ខេត្តពោធិ៍សាត់៖ ថ្ងៃទី១២ ខែមេសា មានករណីគ្រោះថ្នាក់ចរាចរណ៏២លើកផ្សេងគ្នា បណ្ដាលឲ្យមនុស្សម្នាក់បានស្លាប់ភ្លាមៗ និងរបួស៣នាក់ នៅខេត្តពោធិ៍សាត់ ។
ហេតុការណ៏នេះនគរបាលស្រុកបាកានប្រាប់ថា នៅល្លាចថ្ងៃទី១២ ខែមេសា ឆ្នាំ២០១៦ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ២០២-២០៣ ស្ថិតក្នុងភូមិក្រោលក្របី ឃុំត្រពាំងជង ស្រុកបាកាន មានករណីគ្រោះថ្នាក់ចរាចរណ៍១លើក រវាងម៉ូតូម៉ាកហុងដា ឌ្រីមសេ១២៥ ពណ៍ខ្មៅ ពាក់ស្លាកលេខ បន្ទាយមានជ័យ ១J-៧៧៣៤ បណ្ដាលឲ្យអ្នកធ្វើដំណើររួមគ្នា៣នាក់រងរបួសធ្ងន់ និងរថយន្តម៉ាកហុកឡ ពណ៍ខៀវ ពាក់ស្លាកលេខ ឆ ៨៦០៥ ភព ២ របស់ក្រុមហ៊ុនរដ្ឋករទឹកស្អាតស្រុកបាកាន។
នគរបាលស្រុកបន្តថា ការគ្រោះថ្នាក់ខាងលើនេះ ខណៈកំពុងធ្វើដំណើរបញ្ចស់ទិសគ្នា ប៉ន្ដែគេមិនបានបញ្ជាក់ថា ទិសពីណាទៅណានោះទេ ហើយរងគ្រោះរបួសខាងភាគីម៉ូតូទាំង៣នាក់ ហើយគេបានបញ្ជូនទៅសង្គ្រោះនៅមន្ទីរពេទ្យឯកជន ចំណែកវត្ថុតាងម៉ូតូ និងរថយន្តសមត្តកិច្ចយកទៅរក្សាទុកនៅប៉ុសិ៍តនគរបាលរដ្ឋបាលត្រពាំងជង រង់ចាំដោះស្រាយគ្នាតាមផ្លូវច្បាប់ ។
ដោយឡែកនគរបាលស្រុកកណ្ដៀងបានឲ្យដឹងដែរថា នៅវេលាម៉ោង៧និង៣០នាទីយប់ ថ្ងៃដដែល ត្រង់ចំណុចក្បែរវត្តកញ្ជរខាងត្បូង ស្ថិតក្នុងភូមិផ្លូវលួង ឃុំកញ្ជរ ស្រុកកណ្ដៀង មានករណីគ្រោះថ្នាក់ចរាចរណ៍១លើកដែរ បង្កឡើងដោយគោយន្តកន្ត្រៃបើកចុះជុំរាលស្ពានបណ្ដាលឲ្យក្រឡាប់សង្កត់អ្នកបើកបរស្លាប់ម្នាក់ ។
នគរបាលស្រុកបន្តថា ជនរងគ្រោះឈ្មោះ សយ ពៅ ភេទប្រុស អាយុ៣៣ឆ្នាំ រស់នៅភូមិចំបក់ធំ ឃុំត្នោតជុំ ស្រុកក្រគរ ខេត្តពោធិ៍សាត់ ក្រោយសមត្តកិច្ចពិនិត្យសាកសពរួចរាល់ប្រគល់ឲ្យសេចញាតិចាត់ចែងតាមប្រពៃណី ៕
ដោយ៖ ប៉ឹម ពិន
