ភ្នំពេញ ៖ ជនជាប់ចោទចំនួន១១នាក់ ពាក់ព័ន្ធសំណុំរឿងព្រហ្មទណ្ឌជាប់ចោទពី បទ “ដឹកនាំកូដកម្ម និងអំពើចូលរួមក្នុង អំពើកូដកម្ម” ត្រូវបានតុលាការសម្រេច ផ្ដន្ទាទោស៧ឆ្នាំទៅ២០ឆ្នាំ ក្នុងនោះមាន លោកមាជ សុវណ្ណារ៉ា ដែលជាគណ កម្មការនាយក ទទួលបន្ទុកព័ត៌មានវិទ្យា របស់គណបក្សសង្គ្រោះជាតិ និងជាប្រធាន គេហទំព័រខ្មែរប៉ុស្ដិ៍ ។
លោកកែវ សុជាតិ ព្រះរាជអាជ្ញារង អមសាលាដំបូងរាជធានីភ្នំពេញបានឱ្យ អ្នកកាសែតដឹងថា ជនជាប់ចោទ៣នាក់ គឺឈ្មោះមាជ សុវណ្ណារ៉ា , អឿ ណារិន និង ឈ្មោះឃិន រឿន ត្រូវបានសម្រេចផ្ដន្ទា ទោសដាក់ពន្ធនាគារចំនួន២០ឆ្នាំ ។ ដោយឡែកជនជាប់ចោទ៨នាក់ទៀត ត្រូវបាន ផ្ដន្ទាទោសដាក់ពន្ធនាគាររយៈពេល៧ឆ្នាំ ។
ជនជាប់ចោទទាំង១១នាក់ត្រូវបានបញ្ជូនខ្លួនទៅពន្ធនាគារព្រៃស កាលពីវេលាម៉ោង៤រសៀល ថ្ងៃទី២១ ខែកក្កដា ឆ្នាំ២០១៥ បន្ទាប់តុលាការសាកសួរ យ៉ាងលម្អិតពេញមួយថ្ងៃ ហើយជនជាប់ ចោទសុទ្ធតែមានពិរុទ្ធភាពក្នុងបទល្មើស ដឹកនាំកូដកម្ម និងអំពើចូលរួមក្នុងអំពើ កូដកម្ម ទើបតុលាការសម្រេចផ្ដន្ទា ទោសដាក់ពន្ធនាគារសាជាថ្មី ។
គួររំលឹកថា ជនជាប់ចោទទាំង១១ នាក់ក្នុងសំណុំរឿងព្រហ្មទណ្ឌនេះ មានដូច តទៅ៖ ១-ឈ្មោះ មាជ សុវណ្ណារ៉ា,២-អឿ ណារិន , ៣-ឃិន រឿន , ៤-នាង សុឃុន ៥-សាន គឹមហេង , ៦-ស៊ុំ ពុទ្ធី ,៧- កែ ឃឹម , ៨-ទេព ណារិន , ៩- អាន បឋម ១០-សាន សីហៈ និង១១-អ៊ុក ពេជ្រ សំណាង ។ ជនជាប់ចោទទាំងអស់នេះ បានចូលរួមធ្វើកូដកម្មបង្កឱ្យមានអំពើ ហិង្សាដែលបណ្ដាលឱ្យក្រុមសណ្ដាប់ធ្នាប់ សាលាខណ្ឌដូនពេញជាច្រើននាក់បានរងរបួសយ៉ាងធ្ងន់ធ្ងរ៕ សុខខេមរា
