អ្នកប្រដាល់ វី សុភ័ស ឈ្នះជើងឯក គូដណ្តើមប្រាក់លានUltimate Boxing Championship 2021

ចែករំលែក៖

ភ្នំពេញ៖ បើយោងតាមផេកផ្លូវការ ( Cambodia SEA GAMES 2023) CAMSOC និងប្រភពរូបភាព៖ #YuenPunlue ជាមួយពាក្យស្លោក #យើងនាំគ្នាឆ្ពោះទៅស៊ីហ្គេម_អាស៊ានប៉ារ៉ាហ្គេម_ឆ្នាំ២០២៣_ទាំងអស់គ្នា
#កីឡារស់ក្នុងសន្ដិភាព_SPORTS_LIVE_IN_PEACE នៅព្រឹកថ្ងៃទី២៩ ខែវិច្ឆិកា ឆ្នាំ២០២១ បានបញ្ជាក់អោយដឹងថា, អ្នកប្រដាល់ វី សុភ័ស បានឈ្នះជើងឯក គូដណ្តើមប្រាក់លាន វគ្គផ្តាច់ព្រ័ត្រ ក្រោយយកឈ្នះអ្នកប្រដាល់ ទូច ដេវីត នៅវគ្គផ្តាច់ព្រ័ត្រ កាលពីយប់ថ្ងៃទី២៨ ខែវិច្ឆិកា ឆ្នាំ២០២១ នៅក្នុងព្រឹត្តិការណ៍កីឡាប្រដាល់សកល Ultimate Boxing Championship 2021 សប្តាហ៍ទី៦ ដែលជាសប្តាហ៍បញ្ចប់ប្រចាំឆ្នាំ២០២១។

អ្នកប្រដាល់ វី សុភ័ស ជាកីឡាករមកពីក្លិបប្រដាល់នាយកដ្ឋានអង្គរក្ស និងអ្នកប្រដាល់ ទូច ដេវីត មកពីក្លិបអារុណរះកីឡា ដែលអ្នកទាំងពីរគឺជាសមាជិកក្រុមជម្រើសជាតិប្រដាល់សកលកម្ពុជាដូចគ្នា។ នៅក្នុងការប្រកួតដ៏ជក់ចិត្ត នៅវគ្គផ្តាច់ព្រ័ត្រនេះ វី សុភ័ស ប្រជែងបានម្ចាស់ជើងឯកគូដណ្តើមប្រាក់លាន ក្នុងប្រភេទទម្ងន់ ៦៣,៥គីឡូក្រាម ដោយទទួលបានប្រាក់រង្វាន់ចំនួន ៣លានរៀល ខនឲណៈជើងឯករង ទូច ដេវីត ទទួលបាន ប្រាក់រង្វាន់ ១លានរៀល។

ម្ចាស់ជ័យលាភី វី សុភ័ស និយាយក្រោយបញ្ចប់ការប្រកួតថា ការប្រកួតនេះពិតជាស្វិតស្វាញណាស់ ជាពិសេសចាប់ពីទឹកទី២ទៅ ទូច ដេវីត បានព្យាយាមវាយបកយ៉ាងខ្លាំងក្លា ប៉ុន្តែ សុភ័ស ព្យាយាមគេច ហើយប្រើបច្ចេកទេសវាយឆ្មក់ចំៗគោលដៅ ដោយធ្វើឲ្យរូបគេទទួលបានពិន្ទុ និងឈ្នះជើងឯកនៅវគ្គផ្តាច់ព្រ័ត្រនេះតែម្តង។ «ប្រាក់រង្វាន់៣លានរៀលនេះ ខ្ញុំសន្សំទុកសម្រាប់ខ្លួនឯងខ្លះ និងយកទៅជួយម៉ែខ្ញុំខ្លះ សម្រាប់ជីវភាព។ ខ្ញុំពិតថា ការប្រកួតនេះពិតជាសំខាន់សម្រាប់ខ្ញុំ ដែលមិនត្រឹមតែដណ្តើមបានប្រាក់រង្វាន់លើកទឹកចិត្តប៉ុណ្ណោះទេ ប៉ុន្តែថែមទាំងចំណេញបានទាំងបច្ចេកទេសកាន់តែច្រើន ព្រោះការហ្វឹកហាត់ក្នុងក្រុមជម្រើសជាតិកាន់តែល្អ គឺដោយសារមានការប្រកួតកាន់តែច្រើន បន្ថែមបាននូវគុណភាពបច្ចេកទេសកាន់តែខ្ពស់ រួមទាំងបទពិសោធន៍លើសង្វៀនផងដែរ»។

លោក ប៊ុយ សុភ័ណ្ឌ អគ្គលេខាធិការ សហព័ន្ធកីឡាប្រដាល់សកលកម្ពុជាបានលើកឡើងថា នេះជាសប្តាហ៍ទី៦ និងជាសប្តាហ៍ចុងក្រោយ នៃ ព្រឹត្តិការណ៍ Ultimate Boxing Championship 2021 ដែលជាគោលដៅបង្កើនបច្ចេកទេសឆ្ពោះទៅប្រជែងមេដាយ ស៊ីហ្គេម ២លើកចំពោះមុខនោះ គឺយើងអាចវាយតម្លៃជារួមថា វាការជោគជ័យដ៏ត្រចេះត្រចង់។ អ្វីទទួលបានពីការខិតខំរៀបចំការប្រកួតនេះ គឺទី១ យើងទទួលបានអត្ថប្រយោជន៍នៃការពង្រឹងកម្រិតបច្ចេកទេសរបស់កីឡាករជម្រើសជាតិ ត្រៀមទៅចូលរួមប្រកួតជើងឯកថ្នាក់ជាតិនាថ្ងៃទី២៣-២៦ ខែធ្នូ ឆ្នាំ២០២១។ ទី២ គឺជួយជំរុញឲ្យក្រុមជម្រើសជាតិកាន់តែមានបច្ចេកទេសគ្រប់គ្រាន់ ត្រៀមឆ្ពោះទៅចូលរួមប្រកួតប្រជែងមេដាយ ក្នុងស៊ីហ្គេម លើកទី៣១ នៅប្រទេសវៀតណាម នាខែឧសភា ឆ្នាំ២០២២។

អគ្គលេខាធិការរូបនេះបន្ថែមទៀតថា ទាក់ទងនឹងការផ្សព្វផ្សាយនៃព្រឹត្តិការណ៍នេះគឺទទួលបានការគាំទ្រកាន់តែច្រើន តាមរយៈការទស្សនាការផ្សាយផ្ទាល់លើផេកផ្លូវការរបស់សហព័ន្ធកីឡាប្រដាល់សកលកម្ពុជា និងផេកដៃគូមួយចំនួនទៀត។ នេះក៏ជាចំណុចដ៏ល្អមួយទៀត ដែលបណ្តាស្ថានីយទូរទស្សនានាបានចាប់អារម្មណ៍លើការដាក់បញ្ជូលនូវប្រភេទកីឡាប្រដាល់សកល នៅក្នុងកម្មវិធីប្រកួតប្រដាល់គុនខ្មែរប្រចាំសប្តាហ៍របស់ខ្លួន ដោយទាំងអស់នេះ គឺជាសមិទ្ធផលថ្មីៗបន្ថែម ដែលសហព័ន្ធកីឡាប្រដាល់សកលកម្ពុជាទទួលបាន ពីការរៀបចំ Ultimate Boxing Championship 2021 ជាលើកដំបូងនេះ។

ជាមួយគ្នានេះមន្ត្រីបច្ចេកទេសក៏ទទួលបាននូវបទពិសោធន៍ថ្មីៗពីការរៀបចំ ការផ្គូផ្គងកីឡាករ កីឡាការិនី ដោយសារប្រភេទកីឡាប្រដាល់សកលមិនទាន់សម្បូរបែបនូវធនធានច្រើនហូរហៀរនៅឡើយ ដូច្នេះចាប់ពីឆ្នាំ២០២២តទៅ លោក ប៊ុយ សុភ័ណ្ឌ បានដាក់ក្តីសង្ឃឹមខ្ពស់ក្នុងការធ្វើឲ្យព្រឹត្តិការណ៍បន្ថែមនេះកាន់តែរីចកម្រើន និងទទួលបានការគាំទ្រពីមហាជន ក្រៅអំពីការប្រកួតជើងឯកថ្នាក់ជាតិ ប្រចាំឆ្នាំ ដែលប្រើប្រាស់កញ្ចប់ថវិកាជាតិ គាំទ្រដោយក្រសួងអប់រំ យុវជន និងកីឡា៕

...

ដោយ : សិលា

ចែករំលែក៖
ពាណិជ្ជកម្ម៖
ads2 ads3 ambel-meas ads6 scanpeople ads7 fk Print