ភ្នំពេញ៖ នារីម្នាក់សង្ស័យស្រវឹងស្រាបានបើករថយន្តព្រួសរេចង្កូតទៅបុកម៉ូតូកង់បីចតលើចិញ្ចើមផ្លូវ ហើយជ្រុលទៅបុករថយន្ត២គ្រឿងទៀតដែលកំពុងចតចោល ។
ហេតុការណ៍នេះកើតឡើងនៅវេលាម៉ោង១១យប់ថ្ងៃទី២៧ ខែមេសា ឆ្នាំ២០១៦ នៅចំណុចទល់មុខនិងហាងកូរ៉េយីហោ អូដេងបា ផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បានបើកម៉ូតូកង់បីមកចតអែបនៅលើចិញ្ចើមផ្លូវរង់ចាំឌុបម៉ូយ ខណៈនោះស្រាប់តែមាននារីម្នាក់បានបើករថយន្តតូយ៉ូតាព្រួស ពណ៌កណ្តុរប្រមេះ ពាក់ស្លាកលេខភ្នំពេញ 2AG- 7149 ធ្វើដំណើរតាមផ្លូវសុធារស ក្នុងទិសដៅពីជើងទៅត្បូង ក្នុងល្បឿនយ៉ាងលឿន ហើយបានរេចង្កូតទៅបុកម៉ូតូកង់បីពីក្រោយពេញទំហឹង រួចជ្រុលទៅបុករថយន្ត២គ្រឿងទៀតបណ្ដោយឲ្យរថយន្តបង្កជាប់ទៅមុខលែងរួច។
ប្រភពបន្តថា រថយន្តទី១-ម៉ាកហាយឡែនឌឺរ ពណ៌ទឹកប្រាក់ ពាក់ស្លាកលេខភ្នំពេញ 2AG-1261 និងរថយន្តទី២-ម៉ាកកូរ៉ូឡា ពណ៌ទឹកប្រាក់ ពាក់ស្លាកលេខភ្នំពេញ 2I-8691 ដែលចតចោលនៅមុខចំណុចកើតហេតុខាងលើ ។ ចំណែកម្ចាស់ម៉ូតូកង់បីរងរបួសស្រាល ។
ក្រោយពេលកើតហេតុរថយន្តបង្ក និងម៉ូតូកង់បី រួមជាមួយរថយន្ត២គ្រឿងទៀតត្រូវបានសមត្ថកិច្ចវាស់វែងរួចយកទៅរក្សាទុកអធិការដ្ឋាន នគរបាលខណ្ឌចំការមនដើម្បីដោះស្រាយតាមនីតិវិធី ៕
ដោយ៖ រស្មី
...
