ភ្នំពេញ៖ កាលពីព្រឹកថ្ងៃទី១១ ខែមេសា ឆ្នាំ២០១៦ សាលាខណ្ឌដូនពេញបានរៀបចំពិធីសូត្រមន្តចំរើនព្រះបរិត្តអបអរក្នុងឱកាសបុណ្យចូលឆ្នាំថ្មីប្រពៃណីជាតិដែលនឹងឈានមកដល់នេះក្រោមវត្តមានលោក គួច ចំរើនអភិបាលនៃគណៈអភិបាលខណ្ឌដូនពេញ និងលោក ហែម អាន ប្រធានក្រុមប្រឹក្សាខណ្ឌ អភិបាលរង ចៅសង្កាត់ទាំ១១ និងលោក-លោកស្រីប្រធានផ្សារទាំង៣នៅក្នុងមូលដ្ឋាន ព្រមទាំងមន្ត្រីរាជការការិយាល័យក្រោមចំណុះជុំវិញសាលាខណ្ឌជាច្រើនទៀតចូលរួមយ៉ាងច្រើននាក់ផងដែរ។

ក្នុងពិធីនោះដែរថ្នាក់ដឹកនាំខណ្ឌដូនពេញ និងមន្ត្រីក្រោមឱវាទទាំងអស់ក៏បាននិមន្តព្រះសង្ឃសូត្រមន្ត និងរាប់បាត្រព្រមទាំងបួងសួងដល់វត្ថុស័ក្តិសិទ្ធិក្នុងលោកមានទេវតារក្សាឆ្នាំថ្មី ឆ្នាំវកជាដើមនោះ សូមជួយប្រោះព្រហ្មសេរីសួស្តីជ័យមង្គលអាយុយឺនយូរឈ្នះរោគាទាំងឡាយ និងបួងសួងសុំសេចក្តីសុខគ្រប់ៗគ្នា។

បន្ទាប់ពីពិធីសូត្រមន្តចំរើនព្រះបរិត្តរួចហើយលោក គួច ចំរើន អភិបាលខណ្ឌដូនពេញ និងលោកស្រីព្រមទាំងមន្ត្រីក្រោមឱវាទទាំងអស់គ្នាក៏បានប្រគេនទេយ្យវត្ថុ និងបច្ច័យដល់ព្រះសង្ឃចំនួន៤១អង្គដែលនិមន្តមកពីវត្តនានាចំនួន៧វត្ត ដែលស្ថិតនៅក្នុងខណ្ឌដូនពេញប្រកបទៅតាមគន្លងប្រពៃណីព្រះពុទ្ធសាសនា ហើយមុននឹងបញ្ចប់កម្មវិធីក៏មានរបាំត្រុដិមករាំជូនពរ និងដេញឧបទ្រពចង្រៃពីឆ្នាំចាស់នាំមកវិញនូវសិរីសួស្តីជ័យមង្គលសម្រាប់ឆ្នាំថ្មីនេះដល់លោកអភិបាល និងមន្ដ្រីនៅក្រោមឱវាទទាំងអស់ទទួលបានជោគជ័យក្នុងការងារតទៅទៀត៕

ដោយ៖ ស ដារ៉ា