ភ្នំពេញ៖ តារាសម្តែងស្រីទើបនឹងបោះជំហ៊ានចូលប្រឡូកក្នុងអាជីពសិល្បៈកញ្ញា លី សៀវម៉ី បានរៀបចំពិធីខួបកំណើតគម្រប់វ័យ១៧ឆ្នាំហើយកាលពីរាត្រីថ្ងៃទី២៨ ខែមេសា ឆ្នាំ២០១៦នៅក្នុងបន្ទប់ ខារ៉ាអូខេ The Prevé។

តារាស្រីរូបនេះបញ្ជាក់ថា រយៈពេលជាង២ខែក្នុងការប្រឡូកក្នុងវិថីសិល្បៈថ្វីដ្បិតតែនាងមិនទាន់មានឱកាសទទួលបានការសម្ដែងនៅក្នុងភាពយន្តតាមបំណងប្រាថ្នានៅឡើយក្ដី ប៉ុន្តែសម្រាប់ឱកាសសម្ដែងក្នុងឈុតខារ៉ាអូខេនិងការរាំរែកនៅលើកញ្ចក់ទូរទស្សន៍ជាមួយតារារៀមច្បងគឺនាងទទួលស្ទើរនឹងមិនមានពេលសម្រាកក្នុងរយៈនេះ។ នាងបន្តថា ក្នុងនោះឱកាសទទួលបានការទំនាក់ទំនងឲ្យថតភាពយន្តនិងឈុតខារ៉ាអូខេពីក្រុមផលិតករនិងម្ចាស់ផលិតកម្មនានាក៏មានកាន់តែច្រើនផងដែរចាប់តាំងពីនាងបង្ហាញខ្លួននៅក្នុងវេទិកាសិល្បៈ។ ទោះជាយ៉ាងណាក្នុងកម្មវិធីខួបកំណើតគម្រប់១៧ឆ្នាំនេះនាងមិនបានអញ្ជើញតារាសិល្បៈល្បីឈ្មោះឲ្យចូលរួមនៅក្នុងពិធីខួបកំណើតរបស់ខ្លួននោះទេដោយសារតែនាងមិនចង់រំខានតារារៀមច្បងនិងមិនចង់ឲ្យមិត្តភ័ក្រ្តជិតស្និទ្ធិជាពិសេសគឺឲ្យអ្នកប្រឡូកសិល្បៈក្នុងជំនាន់ជាមួយគ្នាខ្លាចចិត្តខ្លាចថ្លើមនៅពេលចង់សប្បាយក្នុងពិធីខួបកំណើតរបស់នាងបើមានតារាកុះករចូលរួមនោះ។

តារាស្រីដែលអះអាថា នាងមានរូបសម្រស់ធម្មជាតិពិតៗនេះបញ្ជាក់ថា ផ្នែកសិល្បៈសម្តែងតែមួយគត់ដែលនាងចង់ធ្វើដោយការច្រៀងរាំនិងការបង្ហាញម៉ូដគឺគ្រាន់តែជាចំណូលចិត្តទី២ដែលនាងនឹងធ្វើក្រោយពេលអាជីពសម្ដែងទទួលជោគជ័យប៉ុណ្ណោះ។ នាងប្រកាសទទួលយកការសម្ដែងឲ្យខ្លាំងដូចគ្នានឹងសម្ដែងនាង នីមុន្នីនាថ ដោយសារនាងចូលចិត្តតួកំសត់និងមានទេពកោលស្យខ្ពស់ក្នុងការយំយែកជាពិសេសគឺដាក់អារម្មណ៍មនោសញ្ចេតនាមិនចាញ់តារាដែលបានប្រឡូកការសម្ដែងយូរឆ្នាំនោះឡើយ។

លី សៀវម៉ី គឺជាតារាស្រីវ័យក្មេងដែលមានស្រុកកំណើតនៅខេត្តកំពង់ស្ពឺនិងជាកូនទី២ក្នុងចំណោមបងប្អូន៣នាក់ដែលមានម្ដាយក៏ជាអ្នកជំនាញសិល្បៈខាងផ្នែកល្ខោនយីកេផងដែរ។ នាងមានចំណូលចិត្តស្រឡាញ់ពេញអាជីពសិល្បៈតាំងពីធំដឹងក្ដីមកម្ល៉េះ ប៉ុន្តែទើបតែមានឱកាសចូលប្រឡូកក្រោមការណែនាំរបស់តារាសម្ដែងលេចធ្លោនៅក្នុងផលិតកម្មមួយចំនួន ដោយទទួលបានការណែនាំពីតារាសម្តែងលោក គន់ រៀមរតនៈ ផងដែរ។ នាងរំពឹងថា ការងារសិល្បៈរបស់នាងនឹងកាន់តែរីកចម្រើនទៅមុខជាលំដាប់ខណៈដែលពេលនេះមានផលិតកម្ម និងអ្នកផលិតកម្មវិធីមួយចំនួនកំពុងទាក់ទងនាងជាបណ្តើរៗហើយដែរ៕

ដោយ៖ វឌ្ឍនា