កីឡាករវាយតឺន្នីសលេខ១ពិភពលោក Novak Djokovic បានសម្តែងការមិនយល់ស្របនឹងការសម្រេចចិត្តរបស់កម្មវិធី Wimbledon ដែលមិនអនុញ្ញាតឱ្យកីឡាកររុស្ស៊ី និងបេឡារុស្សចូលរួមក្នុងការប្រកួតដោយសារតែការឈ្លានពានរបស់រុស្ស៊ីលើប្រទេសអ៊ុយក្រែន។

Djokovic បានអត្ថាធិប្បាយបន្ទាប់ពីការទទួលជ័យជម្នះក្នុងព្រឹត្តិការណ៍ Serbia Open ក្នុងទីក្រុង Belgrade ប្រកួតជាមួយនឹងមិត្តរួមជាតិរបស់គាត់ Laslo Djere ដែលជាសញ្ញាបង្ហាញថា គាត់នឹងត្រលប់មកទម្រង់លេងវិញបន្ទាប់ពីរយៈពេលដ៏លំបាកមួយ។Djokovic បាននិយាយថា “ខ្ញុំនឹងតែងតែជាអ្នកដំបូងគេដែលថ្កោលទោសសង្គ្រាម។ ក្នុង​នាម​ជា​កុមារ​នៃ​សង្គ្រាមខ្ញុំ​ដឹង​ថា ​តើ​ការ​ប៉ះទង្គិច​ផ្លូវចិត្ត​បែប​ណា​ដែល​សង្រ្គាម​បន្សល់​ទុក​យើង? ពួកយើងនៅប្រទេសស៊ែប៊ី យើងដឹងពីអ្វីដែលកំពុងកើតឡើងនៅទីនេះក្នុងឆ្នាំ១៩៩៩ មនុស្សជាតិតែងតែរងទុក្ខ យើងមានសង្រ្គាមជាច្រើននៅបាល់កង់”។កីឡាករវាយតឺន្នីសឆ្នើមរូបនេះបន្តថា “អ្វីដែលនិយាយនោះ ខ្ញុំមិនអាចគាំទ្រការសម្រេចចិត្តរបស់ Wimbledon បានទេ។ វាមិនមែនជាកំហុសរបស់អត្តពលិកទេ នៅពេលដែលនយោបាយជ្រៀតជ្រែកជាមួយកីឡា ដែលជាធម្មតាវាមិនល្អទេ”។

គួរបញ្ជាក់ថា ក្នុង​ការ​ទទួល​ជ័យ​ជម្នះ​លើ Djere របស់កីឡាករ Djokovic បាន​ទទួល​ស្គាល់​ថា ​គាត់​រីក​រាយ​ក្នុង​ការ​វិល​ទៅ​រក​ជ័យជម្នះឡើង​វិញដោយ​បាន​ឈ្នះ​ក្នុង​លទ្ធផល 2-6, 7-6, 7-6 ៕ (រូបភាព ៖ MARCA)