ភ្នំពេញ ៖ ស្ត្រីម្នាក់បានរងរបួសធ្ងន់ធ្ងរ ហើមមុខហើមមាត់រហូតសន្លប់ស្តូកស្តឹងដោយសារត្រូវប្ដីកំណាចស្រវឹងខួបវាយទាត់ធាក់ដូចសត្វធាតុ ហើយត្រូវបានអ្នកភូមិហៅរថយន្តសង្រ្គោះដឹក ទៅកាន់មន្ទីរពេទ្យភ្លាមៗ ។
អំពើហិង្សាដោយប្តីកំណាចវាយប្រពន្ធរហូតសន្លប់នេះ បានកើតមានឡើងកាលវេលាម៉ោង១០និ១៥នាទីព្រឹក ថ្ងៃទី២៦ ខែមេសា ឆ្នាំ២០១៦ នៅចំណុចផ្លូវលំ ស្ថិតនៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ ។
សាក្សីជាអ្នកភូមិរស់នៅក្បែរកន្លែងកើតហេតុបានឲ្យដឹងថា ជនរងគ្រោះមានឈ្មោះ ជុំ សុភាព ភេទស្រី អាយុ២៦ឆ្នាំ មុខរបរបេះផ្កាលក់ ស្នាក់នៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រងរបួសហែមមុខមាត់សន្លប់ មិនដឹងខ្លួនត្រូវរថយន្តសង្គ្រោះមន្ទីរពេទ្យបង្អែក មានជ័យយកទៅសង្គ្រោះភ្លាមៗ។ រីឯបុរសជាប្តីវាយធ្វើបាបប្រពន្ធនោះមិនត្រូវបានគេស្គាល់ ឈ្មោះនោះទេ ព្រោះក្រោយបង្កហិង្សាដាក់ប្រពន្ធរួចបានរត់គេចខ្លួនបាត់ ហើយនៅពេលនេះ កម្លាំងនគរបាលកំពុងតាមចាប់ខ្លួន ។
សាក្សីឲ្យដឹងទៀតថា គ្រួសារមួយនេះឧស្សាហ៍មានទំនាស់គ្នាណា ដោយសារបុរសជា ប្តីជាជនប្រមឹកស្រវឹងខួប និងច្រើនតែរករឿងប្រពន្ធកូនមិនសូវលស់ថ្ងៃឡើយ ។ មុនពេលកើតហេតុ គេឃើញប្តីប្រមឹកស្រែកឡូឡាខ្លាំងៗដាក់ប្រពន្ធ ហើយមួយសន្ទុះស្រាប់តែហក់ទៅវាយទាត់ធាក់ប្រពន្ធដូចបាវសាក់ បណ្តាលឲ្យប្រពន្ធហើមមុខមាត់ដួលសន្លប់នៅកន្លែងកើតហេតុរកតដៃមិនបានឡើយ ។ ពេលឃើញដូច្នេះ អ្នកភូមិបានចូលទៅឃាត់ ធ្វើឲ្យប្តីកំណាចមានឧិកាសគេចខ្លួនបាត់ទៅ ។ ដោយឡែកស្រី្តរងគ្រោះជាប្រពន្ធ ត្រូវបានអ្នក ភូមិហៅរថយន្តដឹកយកទៅសង្រ្គោះនៅមន្ទីពេទ្យបង្អែកច្បារអំពៅភ្លាមៗដែរ ៕
ប្រាថ្នា
