ភ្នំពេញ៖ កម្លាំងសមត្ថកិច្ចការិយាល័យព្រហ្មទណ្ឌកំរិតធ្ងន់នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃបានធ្វើការឃាត់ខ្លួនបុរសពីរនាក់ យោងតាមពាក្យបណ្ដឹងរបស់ជនរងគ្រោះដោយជនសង្ស័យពីរនាក់ខាងលើបានទូទាត់ថ្លៃប្រេងដោយបានចេញសែកស្អុយចំនួនពីរសន្លឹក សរុបជាទឹកប្រាក់ជាង 10 ម៉ឺនដុល្លារ ខណៈនារសៀលថ្ងៃទី៤ ខែមិនា ឆ្នាំ២០២២ ជនសង្ស័យទាំង២នាក់ត្រូវបានបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីប្រគល់ឲ្យតំណាងអយ្យការបើកការស៊ើបសួរតាមនីតិវិធី ។
ពាក់ព័ន្ធជាមួយនឹងករណីចេញសែកស្អុយនេះ កាលពីថ្ងៃទី ១៦ និងថ្ងៃទី ៣០ ខែធ្នូឆ្នាំ ២០២១ បុរសពីរនាក់ដែលជាជនសង្ស័យតំណាងឲ្យក្រុមហ៊ុន E-zone express បានធ្វើការទូទាត់ថ្លៃប្រាក់ទិញប្រេងតាមរយៈមូលប្បទានប័ត្រ(សែក). ចំនួនពីរសន្លឹកដែលសរុបជាទឹកប្រាក់ជាង 10 ម៉ឺនដុល្លារ ក្រោយពីបានចេញសែករួចមក ជនរងគ្រោះឃើញថាសែកទាំងពីរ មិនមានសាច់ប្រាក់ ក្រោយមកជនរងគ្រោះបានព្យាយាមចរចាដោះស្រាយបំណុលខាងលើតែមិនបានលទ្ធផលសោះ ហើយបុគ្គលទាំងពីរនាក់ខាងលើមានចេតនាគេចវេសមិនបំពេញកាតព្វកិច្ចចំពោះឧបករណ៍ដែលបានជួញដូរដែលធ្វើឲ្យប៉ះពាល់ផលប្រយោជន៍យ៉ាងធ្ងន់ធ្ងររបស់ក្រុមហ៊ុនជនរងគ្រោះ ។
ជនសង្ស័យទាំង២នាក់មានឈ្មោះ ១ ៖ប៉ែន សុភាព ភេទប្រុស អាយុ ៣៨ឆ្នាំ ជនជាតិខ្មែរ , ២ ៖ស៊ាង ថៃ ភេទប្រុស អាយុ ៣៨ឆ្នាំ ជនជាតិខ្មែរ ពាក់ព័ន្ធ។
បច្ចប្បន្នជនសង្ស័យទាំង២នាក់ កំពុងស្ថិតក្នុងដំណាក់កាលតំណាងអយ្យការបើកការស៊ើបសួរនៅឡើយ៕
ដោយ រ៉ារ៉ា
