ភ្នំពេញ៖ មនុស្សប្រុសស្រី២នាក់ ត្រូវកម្លាំងកងរាជអាវុធហត្ថក្រុងតាខ្មៅបានធ្វើការស្រាវជ្រាវឃាត់ខ្លួនជាបន្តបន្ទាប់ ដោយឃាត់បុរសម្នាក់ជាអ្នករត់ម៉ូតូនៅខេត្តកណ្ដាល និងដកហូតគ្រឿងញៀនចំនួន១០កញ្ចប់តូចនិងបន្តការសហការជាមួយកម្លាំងកងរាជអាវុធហត្ថរាជធានីភ្នំពេញបន្តឃាត់ខ្លួនស្រ្តីម្នាក់ទៀតដកហូតបានគ្រឿងញៀនចំនួន២៣កញ្ចប់តូចលុយចំនួន១៥៧០០០រៀល នៅចំណុច២កន្លែងផ្សេងគ្នា នៅថ្ងៃទី២៤ ខែមេសា ឆ្នាំ២០១៦។
យោងតាមរបាយការណ៍កម្លាំងកងរាជអាវុធហត្ថក្រុងតាខ្មៅស្តីអំពីករណីរក្សាទុកនូវសារធាតុញៀនកើតហេតុនៅវេលាម៉ោង១០និង១០នាទីព្រឹក ថ្ងៃទី២៤ ខែមេសា ឆ្នាំ២០១៦ នៅចំណុចមុខខារ៉ាអូខេ (បឺងតាប៉ែន) ស្ថិតនៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ជនសង្សយ័ឈ្មោះ ផាន់ ឡី ភេទប្រុស អាយុ៤៨ឆ្នាំ ជនជាតិខ្មែរ មុខរបរររត់ម៉ូតូឌុប
មានទីលំនៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ដកហូតបានក្រាមពណ៏សថ្លាចំនួន១០កញ្ចប់តូចនិងម៉ូតូស១២៥ ពណ៏ខ្មៅ ស៊េរី២០០៨ ពាក់ស្លាកលេខកែប១អា-១៦៦២ ។ លុះនៅថ្ងៃខែដដែលកម្លាំងកងរាជអាវុធហត្ថក្រុងតាខ្មៅបានសហការជាមួយអាវុធហត្ថក្រុងភ្នំពេញ បន្តចុះមកឆែកឆេរនៅម្តុំរោងចក្រឆ្នាំង ផ្ទះលេខ៩៦ ផ្លូវរថភ្លើង ភូមិ២៣ សង្កាត់បឹងកក់២ ខណ្ឌទួលគោក រាជធានីភ្នំពេញ ឃាត់ខ្លួនស្ត្រីម្នាក់ឈ្មោះ បោយ ណាគ្រី ភេទស្រី អាយុ៣៧ឆ្នាំ មុខរបរមិនពិតប្រាកដ ដកហូតបានក្រាមពណ៌សថ្លាចំនួន១៣កញ្ចប់តូចនិងលុយចំនួន១៥៧០០០រៀលនិងបន្តទៅឆែកឆេរផ្ទះមួយកន្លែងផ្សេងលេខ៩១បេដោយក្រុមជនសង្ស័យដឹងខ្លួនបានគេចបាត់ដកហូតបានតែក្រាមពណ៌សថ្លាចំនួន១០កញ្ចប់តូចផងដែរនិងទូរស័ព្ទចំនួន២គ្រឿង។
បច្ចុប្បន្នជនសង្ស័យ២នាក់និងវត្ថុតាងត្រូវបានបញ្ជូនទៅបញ្ជាការដ្ឋានកងរាជអាវុធហត្ថក្រុងតាខ្មៅខេត្តកណ្តាល ដើម្បីសាកសួរនិងកសាងសំណុំរឿងបញ្ចូនទៅសាលាដំបូងខេត្តកណ្ដាល ៕
ដោយ៖ ស ដារ៉ា
