ភ្នំពេញ៖ បេីយោងតាមប្រភពព័ត៍មានពីកាកបាទក្រហមកម្ពុជា បានឱ្យដឹងថា នារសៀលថ្ងៃទី១៧ ខែមករា ឆ្នាំ២០២២នេះ នៅទីស្នាក់ការសាខាកាកបាទក្រហមកម្ពុជា រាជធានីភ្នំពេញ លោក ជិន ប៊ុនធឿន នាយកប្រតិបត្តិសាខា បានទទួលជួបសំណេះសំណាល និងទទួលអំណោយជាសៀវភៅដែលមានចំណងជេីង “ស្ថាបនិក និងបិតាសន្តិភាពរបស់កម្ពុជា” , “អ្នកយុទ្ធសាស្ត្រវ័យក្មេងនៅអាសុី” , “បុរសសង្ហាដេីរបញ្ច្រាសទិស” និង”ទឹកចិត្តអ្នកជួយសង្គ្រោះ” សរុបចំនួន៩០ក្បាល ពីលោក ពៅ សុខ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
នាឱកាសនោះ លោក ពៅ សុខ បានសម្តែងនូវការកោតសរសេីរ គាំទ្រចំពោះសកម្មភាពមនុស្សធម៌កាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់ប្រកបដោយភាពឈ្លាសវៃរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន និងបានសម្តែងនូវសេចក្តីសោមនស្សរីករាយដែលបាននាំយកសៀវភៅដែលជាស្នាដៃរៀបចំស្រាវជ្រាវចងក្រងរបស់រូបលោកដោយផ្ទាល់ មកចូលរួមចំណែកជាមួយសាខាកាកបាទក្រហមកម្ពុជា រាជធានីភ្នំពេញ ក្នុងការលេីកកម្ពស់ចំណេះដឹងដល់មន្ត្រីបុគ្គលិក អ្នកស្មគ្រ័ចិត្ត យុវជនកាកបាទក្រហមកម្ពុជាទាំងអស់ ។
ជាឆ្លើយតប ក្នុងនាមលោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ លោក ជិន ប៊ុនធឿន បានមានប្រសាសន៍សូមគោរពថ្លែងអំណរយ៉ាងជ្រាលជ្រៅបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងសូមថ្លែងអំណរគុណចំពោះ លោក ពៅ សុខ និងសហការី ដែលបាននាំយកសៀវភៅដ៏ល្អដែលបានចងក្រងរៀបរាប់ពីយុទ្ធសាស្ត្រ និងវីរភាពរបស់សម្តេចអគ្គមហាសេនាបតីតេជោ ហ៊ុន សែន ក្នុងការរំដោះប្រទេសជាតិពីរបបប្រល័យពូជសាសន៍ ប៉ុល ពត និងការដឹកនាំប្រទេសឱ្យមានការីកចម្រេីនសម្បូរសប្បាយក្រោមម្លប់នៃសន្តិភាព ព្រមទាំងសៀវភៅដែលចងក្រងរៀបរាប់ពីវីរភាពរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាកុលធីតាដ៏ឆ្នេីមរបស់កម្ពុជា និងជាមាតាមនុស្សធម៌ ដែលបានដឹកនាំសមាគមជាតិកាកបាទក្រហមកម្ពុជា ពុះពារគ្រប់ទិសទីក្នុងការជួយសម្រាលនូវការលំបាករបស់ជនរងគ្រោះ និងងាយរងគ្រោះគ្រប់ប្រភេទ រហូតទទួលបានការគាំទ្រល្បីរន្ទឺពីមជ្ឈដ្ឋានជាតិ អន្តរជាតិ ។
ចុងបញ្ចប់ លោកនាយកប្រតិបត្តិសាខា សូមសន្យាថានឹងរៀបចំទុកដាក់ ក៏ដូចជាបែងចែកសៀវភៅទាំងនេះទៅតាមអនុសាខាខណ្ឌទាំង១៤បន្តទៀត ដេីម្បីឱ្យមន្ត្រីបុគ្គលិក អ្នកស្មគ្រ័ចិត្តនៅក្នុងស្ថាប័នមនុស្សធម៌របស់យេីងទាំងអស់បានយល់ដឹងបន្ថែមទៀតឱ្យកាន់តែសុីជម្រៅគ្រប់ជ្រុងជ្រោយពីស្នាដៃវីរភាពរបស់សម្តេចទាំងពីរ ដែលជាថ្នាក់ដឹកនាំដ៏ឆ្នេីមជាគំរូក្នុងក្រអៅបេះដូងរបស់ប្រជាពលរដ្ឋយេីងទាំងអស់គ្នា ៕ដោយ៖ស តារា
