ខេត្តព្រៃវែង៖ អ្នកស្រុកបាននាំគ្នាផ្អើលទៅចោមរោមមើលក្រុមគ្រួសារមួយដែលបាននិមន្តព្រះសង្ឃ១អង្គមកធ្វើពិធីគាស់ផ្នូរកូនស្រីដើម្បីសូត្រមន្តប្រោះព្រំសពកូនស្រីដែលបានស្លាប់២ថ្ងៃមកហើយឲ្យរស់ឡើងវិញ។
ករណីនេះបានកើតឡើងកាលពីវេលាម៉ោង៧ព្រឹកថ្ងៃទី១៧ ខែមេសា ឆ្នាំ២០១៦ នៅក្នុងផ្ទះស្ត្រីឈ្មោះជួន ហ៊ាន អាយុ៣៧ឆ្នាំ ស្ថិតក្នុងភូមិចំការតាម៉ូយ ឃុំអង្គររាជ្យ ស្រុកព្រះស្តេច ខេត្តព្រៃវែង ។
អ្នកស្រុកដែលផ្អើលទៅចោមរោមមើលរាប់រយនាក់នោះបាននិយាយថា ពួកគាត់មករង់ចាំមើលព្រោះឮតៗគ្នាថាស្ត្រីឈ្មោះជួន ហ៊ាន បានគាស់ផ្នូរយកសពកូនស្រីមកផ្ទះវិញ ហើយបាននិមន្តព្រះសង្ឃ១អង្គព្រះនាម ភារម្យ គង់នៅវត្តកែវម៉ូលីក្នុងខេត្តកណ្តាលមកធ្វើពិធីប្រោះព្រំឲ្យសពកូនរស់ឡើងវិញ។ ដូច្នេះហើយទើបអ្នកស្រុកភ្លូកទឹកភ្លូកដីនាំគ្នាមកចាំមើលព្រោះចង់ឃើញចង់ដឹងថា តើអ្នកដែលស្លាប់២-៣ថ្ងៃមកហើយនោះអាចរស់ឡើងវិញដូចគេថាឬអត់ស្ត្រីឈ្មោះជួន ហ៊ាន បានប្រាប់ឲ្យដឹង ថាកូនស្រីរបស់គាត់ឈ្មោះ បួន គង់ អាយុ១៨ឆ្នាំបានស្លាប់កាលពីរសៀលថ្ងៃទី១៤ ខែមេសា ឆ្នាំ២០១៦ ដោយពុំមានជំងឺអ្វីទាំងអស់នៅសុខៗក៏ទន់ទៅៗហើយបាត់បង់ជីវិតតែម្តង។ លុះស្អែកឡើងថ្ងៃបន្ទាប់ទី១៥ ខែមេសា គាត់និងក្រុមគ្រួសារក៏ធ្វើពិធីបញ្ចុះសពកូនស្រីគឺបញ្ចុះនៅជាប់នឹងផ្ទះតែម្តងដោយផ្នូរធ្វើពីថ្មបេតុងគ្របយ៉ាងស្អាតនិងសរសេរឈ្មោះយ៉ាងត្រឹមត្រូវផង។ លុះមកដល់ថ្ងៃទី១៦ ខែមេសា ស្រាប់តែមិត្តភក្តិប្តីរបស់គាត់ឈ្មោះគា នៅឃុំរកាជួរបានទូរស័ព្ទមកប្រាប់ថា កូនស្រីរបស់គាត់បានទៅពន្យល់សប្តិគាត់ប្រាប់ថាគេមិនទាន់ស្លាប់ទេឲ្យជួយគាស់ផ្នូរយកគេចេញមកវិញផង។
ពេលឮបែបនេះគួបផ្សំនឹងរូបគាត់មិនទាន់អស់អាល័យពីកូនស្រីផងក៏ជឿតាម ហើយចៃដន្យពេលនោះក៏បានជួបព្រះសង្ឃព្រះនាម ភារម្យ អះអាងថា អាចជួយប្រោះព្រំឲ្យកូនស្រីរស់ឡើងវិញបានក៏សម្រេចចិត្តនាំគ្នាគាស់ផ្នូរកូនស្រីទៅ។ ប៉ុន្តែព័ត៌មាននេះគាត់និងក្រុមគ្រួសារមិនបានប្រាប់និងផ្សព្វផ្សាយឲ្យអ្នកខាងក្រៅនិងទេប៉ុន្តែមិនដឹងជាយ៉ាងម៉េចស្រាប់តែមានអ្នកស្រុកផ្អើលភ្លូកទឹកភ្លូកដីមកមើលបែបនេះ
មូលហេតុដែលគាត់ជឿថាកូនស្រីអាចរស់ឡើងវិញបានដោយសារតែកូនស្រីគាត់មានលក្ខណសម្បត្តិអស្ចារ្យខុសពីគេឯងគឺតាំងពីដឹងក្តីមកកូនគាត់មិនដែលហូបអាហារសាច់ទេក្រៅតែពីហូបអាហារបួស។ នៅពេលនាងអាយុបាន៨ឆ្នាំក៏ចេះមើលព្យាបាលជំងឺឲ្យអ្នកស្រុកបានធូរស្បើយគ្រប់ៗគ្នារហូតអ្នកស្រុកឲ្យឈ្មោះថាព្រះនាង។ គាត់រៀបរាប់ទៀតថា មុនពេលស្លាប់កូនគាត់មិនហូបអាហារទេគឺហូបតែផ្កា៧យប់៧ថ្ងៃទើបហូបបាយម្តងដែលជាហេតុភេទដ៏អស្ចារ្យមិនដែលបានឃើញទើបធ្វើឲ្យគាត់ជាម្តាយជឿជាក់ថាកូនស្រីអាចរស់ឡើងវិញបាន។
ទោះជាយ៉ាងណាក៏ដោយកាលពីវេលាម៉ោង២និង៣០នាទីរសៀលថ្ងៃទី១៧ ខែ មេសា ពេលដែលធ្វើសកម្មភាពគាស់គម្របផ្នូរហើយនោះគេបានឃើញសពយុវតីបួនគង់នៅស្ដូកស្ដឹងក្នុងមឈូសដែលមានសភាពហើមនិងមានធុំក្លិនស្អុយទៅហើយហើយក្រុមគ្រួសារក៏សម្រេចបញ្ចុះបិទគម្របមឈូសទៅវិញឲ្យល្អដូចដើម៕
ដោយ៖ សហការី
