​ ភ្នំពេញ​ ៖​ បុរសម្នាក់សង្ស័យងងុយដេក​ បានបើករថយន្តToyota Prius មួយគ្រឿងក្នុងល្បឿនលឿន​ ធ្វើឱ្យរេចង្កូតទៅបុកខឿនឡើងលើសួនចែកទ្រូងផ្លូវ​ និងបុកដើមផ្កាមួយដើមទៀត​បណ្ដាលឱ្យរថយន្តបែកកង់និងដាច់កាឡេកល់ជាប់ទៅមុខលែងរួច។
​ ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី២១ ខែមីនា​ ឆ្នាំ២០២២ នៅចំណុចមុខវត្តនន្ទមុនី​ តាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
​ យោងតាមប្រភពព័ត៌មានពីកន្លែងកើតហេតុបានឱ្យដឹងថា​ មុនកើតហេតុគេឃើញបុរសម្នាក់បើករថយន្តToyota Priusមួយគ្រឿង ពណ៌ទឹកប្រាក់​ពាក់ស្លាកលេខភ្នំពេញ2AE-0229តាមបណ្ដោយផ្លូវលេខ២១៧​ ពីកើតទៅលិចក្នុងល្បឿនលឿន​ លុះមកដល់ចំណុចកើតហេតុខាងលើបានរេចង្កូតមកខាងឆ្វេងដៃជ្រុលទៅបុកខឿនសួនចែកទ្រូងផ្លូវ​ និងបុកដេីមផ្កាមួយដេីមរងការខូចខាត​ ចំណែករថយន្តបង្កដាច់កាឡេនិងបែកកង់​មុខ​កល់លេីទ្រូងផ្លូវទៅមុខលែងរួច​ ។
​ ក្រោយកើតហេតុ​ សមត្ថកិច្ចមូលដ្ឋានបានចុះមកដល់​ និងទំនាក់ទំនងទៅសមត្ថកិច្ចជំនាញឱ្យមកធ្វើការវាស់វែង
ស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក​នៃស្នងការដ្ឋាននគរបាលរាជធានីភ្នំពេញ​ រង់ចាំដោះស្រាយតាមច្បាប់៕

ដោយ​ ៖​ ភារ៉ា​ ដង្កោ