នៅថ្ងៃទី៣ខែមេសា មានករណីបាញ់ប្រហារកើតឡើងនៅហាងបារ និងក្លិបកម្សាន្ត ស្ថិតក្នុងទីក្រុង Sacramento រដ្ឋកាលីហ្វ័រនីញ៉ា បណ្តាលឱ្យមនុស្ស៦នាក់ស្លាប់ និង១០នាក់រងរបួស។

កម្លាំងប៉ូលិសបានឱ្យដឹងថា មានមនុស្ស១០នាក់ត្រូវបានបញ្ជូនទៅកាន់មន្ទីរពេទ្យក្នុងស្ថានភាពរបួសធ្ងន់។ រូបភាពវីដេអូដែលបានបង្ហោះលើបណ្តាញសង្គម បានឱ្យដឹងថា មានអំពើហិង្សាកើតឡើងនៅខាងក្រៅក្លិបកម្សាន្តបង្កឱ្យមានភាពចលាចល ហើយក៏មានសំឡេងផ្ទុះអាវុធផងដែរ។
ប្រព័ន្ធផ្សព្វផ្សាយនៅក្នុងតំបន់ និងបណ្តាញសង្គមបានផ្សាយថា មានមនុស្សម្នាក់នៅក្នុងរថយន្តបានបាញ់ប្រហារទៅលើហ្វូងមនុស្សនៅខាងក្រៅភោជនីយដ្ឋាន El Santo និង Ultralounge ។ នៅពេលនេះគេមិនទាន់ដឹងពីមូលហេតុដែលបណ្តាលឲ្យមានការបាញ់ប្រហារខាងលើនៅឡើយទេ ហើយក៏មិនទាន់ដឹងថា ការបាញ់ប្រហារនោះជាប់ពាក់ព័ន្ធនឹងអំពើហិង្សានោះដែរឬទេ។ កម្លាំងជំនាញកំពុងតែបើកការស្រាវជ្រាវដើម្បីបញ្ជាក់ពីមូលហេតុដែលបណ្តាលឲ្យមានការបាញ់ប្រហារនេះ៕ ដោយធីរីណា