ខេត្តកំពង់ស្ពឺ ÷នៅថ្ងៃទី១១ ខែវិច្ឆិកា ឆ្នាំ២០២១បញ្ជាការដ្ឋានយោធភូមិភាគទី៣ បានប្រារព្ធពិធីសំណេះសំណាល បំពាក់ឋានន្តរស័ក្តិ ជូនយោធិនចូលនិវត្តន៍ តាមកងឯកភាព ចំណុះយោធភូមិភាគទី៣ ដែលត្រូវផ្ទេរចេញពីក្របខ័ណ្ឌក្រសួងការពារជាតិ ឆ្នាំ២០២១ មានចំនួន ៥៩នាក់ ក្រោមអធិបតីភាព ឧត្តមសេនីយ៍ឯក យឿង សុខុន មេបញ្ជាការរង កងទ័ពជើងគោក មេបញ្ជាការ យោធភូមិភាគទី៣ តំណាងដ៏ខ្ពង់ខ្ពស់ ឧត្តមសេនីយ៍ឯក ហ៊ុន ម៉ាណែត អគ្គ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងមានការអញ្ជើញចូលរួមពី មេបញ្ជាការរង នាយសេនាធិការរង នាយការិយាល័យ និងមេបញ្ជាការអង្គភាពចំណុះ យោធភូមិភាគ។
ឧត្ដមសេនីយ៍ឯក យឿង សុខុន បានថ្លែងអំណរគុណយ៉ាងជ្រាលជ្រៅបំផុតចំពោះគុណបំណាច់យ៉ាងធំធេង របស់នាយទាហាន នាយទាហានរង ចូលសោធននិវត្តន៍ ដែលបានធ្វើពលិកម្មយ៉ាងច្រើន ក្នុងការបំពេញភារកិច្ចកន្លងមក ចាប់ពីរំដោះប្រទេសជាតិ និងទប់ស្កាត់ការវិលត្រឡប់របបប្រល័យពូជសាសន៍ ជាពិសេសបានចូលរួមយ៉ាងសកម្ម ជាប្រតិបត្តិករនយោបាយ ឈ្នះ-ឈ្នះ ដែលបាននាំមកនូវសុខសន្តិភាព និងការឯកភាពជាតិពេញលេញនាពេលនេះ។ គំរូវីរភាពដ៏ល្អផូរផង់នេះនឹងបានដិតជាប់ក្នុងក្រឳបេះដូងអ្នកជំនាន់ក្រោយយ៉ាងពិតប្រាកដ។ ថ្វីត្បិត អស់ លោក លោកស្រី បានចេញពីជួរកង យោធពលខេមរភូមិន្ទ ផ្ទេរទៅក្រសួងសង្គមកិច្ចអតីតយុទ្ធជន និងយុវនីតិសម្បទាក៏ដោយ ក៏ប្រមុខរាជរដ្ឋាភិបាលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅតែបន្តយកចិត្តទុកដាក់គិតគូរជួយដោះស្រាយគ្រប់កាល:ទេស:ដល់បងប្អូនអតីតយុទ្ធជនជានិច្ច។
ឧត្តមសេនីយ៍ឯក យឿង សុខុន ក៏បានផ្តាំផ្ញើដល់នាយទាហាន នាយទាហានរង ទៅរស់នៅមូលដ្ឋានសូមថែរក្សាសុខភាពជាចម្បង និងអនុវត្តតាមវិធានការរបស់ក្រសួងសុខាភិបាល ជាពិសេសអនុវត្តតាមវិធានការរបស់សម្តេចតេជោ ៣កុំ ៣ការពារ ដើម្បីចៀសឆ្ងាយពីជំងឺកូវីដ-១៩ សុំបងប្អូនចូលរួមថែរក្សាសុខសន្តិភាព ស្ថិរភាព ចូលរួមចំណែកអនុវត្តគោលនយោបាយភូមិឃុំមានសុវត្ថិភាព។
ក្នុងឱកាសនេះ ឧត្តមសេនីយ៍ឯកក៏បានផ្តល់កិត្តិយសបំពាក់ឋានន្តរស័ក្តិ និងប្រគល់ថវិការបស់ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក ជូនដល់យោធិនចូលនិវត្តន៍ ដោយក្នុងម្នាក់ៗទទួលបានថវិកា ចំនួន ៤០០,០០០រៀល អង្ករ ២៥គីឡូក្រាម អាវ ១ សៀវភៅ ប៊ិក១ ក្នុងនោះលោកអភិបាលរងខេត្ត សរ សុពុត្រា បានឧបត្ថម្ភបន្ថែម ២លានរៀល និងកងកិត្តិយសត្រែទ័ព ១លានរៀលផងដែរ៕
ដោយ អ៊ុក ស៊ុនហេង
