ខេត្តបន្ទាយមានជ័យ៖ នេះបេីយោងតាមការបញ្ជាក់ពីលោក ស សុខា រដ្ឋលេខាធិការក្រសួងអប់រំយុវជន និងកីឡា នៅរសៀលថ្ងៃព្រហស្បតិ៍ទី១៨ ខែវិច្ឆិកា ឆ្នាំ២០២១នេះ បានឱ្យដឹងថា នៅព្រឹកមិញនេះ លោករួមជាមួយភរិយា និងលោក ខេង ស៊ុម ប្រធានក្រុមប្រឹក្សាខេត្តបន្ទាយមានជ័យ ,លោក អ៊ុំ រាត្រី អភិបាល នៃគណៈអភិបាលខេត្ត បានចូលរួមជាគណៈអធិបតីពិធីសម្ពោធដាក់ឱ្យប្រើប្រាស់នូវវិថី លោក ស សុខា និងលោកស្រី កែ សួនសុភី និងសមិទ្ធផលនានា ក្នុងសាកលវិទ្យាល័យជាតិមានជ័យ ។
សមិទ្ធផលនានាដែលដាក់សម្ពោធនាឱកាសនោះរួមមាន៖ វិថី លោក ស សុខា និងលោកស្រី កែ សួនសុភី ធ្វើពីបេតុង មានប្រវែង ១៨១,៣ម៉ែត្រ ទទឹង ១២ម៉ែត្រ, ផ្លូវបេតុង ១ខ្សែ ប្រវែង ១៦០ម៉ែត្រ ទទឹម ៦ម៉ែត្រ, តារាងបាល់ទាត់ស្តង់ដា, សាលប្រជុំធំ, ដំបូលបណ្ណាល័យ, បុស្បុកព្រះបាទជ័យវរ្ម័នទី៧, រូបសំណាកសម្តេចព្រះសង្ឃរាជ ជួន ណាត, អាងហែលទឹក, សួនសាមគ្គី, បង្គោលភ្លើងសឡា, របងថ្មអគារអន្តេវាសិកដ្ឋាននារី, ស្រះចិញ្ចឹមត្រី, ខ្លោងទ្វារ និងស្លាកឈ្មោះ ដែលចំណាយអស់ថវិកាសរុប ចំនួន ២៦៧ ៨៦៣(ពីរសែនប្រាំមួយម៉ឺនបីពាន់ប្រាំបីរយហុកសិបបីដុល្លារសហរដ្ឋអាមេរិក) ។
សមិទ្ធផលទាំងនេះ កសាង និងជួសជុលឡើងដើម្បីអភិវឌ្ឍហេដ្ឋារចនាសម្ព័ន្ធ បង្កើនសោភ័ណភាព និងបំពេញតម្រូវការរបស់សិស្ស និស្សិត ដែលបាននិងកំពុងសិក្សា និងមានបំណងចូលសិក្សានៅសាកលវិទ្យាល័យជាតិមានជ័យ ដែលជាសាកលវិទ្យាល័យរដ្ឋតែមួយគត់ក្នុងទឹកដីខេត្តបន្ទាយមានជ័យ ។
ទន្ទឹមនោះដែរ សាកលវិទ្យាល័យជាតិមានជ័យ ក៏បាននិងកំពុងបន្តកសាង ជួសជុល និងកែលម្អហេដ្ឋារចនាសម្ព័ន្ធផ្សេងៗទៀត កែទម្រង់កម្មវិធីសិក្សា គុណភាពសិក្សា ផ្លាស់ប្តូរបទពិសោធន៍សិក្សាជាមួយសាកលវិទ្យាល័យដៃគូ ទាំងក្នុង និងក្រៅប្រទេស អភិវឌ្ឍសមត្ថភាពរបស់និស្សិត ដើម្បីឆ្លើយតបទៅនឹងតម្រូវការទីផ្សារការងារក្នុងពេលបច្ចុប្បន្ន និងអនាគត៕
ដោយ៖សហការី
