ភ្នំពេញ៖ ជនសង្ស័យ៣នាក់ ត្រូវបានកម្លាំងនគរបាលខណ្ឌសែនសុខឃាត់ខ្លួន បន្ទាប់ពីធ្វើការត្រួតពិនិត្យឆែកឆេររកឃើញដែកកែច្នៃសម្រាប់ឆ្កិះសោនៅជាប់ខ្លួនរបស់ពួកគេ។

ហេតុការណ៍កើតឡើង កាលពីវេលាម៉ោង៣យប់រំលងអាធ្រាត្រឈានចូលថ្ងៃទី១៩ ខែមេសា ឆ្នាំ២០១៦ នៅចំណុចផ្លូវលេខ១០០៣ ក្រុមទី៧ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

សមត្ថកិច្ចប្រាប់ឱ្យដឹងថា ជនសង្ស័យទាំង៣នាក់ ដែលត្រូវឃាត់ខ្លួន ទី១-ឈ្មោះ ឌុក ហ័រ ភេទប្រុស អាយុ២៦ឆ្នាំ ជនជាតិខ្មែរ មុខរបរកម្មរសំណង់ ស្នាក់នៅផ្ទះជួលភូមិព្រៃទា សង្កាត់ចោមចៅ ខណ្ឌពោធិសែនជ័យ ទី២-ឈ្មោះ មាស ចំរើន ភេទប្រុស អាយុ៣០ឆ្នាំ ជនជាតិខ្មែរ មុខរបរកម្មករលក់ផ្កា ស្នាក់នៅផ្ទះជួល ភូមិច្រេស សង្កាត់ភ្នំពេញថ្មី ខណ្ឌសែនសុខ និង
ទី៣-ឈ្មោះ ទូច ភាន ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលភូមិព្រៃទា សង្កាត់ចោមចៅ ខណ្ឌពោធិសែនជ័យ សម្ភារដកហូតរួមមាន ម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១០ ឡើងតែមឆ្នាំ២០១៤ ពាក់ស្លាកលេខ កំពង់ធំ 1C-6398 និងដែកកែច្នៃសម្រាប់ឆ្កិះសោ១។

សមត្ថកិច្ចប្រាប់បន្តឱ្យដឹងថា មុនពេលកើតហេតុកម្លាំងល្បាតអន្តរាគមន៍ នៃអធិការដ្ឋាននគរបាលខណ្ឌសែនសុខ បានចុះល្បាតនៅក្នុងមូលដ្ឋាន ដើម្បីការពារមិនឲ្យកើតមានបទល្មើស ខណៈមកដល់ចំណុចកើតហេតុ ស្រាប់តែឃើញជនសង្ស័យទាំង ៣នាក់ ជិះម៉ូតូ ១គ្រឿងឌុបគ្នា ភ្លាមនោះសមត្ថកិច្ចក៏ហៅសាកសួរ និងត្រួតពិនិត្យឆែកឆេរ ឃើញវត្ថុតាងដែកកែច្នៃសម្រាប់ឆ្កិះសោនៅជាប់ខ្លួនរបស់ពួកគេ ទើបកម្លាំងឃាត់ខ្លួនពួកគេតែម្តង។

បច្ចុប្បន្នជនសង្ស័យទាំង៣នាក់ និងវត្ថុតាងបាននាំមកកាន់អធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធី៕

ដោយ៖ តុង សីហា