ភ្នំពេញ៖ បុរស២នាក់ដែលសមត្ថកិច្ចមូលដ្ឋានអះអាងថា ជាស្ថានទូតវៀតណាម ហើយស្រវឹងស្រាឡើងជោកជាំ បានបើករថយន្តកាមរីឆ្លាមក្នុងល្បឿនយ៉ាងលឿនដូចហោះ ខណៈដល់ផ្លូវបំបែកជាបួនដែលជាកន្លែងកើតហេតុ មិនបន្ថយល្បឿន ក៏ជ្រុលចង្កូតទៅបុករថយន្តឡិចស៊ីសRX400ចំពីចំហៀងខាងក្រោយពេញទំហឹងបណ្ដាលឲ្យក្រឡាប់ផ្ងារជើងមួយចំហៀង តែសំណាងល្អមិនបណ្ដាលឲ្យមនុស្សណាម្នាក់រងរបួសនោះទេ។
ក្នុងហេតុការណ៍គ្រោះថ្នាក់ចរាចរណ៍ខាងលើនេះបានបង្កឲ្យមានការណ៍ភ្ញាក់ផ្អើលដល់ប្រជាពលរដ្ឋរួមទាំងសមត្ថកិច្ចមូលដ្ឋានចុះដល់កន្លែងកើតហេតុ កាលពីវេលាម៉ោង១២ និង២០នាទីរំលងអាធ្រាត្រឈានចូលថ្ងៃទី២០ ខែមេសា ឆ្នាំ២០១៦ នៅតាមបណ្ដោយផ្លូវ១៦៣ កែងនិងផ្លូវ៤៣២ ស្ថិតក្នុងសង្កាត់ទួលទំពូងទី១ ខណ្ឌចំការមន។
យោងតាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើបានប្រាប់ឲ្យដឹងថា នៅមុនពេលកើតហេតុ គឺពួកគាត់បានឃើញរថយន្តបង្កម៉ាកកាមរីឆ្លាម ពណ៌ស្លែ ពាក់ស្លាកលេខCD80.070 ដែលបើកបរដោយបុរស២នាក់ដែលជាស្ថានទូតវៀតណាម ហើយស្រវឹងស្រាឡើងជោកជាំ បានបើករថយន្តក្នុងល្បឿនយ៉ាងលឿនដូបហោះ ក្នុងទិសដៅពីលិចទៅកើត ខណៈមកដល់ចំណុចកើតហេតុដែលជាផ្លូវបែកជាបួនហើយមិនបន្ថយល្បឿនផងនោះ ក៏ជ្រុលទៅបុករថយន្តឡិចស៊ីសRX400 ពណ៌ស្ករ ពាក់ស្លាកលេខភ្នំពេញ2AE-9276 ដែលបើកបរដោយបុរសម្នាក់ក្នុងទិសដៅពីជើងទៅត្បួង ដែលបានបើកបម្រុងនិងឆ្លងជិតផុតទៅហើយនោះ ក៏ត្រូវរថយន្តបង្កបើកបុកចំចហៀងកង់ក្រោយពេញទំហឹងបណ្ដាលឲ្យរថយន្តកាមរីបាឡែនក្រឡាប់ផ្ងារជើងឡើងលើតែម្ដង ហើយរថយន្តបង្កបានរងការខូចខាតខាងមុខទាំងស្រុងផងដែរ៕
ក្រោយពេលកើតហេតុសមត្ថកិច្ចមូលដ្ឋានបានចុះដល់កន្លែងកើតហេតុភ្លាមៗហើយបានឃាត់ខ្លួនម្ចាស់រថយន្តបង្កយកទៅប៉ុស្តិ៍នគរបាលរដ្ឋបាល ទួលទំពូង១ រួចហើយក៏ទំនាក់ទំនងទៅជំនាញចរាចរណ៍ក្រុង ដើម្បីចុះមកធ្វើការវាស់វែង និងស្ទូចយករថយន្តទាំងពីរគ្រឿងនោះ យកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមផ្លូវច្បាប់៕
ដោយ៖ ជីម ភារ៉ា ដង្កោ
...
