ភ្នំពេញ៖ តារាសម្តែងស្រីល្បីឈ្មោះខាងសម្តែងជាតួលោក ជំទាវ កញ្ញា ហេងស្រីពេជ្រកាន់តែតែរីកមុខរីកមាត់ក្រោយពេលដែលនាងបានចូលរួមសម្តែងខ្សែភាពយន្តជាច្រើនបន្តបន្ទាប់។ ថ្មីៗនេះនឹងទើបនឹងទទួលបានការសម្តែងខ្សែភាពយន្តភាគ និងខ្សែភាពយន្តខ្នាតធំប្រមាណជិត១០រឿងក្នុងពេលតែមួយ។

ការទទួលបានការងារសិល្បៈជាច្រើនបន្តបន្ទាប់នេះត្រូវបានគេដឹងថាក្រោយពីស្ថានីយទូរទស្សន៍ក្នុងស្រុកបានចាប់ផ្តើមផលិតខ្សែភាពយន្តសម្រាប់ចាក់បញ្ចាំងក្នុងម៉ោងមាស។ ជារឿងនឹកស្មានមិនដល់សម្រាប់ហេង ស្រីពេជ្រ ដែលទទួលបានឱកាសសម្តែងខ្សែភាពយន្តជាច្រើនរឿងបន្តបន្ទាប់គ្នា។ មានខ្សែភាពយន្តជាច្រើនរឿងហើយដែលតារាសម្ដែង កញ្ញា ហេង ស្រីពេជ្រ បានសម្ដែង ដោយរឿងទាំងនោះ តារាស្រីសំបូរសាច់រូបនេះ ត្រូវបានអ្នកដឹកនាំតម្រូវឲ្យដើរតួអ្នកមានដូចជា អ្នកចងការប្រាក់ ម្ដាយ បងស្រី ថៅកែស្រីពិសេសជាលោក ជំទាវជាដើម។

ខ្សែភាពយន្តជាង១០រឿងត្រូវបាននាងចូលរួមសម្តែងនៅដើមឆ្នាំនេះហើយក្នុងនោះមួយចំនួនធំកំពុងសំរុកក្នុងការផលិតដើម្បីចាក់បញ្ចាំងលើកញ្ចក់ទូរទស្សន៍ និងរោងភាពយន្តក្នុងពេលខាងមុខ មានដូចជារឿង “ជើងខ្លាំង” របស់ផលិតកម្ម KH រឿង “នំប៉័ងសុបិន្តស្នេហ៍” របស់ស្ថានីយទូរទស្សន៍ CTN រឿង “ជំពាក់ចិត្តព្រោះស្រលាញ់” របស់ស្ថានីយទូរទស្សន៍ណ 8HD រឿង “ខ្សែកពេជ្រ” របស់ផលិតកម្ម Rock រឿង”ហង្សបាក់ស្លាប” របស់ទូរទស្សន៍ប៉ុស្តិ៍លេខ៥ រឿង “ទឹកកន្លះក្អម” រឿង “បំណុលប្រាក់ជំពាក់ស្នេហ៍” “ចំណាព្រហ្មលិខិត”…។ ទោះ បីជាមានឱកាសបានថតជាច្រើនរឿងយ៉ាងណាក្ដី ប៉ុន្តែ តារាស្រីម្នាក់នោះមិនធ្លាប់បានក្ដាប់បានតំណែងតួឯកម្ដងណាឡើយ ភាគច្រើន នៃការសម្ដែងរបស់នាងត្រូវបានអ្នកដឹកនាំលើកនាងជាតួសំខាន់នៅ ក្នុងរឿង។ នាងថាយ៉ាងណាសប្បាយចិត្តដែលផលិតកម្មជាច្រើននៅក្នុងស្រុកហៅនាងថតស្ទើររកពេលសម្រាកគ្មាននោះ។ នាងថា ការតស៊ូអស់ជាច្រើនឆ្នាំរបស់នាងពេលនេះគឺពិតជាទទួលបានលទ្ធផលល្អប្រសើរ។ តារាស្រីវ័យ៣១ឆ្នាំរូបនេះបញ្ជាក់ថានាងបញ្ជាក់ដែរថា ពិតជាមានការលំបាកច្រើនក្នុងការលែលកពេលវេលានៃការសម្តែងធ្វើឲ្យយ៉ាងឲ្យការសម្តែងនោះមិនជាន់ពេលគ្នា។

នាងថា គ្រប់ផលិតកម្មសុទ្ធតែជជែកគ្នាបានច្បាស់លាស់អំពីពេលវេលាសម្តែងមុនពេលចុះកិច្ចសន្យា នេះមិនទាន់គិតដល់ការសម្តែងឈុតផ្សព្វផ្សាយពាណិជ្ជកម្ម និងសម្តែងក្នុងបទចម្រៀងមួយចំនួនផងដែរ។  ទោះបីជាទទួលបានលទ្ធផលល្អនេះក្តីក៏នាងបញ្ជាក់ថាមិនទាន់បោះបង់ការព្យាយាមប្រឹងប្រែងនៅឡើយព្រោះនាងត្រូវការអ្នកគាំទ្រនាងកាន់តែច្រើនជាងនោះ។

តារាស្រីសម្បុរសរូបនេះបានបន្ថែមទៀតថា ទីផ្សារសិល្បៈហាក់កាន់តែមានការមមាញឹកចាប់ពីដើមឆ្នាំ ២០១៥ មកម្ល៉េះហើយកាន់តែខ្លាំងឡើងក្រោយពីទូរទស្សន៍ក្នុងស្រុកចាប់ផ្តើមផលិតរឿងផ្ទាល់ខ្លួននោះ។

ជុំវិញរឿងរ៉ាវស្នេហាវិញតារាស្រីមានប្រភពមកពីខេត្តកំពង់ឆ្នាំងរូបនេះអះអាងថា មិនទាន់ជួបបុរសដែលត្រូវចិត្តនៅឡើយ ព្រោះនាងត្រូវមើលឲ្យច្បាស់មុនពេលសម្រេចចិត្តទទួលយកស្នេហាខណៈដែលកន្លងមកនាងធ្លាប់រងរបួសស្នេហ៍ម្តងហើយដែរ ប៉ុន្តែនាងក៏កំពុងបើកបេះដូងទទួលយកបុរសស្មោះស្មេហ៍ផងដែរ៕

ដោយ៖ វឌ្ឍនា