ខេត្តកំពងឆ្នាំង៖ ចោរស្រីដៃឆើតម្នាក់ត្រូវប្រជាពលរដ្ឋនៅក្នុងផ្សារលើចាប់ប្រគល់ទៅឲ្យសមត្ថកិច្ច ក្រោយពីជនសង្ស័យរូបនេះបានធ្វើសកម្មភាពលូកយកលុយពីក្នុងកាបូបរបស់ប្រជាពលរដ្ឋនៅក្នុងផ្សារលើ  ។ ការចាប់បាននេះកាលពីវេលាម៉ោង ៨ និង៣០នាទីព្រឹក ថ្ងៃទី១០ ខែមេសា ឆ្នាំ២០១៦ នៅក្នុងផ្សារលើ ក្នុងភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង ។

សមត្ថកិច្ចបានឲ្យដឹងថា ជនសង្ស័យដែលប្រជាពលរដ្ឋចាប់បានក្នុងពេលធ្វើសកម្ម ភាពលួចលុយពីក្នុងកាបូបនេះ មានឈ្មោះម៉ៃ គន្ឋា អាយុ២១ឆ្នាំ មានទីលំនៅ ភូមិតង់ខៀវ  ឃុំភ្នំបាត ស្រុកពញ្ញាឮ  ខេត្តកណ្តាល ។

សមត្ថកិច្ចបានឲ្យដឹងទៀតថា នៅមុនពេលកើតហេតុ ស្រ្តីដែលជាជនសង្ស័យបានជិះរថយន្តតាក់ស៊ី ពីស្រុកឧត្តុង្គ ខេត្តកំពង់ស្ពឺ បានចុះនៅផ្សារលើ នៃខេត្តកំពង់ឆ្នាំង ពេលដែលចូលក្នុងផ្សារ នៅពេលដែលឃើញឱកាសល្អ បានធ្វើសកម្មភាពលួចតែម្តង ក្នុងពេលធ្វើសកម្មភាពនោះប្រជាពលរដ្ឋឃើញទាន់បានចាប់ ប្រគល់ឲ្យសមត្ថកិច្ចតែម្តង ។

នៅចំពោះសមត្ថកិច្ចជនសង្ស័យបានសារភាពថាខ្លួនបានធ្វើសកម្មភាពលួចយកលុយពីក្នុងកាបូបរបស់ប្រជាពលរដ្ឋក្នុងផ្សារពិតប្រាកដមែន ។ សមត្ថកិច្ចបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ឆ្នាំងដើម្បីចាត់ការបន្តតាមនីតិវិធី  ៕

ដោយ៖ ចន្ថា