ខេត្តព្រះសីហនុ៖ បុរសដែលជាកម្មកររោងចក្រម្នាក់ សង្ស័យចាយលុយមិនគ្រប់គ្រាន់ បែរជាបែកគំនិតទៅលក់គ្រឿងញៀន ចុងក្រោយមិនទាន់និងបានចាយលុយផង ក៏ត្រូវសមត្ថកិច្ចនគរបាលខេត្តព្រះសីហនុ ចាប់វ៉ៃខ្នោះបាត់។
នេះបេីយោងតាមរបាយការណ៍របស់នគរបាលខេត្តព្រះសីហនុ បានឱ្យដឹងថា ដោយមានការដឹកនាំបញ្ជាពីសំណាក់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងជំនាញនៃអធិការដ្ឋាននគរបាលស្រុកព្រៃនប់ កាលពីថ្ងៃសុក្រ ទី០៤ ខែមីនា ឆ្នាំ២០២២ បានធ្វើការឃាត់ខ្លួនជនសង្ស័យម្នាក់ ពាក់ពន្ធ័នឹងករណីគ្រឿងញៀន វេលាម៉ោង ២រសៀល នៅចំណុចក្នុងបន្ទប់ជួល ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
ជនសង្ស័យមានឈ្មោះ ចឹក ច្រឹប ភេទប្រុស អាយុ២៩ ឆ្នាំមុខរបរកម្មកររោងចក្រ ស្នាក់នៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
ក្នុងប្រតិបត្តិការខាងលេីនេះ កម្លាំងជំនាញបានដកហូតវត្ថុតាងរួមមាន៖ ម្សៅក្រាមសថ្លាសង្ស័យសារធាតុញៀនចំនួន១១កញ្ចប់ ,ទូរស័ព្ទដៃចំនួន០១គ្រឿង ។
បច្ចុប្បន្នជនសង្ស័យ កំពុងកសាងសំណុំរឿងតាមនីតិវិធី និងចាត់ការតាមច្បាប់ ៕
ដោយ៖សហការី
