ក្រុមភ្ញៀវ Napoli ត្រូវប្រឈមមុខនឹងក្រុមម្ចាស់ផ្ទះសេះបង្កត់ Juventus ដែលស្ថិតក្នុងទម្រង់លេងដែលមិនធ្លាប់ចាញ់ក្នុងការប្រកួត Serie A ចំនួន៥ប្រកួត នៅរាត្រីថ្ងៃព្រហស្បតិ៍ក្នុងកីឡដ្ឋាន Allianz ។

Napoli ឈរនៅលេខរៀងទី៣ មាន៣៩ពិន្ទុ តាមពីក្រោយក្រុមលេខ១ Inter Milan ចំនួន៧ពិន្ទុ។ ចំណែកក្រុម Juventus ឈរ​លេខរៀងទី​៥ មាន៣៤​ពិន្ទុ​ កំពុង​ប្រជែងកៅអី Champions League ដែលបច្ចុប្បន្នឈ្នះតែ២ពិន្ទុប៉ុណ្ណោះពីក្រុមលេខ៦ Roma ។

ការប្រកួតក្របខ័ណ្ឌ Serie A ចុងក្រោយរបស់ក្រុម Napoli បានយកឈ្នះ ១-០ លើក្រុម Spezia នៅកីឡដ្ឋាន Stadio Diego Armando Maradona។ រីឯ Juventus បានឈ្នះការប្រកួតចុងក្រោយរបស់ពួកគេក្នុងក្របខ័ណ្ឌ Serie A ដែរក្នុងលទ្ធផល ២-០ នៅលើទឹកដីខ្លួនឯងទល់នឹងក្រុម Cagliari ដែលបន្តការមិនស្គាល់ចាញ់របស់ពួកគេដល់ទៅ៥ប្រកួត (ឈ្នះ៤, ស្មើ១) ។

នៅពេលដែលក្រុមទាំង២ជួបគ្នាចុងក្រោយក្នុងការប្រកួត Serie A ក្រុម Napoli បានយកឈ្នះ ២-១ នៅកីឡដ្ឋាន Stadio Diego Armando Maradona ក្នុងខែកញ្ញា។ ពេលនោះកីឡាករ Matteo Politano បើកការស៊ុតបញ្ចូលទីនៅនាទីទី៥៧ និង Kalidou Koulibaly រកបានគ្រាប់ទី២ ខណៈដែលកីឡាករ Morata រកបាន១គ្រាប់ឲ្យ Juventus នៅនាទីទី១០។

សម្រាប់ឆ្នាំ២០២១-២០២២ កីឡាករឆ្នើមមុខគេក្នុងជួរខ្សែប្រយុទ្ធរបស់ Napoli គឺកីឡាករ Piotr Zielinski, Dries Mertens និង Fabián Ruiz ដែលម្នាក់ៗរកបាន៥គ្រាប់។ ចំណែកក្រុម Juventus វិញមានកីឡាករឆ្នើមៗដូចជា Morata, Paulo Dybala និង Juan Cuadrado ជាកីឡាករលេចធ្លោនិងតែងតែរកគ្រាប់បាល់ក្នុងការប្រកួត។ Morata និង Dybala គឺជាអ្នកស៊ុតបញ្ចូលទីច្រើនជាងគេដែលរកបាន៥គ្រាប់តាមពីក្រោយដោយ Cuadrado រកបាន៤គ្រាប់។

ការប្រកួតក្នុងទឹកដីនៅកីឡដ្ឋាន Allianz ក្នុងរដូវកាលនេះ Juventus ទទួលបាន១៦ពិន្ទុ (ឈ្នះ៥, ស្មើ១ និងចាញ់៣) លើការប្រកួតក្របខ័ណ្ឌ Serie A ចំនួន៩។ ចំណែកក្រុម Napoli ឈ្នះ​៦ ស្មើ​២ និង​ចាញ់១​នៅ​ក្នុង​រដូវ​កាល​នេះ​ក្នុង​ការ​ប្រកួត​លីក។ ក្នុង​ការ​ប្រកួត​លីក​៦​លើក​ចុង​ក្រោយ​ក្រុម Juventus ឈ្នះ​៤ ស្មើ​១ និង​ចាញ់​១ ខណៈដែលក្រុម Napoli ឈ្នះ​២ ស្មើ​១ និង​ចាញ់​៣ ​ក្នុង​៦​ប្រកួត​ចុងក្រោយដូចគ្នា ៕ (រូបភាព ៖ soccerway.com)