ខេត្តក្រចេះ៖ ជនជាប់សង្ស័យលើករណីឃាតកម្ម វាយសម្លាប់ស្ត្រីរងគ្រោះវ័យ២៣ឆ្នាំ ប៉ងរំលោភសេពសន្ថវៈ បានសារភាពនៅមុខសមត្ថកិច្ចថា រូបគេពិតជាបានវាយសម្លាប់ស្ត្រីរងគ្រោះ ដោយមួលនិងអារ ក សម្លាប់ ពិតមែន ហើយបានអូសសាកសពទម្លាក់ចូលទឹកស្រះ ។
ក្រោយពីជនជាប់សង្ស័យបានសារភាពហើយនោះ នៅល្ងាចថ្ងៃទី១០ ខែមេសា នគរបាលព្រហ្មទណ្ឌខេត្ត បាននាំខ្លួនជននេះ មកធ្វើត្រាប់ពីសកម្មភាព ដែលរូបគេបានវាយសម្លាប់ ដោយមួលនិងអារ ក នៅចំនុចឡឥដ្ឋក្នុងភូមិថ្មគ្រែ ឃុំថ្មគ្រែ ស្រុកចិត្របុរី ខេត្តក្រចេះ ក្រោយពីជននេះប៉ងរំលោភសេពសន្ថវៈលើនារីរងគ្រោះមិនបានសម្រេច ។
ជនសង្ស័យ ឈ្មោះ ចែម ចយ អាយុ២០ឆ្នាំ រស់នៅភូមិឬស្សីចារ ឃុំថ្មគ្រែ ស្រុកចិត្របុរី បាននិយាយទៀតថា នៅយប់ថ្ងៃកើតហេតុ វេលាម៉ោងជាង៨យប់ ថ្ងៃទី៩ខែមេសា ខណៈដែលនារីរងគ្រោះ ឈ្មោះ សោម ចិន្តា អាយុ២៣ឆ្នាំ រស់នៅភូមិកើតហេតុខាងលើ បានដើរឆ្លងកាត់កន្លែងជននេះធ្វើការ ណាមួយយប់ស្ងាត់ផងនោះ ជននេះបានចាប់នារីរងគ្រោះអូសចូលក្នុងរោងឡឥដ្ឋ ប៉ងរំលោភសេពសន្ថវៈ តែដោយសារនារីរងគ្រោះរើបម្រាស់និងស្រែកឱ្យគេជួយផងនោះ ជននេះក៏បានមួល ក សម្លាប់នារីរងគ្រោះតែម្តងទៅ។
ជននេះបានបន្តប្រាប់សមត្ថកិច្ចទៀតថា ក្រោយពីបានមួល ក សម្លាប់ស្ត្រីរងគ្រោះហើយនោះ ជននេះក៏បានអូសសាកសពនារីរងគ្រោះទៅក្បែរស្រះទឹកមួយនៅខាងក្រោយឥដ្ឋ រួចបានយកកូនកាំបិទ មកអារ ក សពនារីរងគ្រោះបន្ថែម ព្រោះខ្លាចនារីរងគ្រោះមិនស្កាប់ ហើយបានរុញសាកសពទម្លាក់ចូលក្នុងទឹកស្រះតែម្តង ។
លោក ហ៊ួត លឹមហ៊ាង នាយការិយាល័យព្រហ្មទណ្ឌកំរិតធ្ងន់ខេត្តក្រចេះ បានឱ្យដឹងថា ក្រោយពីកើតហេតុ កម្លាំងជំនាញការិយាល័យព្រហ្មទណ្ឌកំរិតធ្ងន់ខេត្ត បានចុះមកពិនិត្យនិងស្រាវជ្រាវ នៅកន្លែងកើតហេតុ រហូតឈានទៅដល់ការចាប់ឃាត់ខ្លួនជនដៃដល់ ឈ្មោះ ចែម ចយ អាយុ២០ នៅវេលាម៉ោង២ រសៀលថ្ងៃទី១០ខែមេសា ក្រោពីជននេះបានធ្វើសកម្មភាពរួចរយៈពេលជាង១០ម៉ោងរួចមក ។
លោកនាយការរិយាយល័យបានបន្តថា ក្រោយពីចាប់ឃាត់ខ្លួននិងទទួលបានចម្លើយសារភាពហើយនោះ ជននេះត្រូវបាននគរបាលនាំមកកន្លែងកើតហេតុ ដើម្បីឱ្យជននេះធ្វើត្រាប់ពីសកម្មភាពរបស់ខ្លួន ក្នុងករណីអំពើឃាតកម្ម វាយសម្លាប់នារីរងគ្រោះ ដោយមូល ក រួចអារ ក សម្លាប់ នោះ ។
បើតាមអ្នកភូមិបាននិយាយថា ក្រោយពីបាត់ខ្លួនស្ត្រីរងគ្រោះពីផ្ទះមួយយប់ហើយនោះ នៅព្រឹកថ្ងៃទី១០ខែមេសា ជនសង្ស័យឈ្មោះចែមចយ ក៏បានធ្វើជាជួយដើររកនារីរងគ្រោះជាមួយអ្នកភូមិរួមនិងក្រុមគ្រួសារនារីរងគ្រោះផងដែរ តែដោយសារមានការស៊ើបអង្កេតយ៉ាងយកចិត្តទុកដាក់ ឃាត ក ត្រូវបាននគរបាលវែកមុខនិងចាប់ឃាត់ខ្លួន ចំណែកអ្នកភូមិក៏មានការសារទរផងដែរ ។
អ្នកស្រី អ៊ូ គន្ឋា អាយុ៤៣ឆ្នាំ ត្រូវជាម្តាយនារីរងគ្រោះ បានរៀបរាប់ទាំងអួលដើម ក ថា នៅចន្លោះម៉ោងប្រហែល៨យប់ ថ្ងៃទី៩ខែមេសា កូនស្រីរបស់គាត់ បានចេញពីផ្ទះយកឌីសជួលទៅឱ្យគេនៅក្នុងភូមិ ហើយក៏មិនឃើញត្រឡប់កមផ្ទះវិញ ។
អ្នកស្រីបន្តថា ក្រោយពីបាត់កូនស្រីរបស់គាត់អស់ជាច្រើនម៉ោង ក្រុមគ្រួសារគាត់ក៏បានរាយការណ៍ទៅប៉ុស្តិ៍រដ្ឋបាលនគរបាលឃុំថ្មគ្រែ ក្នុងនោះក៏មានអ្នកភូមិរួមនិងរូបគាត់ បាននាំគ្នាដើររកក្នុងព្រៃ និងនៅមាត់ស្រះទឹកខាងក្រោយផ្ទះទាំងយប់តែរកមិនឃើញ ។ រហូតដល់ម៉ោង៩ព្រឹក ថ្ងៃទី១០ខែមេសា នៅតែរកមិនឃើញទៀត ទើបគ្រួសាររបស់គាត់រួមនិងអ្នកភូមិជាច្រើនាក់បានសម្រេចចិត្ត ចុះរាវរកនៅក្នុងស្រះទឹក ក៏ប្រទះឃើញសាកសព្របស់កូនគាត់បង្កឱ្យមានការភ្ញាក់ផ្អើលតែម្តង ៕
ដោយ៖ កោះទ្រុង
