ខេត្តស្វាយរៀង៖ យ៉ាងហោចណាស់មនុស្សប្រុសស្រី ៧នាក់បានរងរបួសធ្ងន់ស្រាលដោយសារករណីគ្រោះថ្នាក់ចរាចរណ៍រវាងម៉ូតូបុកជាមួយម៉ូតូស្របទិសគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងព្រឹក។

ហេតុការណ៍នេះបានកើតឡើងកាលពីវេលាម៉ោង៨និង៤៥នាទីព្រឹក ថ្ងៃទី ២៩ ខែ មិនា ឆ្នាំ ២០២២  លើផ្លូវជាតិលេខ១ ចន្លោះគីឡូម៉ែត្រលេខ ១៥៧-១៥៨ ស្ថិតនៅក្នុងភូមិព្រៃផ្តៅ សង្កាត់ច្រកម្ទេស ក្រុងបាវិត ខេត្តស្វាយរៀង។

យោងតាមសមត្ថកិច្ចនគរបាលក្រុងបានឲ្យដឹងថាបុរសដែលបើកម៉ូតូបង្កហេតុមានឈ្មោះយ៉ានសូ សំនៀង អាយុ ១៩ ឆ្នាំ ជនជាតិខ្មែរ មុខបរកម្មកររោងចក្រ មានទីលំនៅភូមិបារាយណ៍ ឃុំមេសរថ្ងក ស្រុកចន្រ្ទា ខេត្តស្វាយរៀង
អ្នករួមដំណើរ២នាក់មានឈ្មោះ នួន វណ្ណេត ភេទ ប្រុស អាយុ ២១ ឆ្នាំ ជនជាតិខ្មែរ មុខរបរកម្មកររោងចក្រនិងឈ្មោះ នួន ស្រីនីត ភេទ ស្រី អាយុ ១៨ ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅភូមិព្រៃគគីរ ឃុំព្រៃគគីរ ស្រុកចន្រ្ទាជិះម៉ូតូម៉ាក HONDA C១២៥ ឆ្នាំ ២០២០ ព៌ណខ្មៅ ពាក់ស្លាកលេខ ស្វាយរៀង ១Q៩៥៦២។

ចំណែកភាគីម្ខាងទៀតមានឈ្មោះម៉ិច រ៉ាវី ភេទ ប្រុស អាយុ ៣៥ ឆ្នាំ ជនជាតិខ្មែរ មុខរបរកសិករ និងអ្នករួមដំណើរ៣នាក់មានឈ្មោះ  ឃឹម ធីតា ភេទ ស្រី អាយុ ៣០ ឆ្នំ ជនជាតិខ្មែរ មុខរបរកសិករ ឈ្មោះ ឈ ម៉ីង ភេទ ប្រុស អាយុ ០៥ ឆ្នាំ ជនជាតិខ្មែរ និងឈ្មោះ រី កា ភេទ ស្រី អាយុ ០៤ ឆ្នាំ ជនជាតិខ្មែរ មានទីលំនៅភូមិ បាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បើកម៉ូតូម៉ាកHONDA C១២៥ ឆ្នាំ ២០១៩ ព៌ណខ្មៅ ពាក់ស្លាកលេខ ស្វាយរៀង ១N៩៧៧៦។

បើតាមសាក្សីបានអោយដឹងថាមុនកើតហេតុគេឃើញមនុស្សប្រុសស្រី៣នាក់បានជិះម៉ូតូមួយគ្រឿងម៉ាក
HONDA C១២៥ ឆ្នាំ ២០២០ ព៌ណខ្មៅ ពាក់ស្លាកលេខ ស្វាយរៀង ១Q៩៥៦២ក្នុងទិសដៅពីកើតទៅលិចលើផ្លូវជាតិលេខ១ហើយក៏បាន
បត់ឆ្វេងខ្វះការប្រុងប្រយ័ត្ន ស្រាប់តែមានម៉ូតូមួយគ្រឿងទៀតម៉ាកHONDA C១២៥ ឆ្នាំ ២០១៩ ព៌ណខ្មៅ ពាក់ស្លាកលេខ ស្វាយរៀង ១N៩៧៧៦ជិះគ្នា៤នាក់ធ្វើដំណើរស្របទិសគ្នាជាន់ហ្វ្រាំងមិនទាន់ក៏បុកគ្នាយ៉ាងពេញទំហឹងបង្កការភ្ញាក់ផ្អើលទាំងព្រឹកតែម្ដង។

ក្រោយមកអ្នករងរបួសត្រូវ បានក្រុមគ្រួសារយកទៅព្យាបាលនៅមន្ទិរពេទ្យខេត្តស្វាយរៀង និងសមត្ថកិច្ចធ្វើការវាស់វែងអូសយកមធ្យោបាយធ្វើដំណើរទាំង២គ្រឿង យកមករក្សាទុកនៅអធិការដ្ឋាននគរបាលក្រុងបាវិត ដើម្បីដោះស្រាយពេលក្រោយតាមច្បាប់៕

ដោយ៖ យឹម សុថាន