ភ្នំពេញ៖ករណីបាញ់សម្លាប់គ្នានៅខណ្ឌសែនសុខ គឺផ្តើមឡើងពីរឿងខ្ចីម៉ូតូហើយទៅយកបញ្ចាំមិនព្រមសងវិញ ទើបកើតឡើងនូវអំពើបាញ់ប្រហារគ្នាបែបនេះ នេះបើយោងតាមការឲ្យដឹងពីមន្ត្រីនគរបាលព្រហ្មទណ្ឌខណ្ឌសែនសុខប្រាប់ នាថ្ងៃទី១២ ខែមេសា ឆ្នាំ២០១៦។នៅក្នុងករណីនេះសមត្ថកិច្ច តាមស្រាវជ្រាវឃាត់បានជនសង្ស័យ ២នាក់ ទី១ ឈ្មោះ គង់ កុសល ភេទប្រុស អាយុ៣១ឆ្នាំ មុខរបរមិនពិតប្រាកដ ( ជនដៃដល់) និងទី២ ឈ្មោះ គង់ ចាន់សុវណ្ណារ៉ា ភេទប្រុស អាយុ២០ឆ្នាំ មុខរបរមិនពិតប្រាកដ ទាំង២នាក់ត្រូវជាបងប្អូនបង្កើតនិងគ្នា ស្នាក់នៅផ្ទះជួលភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ដកហូតកាំភ្លើងខ្លី ១ដើម ម៉ាក រ៉ូឡូ និងគ្រាប់ ៣គ្រាប់ ។
មន្ត្រីនគរបាលព្រហ្មទណ្ឌខណ្ឌសែនសុខប្រាប់ឲ្យដឹងថា ករណីប្រើប្រាស់អាវុធខ្លីបាញ់សម្លាប់មនុស្សនេះបានកើតឡើង កាលពីវេលាម៉ោង២ និង០០នាទី រំលងអាធ្រាត្រឈាន ចូលថ្ងៃទី១១ ខែមេសា ឆ្នាំ២០១៦ នៅចំណុចផ្លូវលំ ក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ដែលមានជនរងគ្រោះឈ្មោះ ឆាយ ចិន្តា ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅផ្ទះលេខ៤៩B ផ្លូវ១៣៣៩ សង្កាត់ផ្សារដេប៉ូ២ ខណ្ឌទួលគោក រងរបួសធ្ងន់ ត្រូវបានស្លាប់នៅក្នុងមន្ទីរពេទ្យព្រះកុសម: ក្រោយដឹកបញ្ជូនទៅដល់មន្ទីរពេទ្យ ។ ក្រោយពីកើតហេតុជនសង្ស័យទាំង២នាក់បងប្អូន បានរត់គេចខ្លួនបាត់ស្រមោល ប៉ុន្តែដោយមានការដឹកនាំបញ្ជាផ្ទាល់ពីលោកវរសេនីយ៍ឯក ម៉ក់ ហុង អធិការ នៃអធិការដ្ឋាននគរបាលខណ្ឌសែនសុខ ជនសង្ស័យទាំង២នាក់ ត្រូវសមត្ថកិច្ចបង្ក្រាបបាន កាលពីវេលាម៉ោង ១០ និង៥០នាទី ថ្ងៃទី១១ ខែមេសា ឆ្នាំ២០១៦ នៅចំណុចផ្លូវបេតុង ក្បែរសាលាសង្កាត់ទឹកថ្លា ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ។
មន្ត្រីនគរបាលព្រហ្មទណ្ឌខណ្ឌសែនសុខប្រាប់បន្តឲ្យដឹងថា មុនពេលកើតហេតុ ជនរងគ្រោះឈ្មោះ ឆាយ ចិន្តា បានខ្ចីម៉ូតូ ម៉ាក Today ពណ៍ក្រហម គ្មានស្លាកលេខ ពីជនសង្ស័យឈ្មោះ គង់ ចាន់សុវណ្ណារ៉ា ខណៈបានម៉ូតូហើយជនរងគ្រោះបែរជាយកបញ្ចាំទៅដោយឮបែបនេះជនសង្ស័យឈ្មោះ គង់ ចាន់សុវណ្ណារ៉ា ក៏បានមកជួបជនរងគ្រោះសួរនាំ អំពីរឿងនេះ ប៉ុន្តែត្រូវបានជនរងគ្រោះប្រាប់ថា រូបគេនិងយកម៉ូតូប្រគល់ឲ្យវិញនាថ្ងៃទី១០ ខែមេសា ឆ្នាំ២០១៦ លុះដល់រហូតដល់ថ្ងៃកំណត់ជនរងគ្រោះនៅតែមិនឃើញមកម៉ូតូប្រគល់ឲ្យវិញ ទើបជនសង្ស័យទាំង២នាក់បងប្អូនដែលទើបតែចេញពីកន្លែងផឹកបានជិះម៉ូតូ តាមរកជនរងគ្រោះឃើញនៅចំណុចកន្លែងហ្គេមបាញ់ត្រី ស្ថិតក្នុងភូមិត្រពាំងឈូក សង្កាត់ ទឹកថ្លា ខណ្ឌសែនសុខ ក៏បង្កជាជម្លោះរហូតឈានដល់ការបាញ់ប្រហារជនរងគ្រោះតែម្តង បណ្តាលឲ្យរងរបួសធ្ងន់ ត្រូវបានស្លាប់នៅក្នុងមន្ទីរពេទ្យព្រះកុសម: ក្រោយពេលដឹកបញ្ជូនទៅដល់មន្ទីរពេទ្យ។
ដោយឡែកលោកវរសេនីយ៍ឯក ម៉ក់ ហុង អធិការ នៃអធិការដ្ឋាននគរបាលខណ្ឌសែនសុខប្រាប់ឲ្យដឹងថា នៅក្នុងករណីនេះជនសង្ស័យប្រើប្រាស់អាវុធខ្លី ម៉ាក រ៉ូឡូ បាញ់ចំនួន ៥គ្រាប់ ប៉ុន្តែត្រូវជនរងគ្រោះតែ ១គ្រាប់ប៉ុណ្ណោះ ចំពោះជនរងគ្រោះធ្លាយមកខាងក្រោយ ទើបបណ្តាលឲ្យស្លាប់បែបនេះ ។ ចំណែកជនសង្ស័យជនសង្ស័យទាំង២នាក់បងប្អូន ក្រោយពីបង្កហេតុបានរត់គេចខ្លួនបាត់ស្រមោល ប៉ុន្តែដោយមានការស្រាវជ្រាវតាមជំនាញ ជនសង្ស័យទាំង២នាក់ ត្រូវបង្ក្រាបបាន កាលពីវេលាម៉ោង ១០ និង៥០នាទី ថ្ងៃទី១១ ខែមេសា ឆ្នាំ២០១៦ នៅចំណុចផ្លូវបេតុង ក្បែរសាលាសង្កាត់ទឹកថ្លា ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ព្រមទាំងរកឃើញវត្ថុតាងកាំភ្លើងខ្លី ម៉ាក រ៉ូឡូ ១ដើម និងគ្រាប់ ចំនួន ៣គ្រាប់ នាវេលាម៉ោង ១៧ និង០០នាទី ល្ងាចថ្ងៃខែដដែល នៅចំណុចគំនរសំរាមខាងក្រោយផ្ទះជួលជនសង្ស័យ ដែលត្រូវជនសង្ស័យយកទៅផ្លុងចោល ដើម្បីបំបាត់ភស្តុតាង។
លោកវរសេនីយ៍ឯក ម៉ក់ ហុង ប្រាប់បន្តឲ្យដឹងថា ជនសង្ស័យទាំង២នាក់ ត្រូវបាន កម្លាំងរបស់លោកកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ នាព្រឹកថ្ងៃទី១៣ ខែមេសា ឆ្នាំ២០១៦ ដើម្បីផ្តន្ទាទោសតាមនីតិវិធី។
ពាក់ព័ន្ធទៅនិងករណីត្រូវបានប្រភពច្បាស់ការលួចប្រាប់ឲ្យដឹងថា ជនសង្ស័យឈ្មោះ គង់ កុសល ភេទប្រុស អាយុ៣១ឆ្នាំ ( ជនដៃដល់) គឺជាខ្លាស នៃអង្គភាពប្រឆាំងអំពើភារវកម្ម ។ ចំណែកជនសង្ស័យឈ្មោះ គង់ ចាន់សុវណ្ណារ៉ា និងជនរងគ្រោះ ឈ្មោះ ឆាយ ចិន្តា ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅផ្ទះលេខ៤៩B ផ្លូវ១៣៣៩ សង្កាត់ផ្សារដេប៉ូ២ ខណ្ឌទួលគោក គឺជាមិត្តភក្រ័និងគ្នា ហើយក៍ជាអ្នកប្រើប្រាស់គ្រឿងញៀនប្រចាំនៅតំបន់ភូមិត្រពាំងឈូក សង្កាត់ទឹកថ្លា ខណ្ឌសែនសុខផងដែរ ។ ដោយឡែកជនរងគ្រោះឈ្មោះ ឆាយ ចិន្តា ក៏ធ្លាប់ត្រូវបានក្រុមគ្រួសារនាំយកទៅមណ្ឌលក្រែប្រែគ្រឿងញៀនចំនួន ៤លើកផងដែរ៕

តុង សីហា