ខេត្តព្រៃវែង៖ មន្រ្តីគយ ខណៈចុះបង្ក្រាបត្រួតពិនិត្យរថយន្ដអត់ពន្ធ នៅខេត្តព្រៃវែង ស្រាប់តែរកឃើញគ្រឿងញៀនជាង២០គីឡូក្រាម នៅក្នុងរថយន្តមួយគ្រឿងម៉ាក AUDI Q7 ពណ៌ខ្មៅ ពាក់ស្លាកលេខ ភ្នំពេញ 2AE-4537 ដែលជាស្លាកលេខក្លែងក្លាយ រួមនិងឃាត់ខ្លួនជនសង្ស័យម្នាក់ផងដែរ។
នេះបេីយោងតាមប្រភពព័ត៍មានពីនាយកដ្ឋានគយ និងរដ្ឋាករកម្ពុជា បានឱ្យដឹងថា៖ នៅថ្ងៃទី១៨ ខែមីនា ឆ្នាំ២០២២នេះ ដោយអនុវត្តតាមបទបញ្ជារបស់លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា និងក្រោមការដឹកនាំរបស់លោក អគ្គនាយករង កើត សុទ្ធារ៉ា លើចំណាត់ការចំពោះរថយន្តគ្មានពន្ធ ស្ថិតនៅភូមិឡឹក ឃុំរំចេក ស្រុកព្រះស្តេច ខេត្តព្រៃវែង, មន្ត្រីគយ និងរដ្ឋាករការិយាល័យស្រាវជ្រាវ និងបង្ក្រាបអំពើរត់ពន្ធតំបន់២ នៃនាយកដ្ឋានបង្ការនិងបង្ក្រាបបទល្មើស បានធ្វើការត្រួតពិនិត្យអនុលោមភាពពន្ធនាំចូលរថយន្តម៉ាក AUDI Q7 ពណ៌ខ្មៅ ពាក់ផ្លាកលេខ ភ្នំពេញ 2AE-4537 ដែលជាផ្លាកលេខក្លែងក្លាយ។
ក្នុងប្រតិបត្តិការនោះ ខណៈដែលមន្រ្តីជំនាញត្រួតពិនិត្យក្នុងរថយន្ត ខាងលើនេះ ស្រាប់តែរកឃើញនូវម្សៅក្រាម និងថ្នាំគ្រាប់មួយចំនួន។ ដោយសង្ស័យអាច ជាសារធាតុញៀន មន្ត្រីគយ និងរដ្ឋាករបានឃាត់ខ្លួនជនសង្ស័យម្នាក់ និងចាប់យករថយន្ត និងសារធាតុសង្ស័យ បញ្ជូនមកអគ្គនាយកដ្ឋានគយនិងរដ្ឋាករកម្ពុជា ដើម្បីធ្វើតេស្ត និងបន្តនីតិវិធី។
ក្នុងប្រតិបត្តិការខាងលេីនេះ ក៏មានការសម្របសម្រួលពីលោក ឆាយ ហុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ មន្ត្រីគយនិងរដ្ឋាករ សហការជាមួយមន្ត្រីមន្ទីរប្រឆាំងបទល្មើសគ្រឿងញៀន ធ្វើតេស្តបឋមលើសារធាតុសង្ស័យ ឃើញលទ្ធផលថាជាសារធាតុញៀនខុសច្បាប់ចំនួន ៣ប្រភេទ មានទម្ងន់សរុប២០,៧៥២.៤ក្រាម ក្នុងនោះ ប្រភេទ MDMA ១៥,៧៤២ក្រាម, ប្រភេទកេតាមីន៤,៩៩៦ក្រាម, និងមេតំហ្វេតាមីន១៤.៤ក្រាម។
បច្ចុប្បន្នជនសង្ស័យនិងវត្ថុតាង ត្រូវបានប្រគល់ឱ្យនគរបាលនៃមន្ទីរប្រឆាំងបទល្មើសគ្រឿងញៀន ដើម្បីចាត់តាមនីតិវិធីបន្ត៕
ដោយ៖សហការី
