុងតំបន់តាមរយៈការបង្កើតជា “កម្មវិធីការងារល្អប្រសើរ (Better Work)”។ គម្រោងរោងចក្រកាន់តែប្រសើរនៅកម្ពុជា ពិតជាបានចូលរួមចំណែកយ៉ាងសំខាន់ក្នុងការជំរុញការនាំចេញក្នុងឧស្សាហកម្មកាត់ដេររបស់កម្ពុជា ដែលជាផ្នែកមួយក្នុងការជំរុញកំណើនសេដ្ឋកិច្ចកម្ពុជាផងដែរ។ កម្មករនិយោជិតនិងនិយោជកនៃរោងចក្រកាត់ដេរ ដែលធ្វើការនាំចេញផលិតផលទៅក្រៅប្រទេសបានទទួលនូវអត្ថប្រយោជន៍ជាច្រើនអំពីការអនុវត្តគម្រោងនេះ ដោយអាចរក្សាបាននូវការងារដែលមានលក្ខខណ្ឌល្អប្រសើរនិងទទួលប្រាក់ចំណេញអាជីវកម្មតាមរយៈការទទួលបានការបញ្ជាទិញពីអ្នកបញ្ជាទិញអន្តរជាតិ ដែលមានកំណើនជាប្រចាំជាមួយនឹងអនុលោមភាពតាមច្បាប់មានកម្រិតខ្ពស់។

លោករដ្ឋមន្ត្រី បញ្ជាក់បន្ថែមថា ជាក់ស្តែងគម្រោងរោងចក្រកាន់តែប្រសើរនៅកម្ពុជា គឺជាយន្តការបន្ថែមលើយន្តការអធិការកិច្ចការងាររបស់ក្រសួងការងារ និងបណ្តុះបណ្តាលវិជ្ជាជីវៈ ក្នុងការចូលរួមលើកកម្ពស់លក្ខខណ្ឌការងារក្នុងវិស័យកាត់ដេរ។ បច្ចុប្បន្ន ក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងដាក់ឱ្យដំណើរការសាកល្បងនូវរបបស្វ័យប្រកាសអធិការកិច្ចការងារតាមប្រព័ន្ធស្វ័យប្រវត្តិកម្ម សម្រាប់រោងចក្រ សហគ្រាសផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប ដែលជាចំណុចរបត់ថ្មីមួយនៅក្នុងប្រព័ន្ធអធិការកិច្ចការងារ។ ជាមួយគ្នានេះដែរ ក្រសួងការងារ និងបណ្តុះបណ្តាលវិជ្ជាជីវៈ នឹងដាក់ឱ្យដំណើរការ ការធ្វើអធិការកិច្ចរួមគ្នារវាងអធិការការងារ និងគម្រោងរោងចក្រកាន់តែប្រសើរនៅកម្ពុជា ចំពោះរោងចក្រផលិតផលិតផលធ្វើដំណើរនិងការបូបនៅក្នុងឆ្នាំ២០២២។

គួរបញ្ជាក់ថា​ តាមរយៈកិច្ចសហប្រតិបត្តិការយ៉ាងជិតស្និទ្ធនិងការផ្លាស់ប្តូរបទពិសោធន៍ការងារ ព្រមទាំងការកសាងសមត្ថភាព របស់អធិការការងារនិងអ្នកវាយតម្លៃអនុលោមភាពការងារ ពិតជាបានជះឥទ្ធិពលវិជ្ជមានចំពោះការពង្រឹងការអនុវត្តលក្ខខណ្ឌការងារ និងការកសាងវប្បធម៌អនុលោមភាពនៅតាមរោងចក្រ សហគ្រាសជាទូទៅ។ លោករដ្ឋមន្ត្រី ស្នើសុំការបន្តសហការឱ្យកាន់តែជិតស្និទ្ធពីគ្រប់ភាគីពាក់ព័ន្ធ ដើម្បីអនុវត្តគម្រោងរោងចក្រកាន់តែប្រសើរនៅកម្ពុជា និងកសាងវប្បធម៌អនុលោមភាពការងារនៅកម្ពុជា សំដៅជំរុញកំណើនក្នុងវិស័យវាយនភណ្ឌ សម្លៀកបំពាក់ និងផលិតផលិតផលធ្វើដំណើរ និងកាបូប៕ដោយ​៖សហការី

​