ភ្នំពេញ៖ ដើម្បីសិក្សាពីជម្រកសត្វព្រៃដែលមានដោយកម្រ និងជិតផុតពូជ កំពុងរស់នៅកម្ពុជា មន្រ្តីក្រសួងបរិស្ថាន បានដាក់ម៉ាស៊ីនថតស្វ័យប្រវត្តិចំនួន ជាង ៥០គ្រឿង ដេីម្បីចាំថតសត្វព្រៃនៅក្នុងឧទ្យានជាតិជួរភ្នំក្រវាញកណ្តាល កាលពីដើមខែកុម្ភៈនេះ!។ នេះបេីយោងតាមប្រភពព័ត៍មានដែលទេីបទទួលបានពីក្រសួងបរិស្ថាន នៅព្រឹកថ្ងៃសៅរ៍ទី១៩ ខែកុម្ភៈ ឆ្នាំ២០២២។
ប្រភពដដែលបន្តថា ការដាក់ម៉ាស៊ីនថតស្វ័យប្រវត្តិដើម្បីចាំថត សត្វព្រៃនេះ គឺជាគម្រោង «និរន្តរភាពតំបន់ទេសភាព និង ទេសចរណ៍ធម្មជាតិកម្ពុជា» សហការជាមួយ នាយកដ្ឋាន អភិរក្សតំបន់ការពារធម្មជាតិដីគោក ខាងត្បូងបឹងទន្លេសាប នៃអគ្គនាយកដ្ឋានតំបន់ការពារធម្មជាតិមន្ទីរបរិស្ថានខេត្តពោធិ៍សាត់មន្ទីរបរិស្ថានខេត្តកំពង់ស្ពឺនិងមន្ទីរបរិស្ថានខេត្តកោះកុង។
ក្រសួងបរិស្ថាន បានឱ្យដឹងទៀតថា ការចុះដាក់ម៉ាស៊ីនថតដោយ ស្វ័យប្រវត្តិ ក្នុងឧទ្យានជាតិជួរភ្នំក្រវាញកណ្តាលនេះប្រយោជន៍ ដើម្បី បង្កើនចំណេះដឹងពីវិធីសាស្រ្តសិក្សា និងប្រមូលទិន្នន័យ ជីវៈចម្រុះ តាមរយៈ ម៉ាស៊ីនថតស្វ័យប្រវត្តិដល់ មន្ត្រី ឧទ្យានុរក្សក្នុងគោលបំណងសិក្សាពីប្រភេទទីជម្រកសត្វព្រៃសំខាន់ៗ ។ បញ្ជាក់ពីវត្តមានប្រភេទសត្វព្រៃមានដោយកម្រ ជិតផុតពូជទទួលរងគ្រោះថ្នាក់របាយនិងភាពសម្បូរបែបនៃប្រភេទសត្វព្រៃក្នុងតំបន់សិក្សា។ជាកម្មវត្ថុនៃការរៀបចំកំណត់ និងបែងចែកតំបន់គ្រប់គ្រង និងផែនការគ្រប់គ្រង ក្នុង ឧទ្យានជាតិ ជួរភ្នំក្រវាញកណ្តាល។
ជាលទ្ធផលក្រោយការដាក់កាលពីអំឡុងថ្ងៃ ទី១០-១៧ ខែកុម្ភៈ ឆ្នាំ២០២២ ក្រុមការងារទាំងបីខេត្ត បានប្រទះឃើញ ដានជើង លាមក គន្លងសត្វព្រៃដូចជា៖ ដំរីអាស៊ី ខ្ទីង ប្រើស្បូវ កែះ ឈ្លូស ជ្រូកព្រៃ ខ្លាពពក ខ្លាឃុំ ជ្រូកព្រុល ពង្រូល ឆ្កែព្រៃ និងប្រភេទសត្វព្រៃសំខាន់ៗមួយចំនួនទៀត នឹងបានដាក់ម៉ាស៊ីនថតស្វ័យប្រវត្តិ។ ជាមួយគ្នានេះ ក្រុមការងារបរិស្ថានទាំងបីខេត្ត បានដាក់ម៉ាស៊ីន ថតស្វ័យប្រវត្តិសរុបចំនួន ៥៣គ្រឿង ក្នុង៥២ទីតាំងសិក្សា (Deployment) ក្នុងនោះភូមិសាស្ត្រខេត្តពោធិ៍សាត់ចំនួន ២០គ្រឿង ខេត្តកោះកុង ២៣គ្រឿង និងខេត្តកំពង់ស្ពឺចំនួន ១០គ្រឿង។
គួរបញ្ជាក់ថា ម៉ាស៊ីនថតស្វ័យប្រវត្តិទាំង ៥៣គ្រឿងនេះ គ្រោងនឹងប្រមូលត្រលប់មកវិញ នៅក្នុងអំឡុងខែឧសភា ឆ្នាំ២០២២ ខាងមុខនេះ៕
ដោយ៖សហការី
