ខេត្តកំពង់ធំ៖ ករណីចោរលួច ប្លន់ ល្បែងស៊ីសង និងកន្ទុយលេខ ស្រុកបារាយណ៍ ត្រូវបានជាប់ចំណាត់ថ្នាក់លេខ១ ក្នុងខេត្តកំពង់ធំ ដោយសារតែ ដែលប្រជាពលរដ្ឋមានការភិតភ័យ និងព្រួយបារម្ភពីទ្រព្យសម្បត្តិ ដែលមានករណី លួចប្លន់ និងល្បែងស៊ីសងជាបន្តបន្ទាប់ ។
ជាក់ស្តែងកាលពីយប់ថ្ងៃសៅរ៍ ទី១៨ ខែកក្កដា ឆ្នាំ២០១៥ មានករណីចោរចូលលួចគាស់ បន្ទប់ការិយាល័យ របស់វិទ្យាល័យកំពង់ថ្ម លួចបានម៉ាស៊ីកុំព្យូទ័រចំនួន១០គ្រឿង ហើយលោកចោរបានដឹកជញ្ជូនយកទៅដោយសុវត្ថិភាព មិនរំខានដល់សមត្ថកិច្ចប៉ុស្តិ៍រដ្ឋបាលកំពង់ថ្ម ស្ថិតនៅឃុំកំពង់ថ្ម ស្រុកសន្ទុក ខេត្តកំពង់ធំឡើយ។
សូមបញ្ជាក់ថា ចំណុចទីតាំងដែលក្រុមចោរធ្វើសកម្មភាពលួចនេះស្ថិតនៅព្រំប្រទល់ ស្រុកបារាយណ៍ និងស្រុកសន្ទុក ។
តាមការឲ្យដឹងពីគ្រូប្រចាំសាលាវិទ្យាល័យកំពង់ថ្ម បានឲ្យដឹងថា ថ្ងៃចោរចូលធ្វើសកម្មភាព លួចសម្ភារការិយាល័យរបស់សាលាវិទ្យាល័យកំពង់ថ្មនេះ គឺជាយប់ថ្ងៃសៅរ៍ ចំថ្ងៃដែលពុំមានមនុស្សយាមកាម ដែលជា ថ្ងៃសម្រាក់ តែមិននឹកស្មានថា ក្រុមចោរទាំងនេះមាន ជំនាញខាងលួចទ្រព្យសម្បត្តិ និងគាស់ផ្ទះសំបែង ប្រជាពលរដ្ឋ បានយកទឹកមេអាស៊ីដចាក់ចូលរន្ធសោរ ធ្វើឲ្យសោររលួយធ្លាក់ចេញ ហើយក្រុមចោរទាំងនេះ បានប្រមូលសម្ភារៈរបស់សាលាដែលមានតម្លៃទៅដោយរលូន ។
លោក ឈុមោះ តុបធារិទ្ធ នាយកសាលាវិទ្យាល័យកំពង់ថ្ម បានឲ្យដឹងថា នៅក្នុងបន្ទប់ទុកកុំព្យួទ័រមានចំនួន២៦គ្រឿងតែចោរយកអស់១០គ្រឿង និងជាអំណោយរបស់ក្រសួង បានចែកអោយសម្រាប់បង្ហាត់បង្រៀនសិស្ស ចំណែកសម្ភារផ្សេងៗពុំមានបាត់ទេ គាត់បានសំណូមពរឲ្យសមត្ថកិច្ច ជួយស្រាវជ្រាវរក ជនសង្ស័យដែល បានយកម៉ាស៊ីនកុំព្យូទ័រទៅលក់ផង ដើម្បីផ្តន្ទាទោសតាមផ្លូវច្បាប់ ៕ ប៊ុនរិទ្ធី
