ភ្នំពេញ៖ ជាមួយនឹងសមត្ថភាពទេពកោសល្យផ្នែកនិពន្ធ និងច្រៀងបេក្ខជនCambodian Idol មកពីខេត្តបាត់ដំបង អ៊ាម វន្នី បានបង្កើតឲ្យអ្នកទស្សនាចាប់អារម្មណ៍ខ្ពស់។ ទស្សនិកជនរំពឹងដែរថា បេក្ខជនមួយនេះអាចនឹងឈោងចាប់បានភាពល្បីល្បាញកាន់តែខ្លាំងក្រោយពេលបញ្ចាំងការប្រឡងក្នុងកម្មវិធីលំដាប់ពិភពលោកមួយនេះបើទោះបីជាយុវជនរូបនេះមិនទទួលបានជ័យលាភីក្តី។
តាមពិត អ៊ាម វន្នី ត្រូវបានអ្នកនិយមទស្សនាបទចម្រៀងខ្មែរតាមបណ្តាញ YouTubeស្គាល់ជាយូណាមកហើយតាមរយៈបទចម្រៀងប្រមាណ១០បទដែលយុវជនរូបនេះបានច្រើននិងចែកចាយពេញបណ្តាញខាងលើ។ អ្នកចម្រៀងរូបនេះកាន់តែធ្វើឲ្យមានការចាប់អារម្មណ៍ក្រោយរូបគេបានចូលរប្រកួតក្នុងកម្មវិធីCambodian Idol ហើយក៏ជាបេក្ខជនតែមួយគត់ លើកយកបទចម្រៀងស្នាដៃខ្លួន ក៏ដូចជាស្នាដៃកូនខ្មែរ មកច្រៀង នៅលើឆាក កម្មវិធីលំដាប់ពិភពលោកនេះ ។ ទន្ទឹមជាមួយនឹងគ្នានេះដែរ យុវជនរូបនេះ បានទទួលការកោតសរសើរពី សំណាក់ គណៈកម្មាធិការទាំង ៤ រូប ថា ពិតជាមានសំឡេងពិរោះ ហើយអ្វីដែលពិសេស គឺចេះនិពន្ធបទភ្លេងថ្មី និង ទំនុកច្រៀងដោយខ្លួន ឯង ដោយមិនចម្លងពីអ្នកដទៃ ។
ក្រោយវត្តមានបង្ហាញលើឆាកនេះ បានធ្វើឲ្យយុវជន ដែលមានស្រុកកំណើតមកពីទឹកដីបាត់ដំបង ទទួលបានការគាំទ្រពីសំណាក់អ្នកលេងបណ្តាញសង្គមហ្វេសប៊ុក ខណៈដែលខ្លួន ទាំងមិនទាន់នឹងបាន ឈានទៅកាន់វគ្គចុងក្រោយ លើកពានកម្មវិធី Cambodian Idol ។បេក្ខជនរូបនេះ ត្រូវបានគេសន្និដ្ឋានថា បើសិនជាមិនអាចលើកពាន កម្មវីធីលំដាប់ពិភពលោកនេះបាន ក៏ អ៊ាម វន្នី ក៏មានលទ្ធភាពអាចធ្វើជាតារាចម្រៀង និងអ្នកនិពន្ធបទភ្លេងថ្មី បានដែរ ។ ទាំងនេះគឺអាស្រ័យលើផលិតកម្មហង្សមាស និង ផលិតកម្មផ្សេងៗ ផ្តល់ឱកាសឲ្យគាត់តែប៉ុណ្ណោះ ។
លោក អ៊ាម វន្នី អាយុ២៨ឆ្នាំ គឺជាអ្នកនិពន្វ និងជាអ្នកបង្កើតបទចម្រៀងថ្មី (មិនចម្លងពីគេ) លោកបានធ្វើអោយ មេប្រយោគទាំងបួនអោយ ”YES” និងកោតសរសើរនូវទេពកោសល្យរបស់លោកមិន ដាច់ពីមាត់ឡើយ។ លោក អ៊ាម វន្នី មានសមត្ថភាពអាចតែងនិពន្ធនិងបង្កើតបទថ្មី អាចច្រៀងបានយ៉ាងពិរោះមានទឹកដម ជាពិសេសចេះលេងហ្គីតាបានយ៉ាងស្ទាត់ជំនាញថែមទៀតផង។
លោក បានបញ្ជាក់ថា រហូតមកដល់ពេលនេះ លោកបានបង្កើតបទថ្មី (មិន ចម្លងគេ) ចំនួនជាង១០បទហើយ។ បទដែលទទួលបានការគាំទ្រខ្លាំងជាងគេ និង ជម្រុញអោយលោកលើកយកមកច្រៀងក្នុងវគ្គ Judge Audition នេះគឺបទមួយមានចំណងជើងថា ”ស្អប់ស្នេហ៍ដំបូង”។ បទចម្រៀងដែលទទួលបានការគាំទ្រច្រើនពីអ្នកទស្សនាក្នុងបណ្តាញYouTube មានដូចជាបទ”ធុញទីក្រុង” បែក៤ឆ្នាំជួបគ្នាវិញក្នុងFacebook” “ខ្ញុំជាអ្នកខេត្តបាត់ដំបង””សៀមរាបនារី” ជាដើម៕ វឌ្ឍនា
