​ ភ្នំពេញ​ ៖​ ជនសង្ស័យម្នាក់ត្រូវបានប្រជាពលរដ្ឋចាប់បានប្រគល់ឲ្យសមត្ថកិច្ច ក្រោយពីធ្វើសកម្មភាពដេីរទៅកាប់ប្លន់យកទូរស័ព្ទដៃពីយុវជនម្នាក់មិនបានសម្រេច បង្កការភ្ញាក់ផ្អេីលកាលពីវេលាម៉ោង៤ទៀបភ្លឺឈានចូលថ្ងៃចន្ទ ទី២១ ខែមីនា ឆ្នាំ២០២២​ ត្រង់ចំណុចផ្លូវបំបែកជាប្រាំ​ តាមបណ្តោយផ្លូវ៤៣២កែងនិងផ្លូវ៤៣០ ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។
​ សមត្ថកិច្ចបានឲ្យដឹងថា​ ជនសង្ស័យម្នាក់ដែលឃាត់ខ្លួនមានឈ្មោះ ឈៀង បញ្ញា ភេទប្រុស
អាយុ២២ឆ្នាំ ជនជាតិខ្មែរ មុខរបរមិនពិតប្រាកដ
រស់នៅក្នុងសង្កាត់បឹងទំពន់ទី១ ខណ្ឌមានជ័យ
រាជធានីភ្នំពេញ។ ចំណែកជនរងគ្រោះសូមមិនបញ្ចេញឈ្មោះដោយជិះម៉ូតូម៉ាកសង់ប៊ិចពណ៌ខ្មៅ ពាក់ស្លាកលេខភ្នំពេញ1BE.5369ជិះតែម្នាក់ឯង។
​ បេីតាមសម្ដីយុវជនរងគ្រោះបាន ប្រាប់ឲ្យដឹងថាដំបូងឡើយរូបគាត់បានចេញពីហូបអីជាមួយមិត្តភ័ក្ខហើយក៏បែកគ្នាចេញទៅផ្ទះរៀងៗខ្លួន រូបគាត់ធ្វើដំណើរតាមបណ្តោយផ្លូវ៤៣២ ក្នុងទិសដៅពីកើតទៅលិច លុះមកដល់ចំណុចកើតហេតុខាងលើក៏ឈប់ម៉ូតូនិយាយទូរស័ព្ទស្រាប់តែលេចមុខជនសង្ស័យយកស័ង្កសីដែលកែច្នៃធ្វើជាដាវដេីរមកកាប់ទៅលើរូបគាត់​បំណងយកទូរស័ព្ទ​ ឯគាត់ក៏តរដៃវ៉ៃទៅវិញទៅមកបណ្ដាលឲ្យគាត់ធ្លាក់ពីលើម៉ូតូរលាត់ដៃជើងបែកមុខបែកមាត់ ហើយក៏ស្រែកឲ្យប្រជាពលរដ្ឋជួយ ចាប់ជនសង្ស័យខាងលេីបានប្រគល់ឲ្យសមត្ថកិច្ច។
​ ដោយឡែកជនសង្ស័យខាងលេីក៏បានឆ្លើយសារភាពថាខ្លួនពិតជាបានកាប់ប្លន់យុវជននេះពិតប្រាកដមែនដោយសារតែខ្លួនមិនមានលុយជក់គ្រឿងញៀនបន្ត។
​ បច្ចុប្បន្ននេះ​ ជនសង្ស័យរួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលទួលទំពូងទី២ យកទៅសួរនាំនិងចាត់ការតាមនីតិវិធី​ ៕​

ដោយ​ ៖​ ភារ៉ា​ ដង្កោ​