ភ្នំពេញ៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) បានបញ្ជាក់នៅលេីបណ្ដាញសង្គមហ្វេសប៊ុកផ្ទាល់ខ្លួននៅថ្ងៃអង្គារទី១៥ ខែកុម្ភៈ ឆ្នាំ២០២២នេះថា៖ កូនសុនខចំនួន ៣៤ ក្បាល ដែលមានសុខភាពល្អ និងអាចហ្វឹកហ្វឺន ឱ្យក្លាយជាអ្នកចម្បាំង ដើម្បីសុខសុវត្ថិភាព សង្គមមនុស្ស។ ហើយសុនខទាំងនេះ ជាកូនពូជអ្នកចម្បាំង ជាមួយគ្រាប់មីន និងសំណល់យុទ្ធភណ្ឌសង្គ្រាម។
ជាក់ស្ដែងយោងតាមមជ្ឈមណ្ឌលសកម្មភាពកំចាត់មីនកម្ពុជា (CMAC) មេពូជសុនខ នៃអង្គភាពសុនខស៊ីម៉ាក់ បានឱ្យដឹងដែរថា៖ នៅដើមសប្តាហ៍នេះ បានផ្តល់កំណើតដល់ទៅ ៤សំបុក ដែលមានកូនសុនខ សរុបចំនួន ៣៤ក្បាល។ នេះជាដំណឹងដ៏សែនរីករាយ មួយ។ ដោយឡែកពួកគេទាំង ៣៤ក្បាល មានសុខភាពល្អទាំងអស់ និងកំពុងទទួលការថែទាំ ថ្នាក់ ថ្នម ពីសំណាក់អ្នកជំនាញ ថែទាំ និង ហ្វឹកហាត់សុនខ។
មជ្ឈមណ្ឌលសកម្មភាពកំចាត់មីនកម្ពុជា បានគូសបញ្ជាក់ទៀតថា៖ « កូនសុនខជំនាន់ថ្មីនេះ នឹងក្លាយជាអ្នកបន្តវេន នៃពូជអ្នកចម្បាំង ដើម្បីសេចក្តីសុខ សុវត្ថិភាព ជូនប្រជាពលរដ្ឋកម្ពុជា ដែលកំពុងរស់នៅ ក្នុងតំបន់គំរាមកំហែង ដោយសារសំណល់ យុទ្ធភណ្ឌសង្គ្រាម»។
គួរជម្រាបថា ការដោះមីន ដោយសុនខ មានប្រសិទ្ធភាពខ្ពស់ ជាងឧបករណ៍រាវរក ដោយសារឧបករណ៍រាវរក បានជួបនូវបញ្ហា នៅពេលប៉ះអំបែងដែកផ្សេងៗ តែបើសុនខ នៅពេលវាជួបគ្រាប់មីន បានវាកាយរក ព្រោះវាហិតតែជាតិរំសេវប៉ុណ្ណោះ។ ក្នុងសុនខ មួយក្បាល វាអាចរាវរកមីនបាន ក្នុងផ្ទៃដីពី ២០០០-៣០០០ ម៉ែត្រការ៉េ៕ដោយ៖សហការី
