ភ្នំពេញ៖ នៅទីស្នាក់ការសាខាកាកបាទក្រហមកម្ពុជា រាជធានីភ្នំពេញ នាព្រឹកថ្ងៃទី២៤ ខែវិច្ឆិកា ឆ្នាំ២០២១នេះ បានរៀបចំកិច្ចប្រជុំជាមួយអ្នកសារព័ត៌មាន ស្តីពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ និងរបៀបរាយការណ៍ ក្រោមអធិបតីភាព លោក ជិន ប៊ុនធឿន នាយកប្រតិបត្តិសាខា ដែលកិច្ចប្រជុំនេះរៀបចំឡេីងដោយយោងតាមអនុស្សារណៈនៃការយោគយល់គ្នារវាងសាខាកាកបាទក្រហមកម្ពុជា រាជធានីភ្នំពេញ និងអង្គការសកម្មភាពដេីម្បីកុមារ ស្តីពី ការចូលរួមសកម្មភាពមនុស្សធម៌នៅព្រះរាជាណាចក្រកម្ពុជា ។ កិច្ចប្រជុំនេះក៏មានការចូលរួមពី លោក លោកស្រីជាអ្នកសារព័ត៌មានមកពីតាមស្ថាប័នអង្គភាពចំនួន៧ សរុបចំនួន១២នាក់ ។
នាឱកាសនោះ លោក ជិន ប៊ុនធឿន បានពាំនាំមកនូវការផ្តាំផ្ញើសាកសួរសុខទុក្ខពីលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ និងជាពិសេសពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនអ្នកសារព័ត៌មានទាំងអស់ប្រកបដោយក្តីនឹករលឹក ។
លោក ជិន ប៊ុនធឿន បានលេីកឡេីងថា៖ ដោយបច្ចុប្បន្នបច្ចេកវិជ្ជាមានការរីកចម្រេីន ការប្រេីប្រាស់ប្រព័ន្ធអុីនធេីណេតអនឡាញមានគ្រប់ទិសទី ជាពិសេសក្នុងស្រទាប់យុវវ័យ កុមារ ក្នុងនោះក៏យើងមិនអាចដឹងថាការប្រើប្រាស់បានត្រឹមត្រូវ រឺមួយក៏មិនត្រឹមត្រូវអាចចាញ់បោកជនខិលខូចដែលមានបំណងមិនល្អអូសទាញកុមារ យុវវ័យឲ្យលង់ និងជឿតាមការលួងលោមដោយរូបភាពណាមួយ ដូចនេះហើយទើបថ្ងៃនេះសាខាកាកបាទក្រហមកម្ពុជារាជធានីភ្នំពេញ បានសហការជាមួយអង្គការសកម្មភាពដេីម្បីកុមារ រៀបចំកិច្ចប្រជុំនេះឡេីងដេីម្បីពិភាក្សា ចែករំលែកបទពិសោធន៍ និងបង្កេីនការយល់ដឹងអំពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ និងយន្តការរាយការណ៍តាមប្រព័ន្ធអុីនធឺណិត (Internet Hotline) ជាមួយបងប្អូនអ្នកសារព័ត៌មាន ដែលជាអ្នកផ្សព្វផ្សាយយ៉ាងសំខាន់ ក្នុងការបញ្ច្រាបទៅកាន់មហាជនគ្រប់ស្រទាប់ សំដៅរួមគ្នាបង្ការកុមារ យុវវ័យពីហានិភ័យនានាតាមប្រព័ន្ធអនឡាញ ។
សូមបញ្ជាក់ថា៖ ក្នុងកិច្ចប្រជុំនេះបានលេីកយកប្រធានបទមកពិភាក្សា និងចែករំលែករួមមាន៖
- ការយល់ដឹងពីការកេងប្រវ័ញ្ចតាមប្រព័ន្ធអនឡាញ (និយមន័យ ស្ថានភាព និងកត្តាបង្កហានិភ័យ)
- ទម្រង់នៃការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ និងកលល្បិចលួងលោមរបស់ជនសង្ស័យ
- ប្រវត្តិបណ្តាញរាយការណ៍ពិសេសតាមអុីនធឺណិត
- ហេតុអ្វីអ្នកត្រូវរាយការណ៍ករណីសង្ស័យនៃការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ?
- តេីត្រូវរាយការណ៍ដោយរបៀបណា?
- តេីការរាយការណ៍របស់អ្នកនឹងត្រូវឆ្លេីយតបដោយរបៀបណា?
- សំណួរ និងចំលេីយ ៕
ដោយ៖សហការី
