ខេត្តបាត់ដំបង៖ រសៀលថ្ងៃទី ០៩ ខែមេសា ឆ្នាំ ២០១៦ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចុះពិនិត្យការដ្ឋានសាងសង់ទំនប់ពហុបំណង ស្ថិតក្នុងឃុំផ្លូវមាស ស្រុករតនមណ្ឌល ខេត្តបាត់ដំបង ។

ថ្លែងនៅក្នុងឱកាសចុះពិនិត្យការងារ លោករដ្ឋមន្ត្រី បានមានប្រសាសន៍ថា ដូចអ្វីដែលយើងបានគ្រោងទុក មកដល់ពេលនេះ ការងារសាងសង់ទំនប់ពហុបំណង សម្រេចបានប្រមាណ ៨៨ ភាគរយ ហើយគ្រោងនឹងបញ្ចប់នៅអំឡុងខែមីនា ឆ្នាំ ២០១៧ ខាងមុខ ។ លោករដ្ឋមន្ត្រីបន្តថា នៅលើដងស្ទឹងសង្កែ យើងបានសាងសង់សំណង់កាត់ស្ទឹងកង្ហត រួចហើយ ។ ឆ្នាំនេះ ប្រសិនបើគ្មានសំណង់កង្ហតទេ អ្នកក្រុងបាត់ដំបងទាំងមូល គ្មានទឹកប្រើប្រាស់ទេ បច្ចុប្បន្ន គឺបានទឹកដែលទម្លាក់ពីទំនប់កង្ហតនេះហើយ យកទៅផ្គត់ផ្គង់ក្រុងបាត់ដំបង តំបន់តាមដងស្ទឹងសង្កែ និងតំបន់មួយចំនួនទៀត ។

សូមរំលឹកជូនថា គម្រោងទំនប់ពហុបំណងនេះ សាងសង់ឡើងក្រោមហិញ្ញប្បទានពីសាធារណរដ្ឋប្រជាមានិតចិន ។ ក្រោយពេលសាងសង់រួច ទំនប់ពហុបំណង នឹងមានលទ្ធភាពស្តុកទឹកបានប្រមាណ ២៨៦ លានម៉ែត្រគូប ដែលអាចផ្តល់ទឹកសម្រាប់ការស្រោចស្រពលើផ្ទៃដីស្រូវវស្សា ចំនួន ៤៧.០០០ ហិកតា និងស្រូវប្រាំង ចំនួន ១២.០០០ ហិកតា នៅក្នុងស្រុករតនមណ្ឌល បាណន់ សង្កែ និងស្រុកមោងឫស្សី ។ ទំនប់នេះ ក៏អាចទាញយកថាមពលវារីអគ្គិសនីបាន ចំនួន ១៣,២០ មេហ្គាវ៉ាត់ ព្រមទាំងផ្តល់ទឹកសម្រាប់ការប្រើប្រាស់ ដល់ក្រុងបាត់ដំបង ផងដែរ ៕​

ដោយ៖ សុខ​ ខេមរា