ខេត្តក្រចេះ៖ ការផ្ដល់ជំនាញវិជ្ជាជីវៈដល់និស្សិតនារីមុស្លិមកម្ពុជា និងបានចូលរួមកាត់បន្ថយភាពក្រីក្រ នៅសហគមន៍ជនបទព្រោះថា ការផ្ដល់ជំនាញវិជ្ជាជីវៈជូនពួកគេ ពិតជាបានផ្ដល់លទ្ធភាពឲ្យនិស្សិតនៅសហគមន៍មានជំនាញច្បាស់លាស់ យកទៅប្រកមុខរបរ ធ្វើអាជីវកម្ម ផ្នែកកាត់ដេរនិងរកចំណូលមកផ្គត់ផ្គង់ជីវភាពគ្រួសារបានងាយស្រួល និងរស់នៅក្នុងសហគមន៍ប្រកបដោយសុខដុមរមនា និងបានចូលរួមកាត់បន្ថយភាពក្រីក្រតាមយុទ្ធសាស្រ្ដចតុកោណរបស់រាជរដ្ឋាភិបាលកម្ពុជាលោក សុះមុះសិន រដ្ឋលេខាធិការក្រសួងធម្មការ និងសាសនា និងជាប្រធានសមាគមនិស្សិតមុស្លិមកម្ពុជា បានបញ្ជាក់បែបនេះ ក្នុងឱកាសដែលលោកចូលរួម ពិធីបិទវគ្គបណ្តុះបណ្តាលវិជ្ជាជីវៈកាត់ដេរសម្លៀកបំពាក់ជូននារីមុស្លីមជានិស្សិតចំនួន១២០នាក់ នៅសហគមន៍ ឃុំពង្រ ស្រុកឆ្ឆូង ខេត្តក្រចេះ កាលពីថ្ងៃទី១៨ មេសា ឆ្នំា ២០១៦ ។
លោក សុះ មុះសិន បានបញ្ជាក់ថា រាជរដ្ឋាភិបាលកម្ពុជា តែងតែយកចិត្ដទុកដាក់ និងគិតគូរពីតម្រូវការប្អូនៗ ក្មួយៗ នៅសហគមន៍ជនបទ ពិសេសយកចិត្តទុកដាក់ចំពោះនារីមុស្លិមកម្ពុជា ក្នុងការផ្ដល់ជំនាញ ជួយបណ្តុះបណ្តាលវិជ្ជាជីវៈកាត់ដេរសម្លៀកបំពាក់ ដើម្បីឲ្យប្អូនៗ ក្មួយៗ មានចំណេះវិជ្ជានៅក្នុងខ្លួនសម្រាប់ប្រកបមុខរបររកចំណូលមកផ្គត់ផ្គង់ជីវភាពគ្រួសារនិងសហគមន៍។
លោកបន្តថា កន្លងមកនៅក្នុងស្រុកឆ្លូង ខេត្តក្រចេះ ពុំដែលមានវគ្គបណ្តុះបណ្តាល ឬថ្នាក់បណ្តុះ បណ្តាលវិជ្ជាជីវៈអ្វីនោះទេ ទើបតែរយៈពេលពីរបីឆ្នាំនេះ មានសមាគមនិស្សិតមុស្លិមកម្ពុជា ដោយបានសហការឧបត្ថម្ភពីអង្គការ muslimehelfen អាល្លឺម៉ង់ មកបើកវគ្គបណ្តុះបណ្តាលវិជ្ជាជីវៈកាត់ដេរសម្លៀបំពាក់ ជូនដល់បងប្អូន នៅសហគមន៍ឃុំពង្រ ស្រុកឆ្លូង ខេត្តក្រចេះនេះ ។ ក្នុងវគ្គនីមួយៗ អង្គការ muslimehelfen និងសមាគមនិស្សិតមុស្លិមកម្ពុជា ជាអ្នកធានារាប់រងទាំងស្រុង ចំពោះការចំណាយផ្សេងៗ ពិសេសទីកន្លែងស្នាក់នៅសិក្ខាកាមនារីដែលមកពីភូមិឆ្ងាយៗជុំវិញស្រុក។
លោក សុះ មុះសិន បានបញ្ជាក់ថា វគ្គបណ្តុះបណ្តាលកាត់ដេរនេះបានបើកដំណើរការតាំងពីឆ្នាំ២០០៨ មកម្លេះដូចជានៅទីរួមខេត្តកំពង់ចាម នៅស្រុកត្បូងឃ្មុំ ខេត្តត្បូងឃ្មុំ និងនៅស្រុកឆ្លូង ខេត្តក្រចេះ ដោយបានបណ្តុះបណ្តាលសិក្ខាកាមនារី គិតមកដល់ពេលនេះមានចំនួន ៨៤០នាក់ និងបានប្រគល់ ម៉ាស៊ីនដេរ ដល់សិស្សពូកែ ដែលជាប់ចំណាត់ថ្នាក់ពីលេខ១ ដល់លេខ៥ សរុបចំនួន ៩៧គ្រឿង ។
លោកបន្តថា វគ្គកាត់ដេរនេះដំណើរការទៅបានអាស្រ័យដោយមានការឧបត្ថម្ភ ថវិកាពីអង្គការ muslimehelfen នៃប្រទេសអាល្លឺម៉ង់ តាមរយៈសមាគមនិស្សិតមុស្លិមកម្ពុជា ក្នុងមួយឆ្នាំៗ ប្រមាណជា ១៤,៥៤៥.១៥ដុល្លារអាមេរិក បូករួមនឹងប្រាក់បដិភាគរបស់សមាគមនិស្សិតមុស្លិមកម្ពុជា ៥២៩.៦៣ដុល្លារអាមេរិក ។
ក្នុងឱកាសនេះដែរលោក សុះ មុះសិន ក៍បានផ្តាំផ្ញើរដល់សិក្ខាកាមនិស្សិតជានារីទំាង១២០នាក់នេះ ដែលបានបញ្ចប់វគ្គហើយ ត្រូវខិតខំប្រឹងប្រែងសិក្សា ស្វែងយល់ដោយខ្លួនឯងបន្ថែមទៀត អំពីម៉ូដសម្លៀកបំពាក់ របៀបវ៉ាស់កាត់ និងត្រូវធ្វើយ៉ាងណា អោយ តិថិជន ដែលជាអ្នកមកកាត់សម្លៀកបំពាក់បានសម និងបានស្អាតថែមទៀត ។ ក្រោយពីទទួលបាន ចំណេះដឹង ទាំងទ្រឹស្តី និងការអនុវត្តក្នុងវគ្គបណ្តុះបណ្តាលនេះ រួចមក មានសិក្ខាកាមមួយចំនួនបានចាប់ផ្តើមបើកអាជីវកម្ម កាត់ដេរតាមផ្ទះ នៅទីរួមខេត្ដក្រចេះ និងនៅទីរួមខេត្តកំពង់ចាម និងមួយចំនួនទៀតបានជាប់ទៅធ្វើការងារនៅប្រទេសម៉ាឡេស៊ី លើជំនាញកាត់ដេរ ហើយមួយចំនួនទៀត កំពុងមានគម្រោងបើកហាងនៅផ្ទះរាងៗខ្លួនផងដែរ ។
លោកបន្តថា ក្រោមកិច្ចសហប្រតិបត្តិការ ក្នុងនាមជាដៃគូរអភិវឌ្ឍន៍របស់សមាគមនិស្សិតមុស្លិមកម្ពុជា ជាមួយអង្គការ muslimehelfen ដែលមានទីស្នាក់ការនៅសាធារណៈរដ្ឋសហព័ន្ធអាល្លឺម៉ង់ បានផ្តល់នូវ គំរោងមនុស្សធម៌ ជាច្រើនដល់ប្រជាពលរដ្ឋកម្ពុជា ដោយមិនប្រកាន់និន្នាការនយោបាយ ពូជសាសន៍ សាសនា ជនជាតិឡើយ ។ គំរោងសំខាន់ៗដែលសមាគម បានអនុវត្តនោះ មានជាអាទិ៍ ៖ការ កសាងអគារអន្តេវាសិកដ្ឋានសម្រាប់ និស្សិតនារីមុស្លីមចំនួន០២កន្លែង ដែលមាននិស្សិតនារីមុស្លីមស្នាក់នៅប្រមាណ ២០០នាក់ ដើម្បីបន្តការសិក្សា ថ្នាក់ឧត្តមសិក្សា នៅរាជធានីភ្នំពេញ គំរោងទឹកស្អាតតាមជនបទ ការផ្តល់ប្រាក់កម្ចីឥណទាន ដល់ប្រជាពលរដ្ឋ ខ្មែររស់នៅក្នុងសហគមន៍ខណ្ឌដូនពេញ រាជធានីភ្នំពេញ ការផ្តល់អំណោយសង្គ្រោះបន្ទាន់ ដល់ជនរងគ្រោះ ដោយសារមហន្តរាយណ៍ គ្រោះធម្មជាតិដូចជា ទឹកជំនន់ ខ្យល់ព្យុះ ភ្លើងឆេះផ្ទះ នៅតាមបណ្តាខេត្ត រាជធានី ការផ្តល់អាហារកញ្ចប់ ហ្សាកាត់ និងថវិកាសម្រាប់រៀបចំកម្មវិធីស្រាយបួសក្នុងខែរ៉ាម៉ាឌន កម្មវិធី Qurban វគ្គបណ្តុះបណ្តាលវិជ្ជាជីវៈកាត់ដេរ កុំព្យូទ័រ ភាសារអង់គ្លេស ដោយឥតគិតថ្លៃផងដែរ ៕
ដោយ៖ សំរិត
