ភ្នំពេញ៖ បុរសម្នាក់ដែលគេដឹងថាជាមនុស្សមានសតិមិនល្អ បានជិះម៉ូតូសង់កូរ៉េកញ្ចាស់មិនមានភ្លើងបំភ្លឺផ្លូវនិងជិះក្នុងទិសដៅបញ្ច្រាស់ទិសចរាចរណ៍ផងនោះត្រូវរថយន្តមិនស្គាល់ម៉ាក បុកពេញទំហឹងបណ្តាលឲ្យស្លាប់ភ្លាមៗនៅនឹងកន្លែងកើតហេតុ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០ និង ១០នាទីយប់ថ្ងៃទី១ ខែឧសភា ឆ្នាំ២០១៦ នៅតាមបណ្តោយផ្លូវលេខ២១៧ នៅចំណុចស្ពានបាគូរ ស្ថិតក្នុងភូមិបាគូរ សង្កាត់ដង្កោ ខណ្ឌដង្កោ រាជធានីភ្នំពេញ។
តាមប្រភពពីសាច់ញាតិជនរងគ្រោះបានប្រាប់ឲ្យដឹងថា ជនរងគ្រោះមានឈ្មោះ សាំង សំណាង ភេទប្រុស អាយុ២១ មានសតិមិនគ្រប់ រស់នៅជាមួយជីដូន នៅភូមិហារ សង្កាត់ស្ពានថ្មរ ខណ្ឌដង្កោ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះទើបនឹងចេញពីចាក់សាំង ដែលមានចំងាយពីកន្លែងកើតហេតុជាង១០០ម៉ែត្រ ហើយបានជិះម៉ូតូតាមបណ្ដោយផ្លូវលេខ២១៧ ទិសដៅពីត្បូងទៅជើង(បញ្ច្រាស់ទិសចរាចរណ៍) ខណៈមកដល់ចំណុចកើតហេតុក៏មានរថយន្ត មួយគ្រឿងមិនស្គាល់ម៉ាកបើកក្នុងល្បឿនលឿនទិសដៅពីជើងទៅត្បូងបានបុកចំពីមុខពេញទំហឹង បណ្តាលឲ្យប៉ើងផ្លោងទាំងមនុស្សនិងម៉ូតូបោកផ្ទប់ទៅនឹងគល់បង្គោលភ្លើងបំភ្លឺផ្លូវ បណ្តាលឲ្យបាក់ក ផុងលលាដ៏ក្បាល ស្លាប់នៅលើម៉ូតូនិងកន្លែងភ្លាមៗ។ ចំណែករថយន្ដបានបន្ថែមល្បឿនរត់គេចខ្លួនបាត់ស្រមោល។
បន្ទាប់ពីឃើញហេតុការណ៍ប្រជាពលរដ្ឋបានរាយការណ៍ទៅសមត្ថកិច្ចមូលដ្ធានឲ្យចុះមកដល់កន្លែងហេតុ និងបានទាក់ទងទៅសាច់ញាតិជនរងគ្រោះ។
ក្រោយពេលកើតហេតុសមត្ថកិច្ចជំនាញចុះមកពិនិត្យសពរួចប្រគល់ឲ្យសាច់ញាតិចាត់ចែងយកទៅធ្វើបុណ្យតាមប្រពៃណី៕
ដោយ៖ ជីម ភារ៉ា ដង្កោ
