ខេត្តកំពង់ធំ៖ មន្ត្រីសង្កាត់រដ្ឋបាលព្រៃឈើ ក្រយា សហការជាមួយ មន្ត្រីនៃផ្នែករដ្ឋបាល ព្រៃឈើកំពង់ថ្ម និងមន្ត្រីគម្រោងរ៉េដបូកទំរីង រួមជាមួយកម្លាំងតំបន់ប្រតិបត្តិការ សឹករងកំពង់ធំ នៅថ្ងៃទី៨ ខែមករា ឆ្នាំ២០២២ បានចុះប្រតិបត្តិការ បង្ក្រាបបទល្មើសព្រៃឈើ ក្នុងតំបន់បុស្បូវ ស្ថិតក្នុងឃុំបឹងល្វា ស្រុកសន្ទុក ខេត្តកំពង់ធំដែលជាការបំផ្លាញព្រៃឈើទ្រង់ទ្រាយធំ។
សមត្ថកិច្ចដែលចទៅបង្រ្កាបបានឲ្យដឹងថា ប្រតិបត្តិការនេះកម្លាំងចម្រុះបានចាប់ឃាត់នៃការធ្វើសន្និធិឈើ ហ៊ុបមូល ប្រភេទ សុក្រំ និងស្វាយព្រៃ ចំនួន ៨ កំណាត់ ស្មើនឹង ៤,២៤៨ ម៉ែត្រគូប ខណៈដែលជនខិលខូច បានលួចកាប់បំផ្លាញ នឹងប្រុងដឹកជញ្ជូនចេញពីព្រៃទៅកាន់ខេត្តដទៃ ។
ការបង្ក្រាបនេះ ធ្វើឡើងខណៈ សមត្ថកិច្ច បានទទួលព័ត៌មាននិងបានជួបប្រទះទីតាំង កាប់រាននៅចំណុចខាងលើ ហើយថែមទាំងដកហូតបាន រណារយន្ត ចំនួន ២ គ្រឿង ប៉ុន្តែជនល្មើស បានរត់គេចខ្លួនបាត់អស់។
វត្ថុតាងទាំងនេះ ត្រូវបានកម្លាំងចម្រុះប្រមូលយក ទៅរក្សាទុក នៅទីស្នាក់ការសង្កាត់ រដ្ឋបាលព្រៃឈើ ក្រយា អូរកំពប់អំបិល ស្ថិតនៅភូមិកំពប់អំបិល ឃុំបឹងល្វា ស្រុកសន្ទុក ខេត្តកំពង់ធំ ដើម្បីកសាងនិតិវិធី។ ចំពោះជនសង្ស័យវិញ សមត្ថកិច្ច កំពុងស្វែងរកចាប់ខ្លួន យកមយកមកផ្តន្ទាទោសតាមច្បាប់ឲ្យខាងតែបាន៕
ដោយ÷ប្រាថ្នា
